1Pe Yesu ipwai ipa, “Yo ara mwisi wain ndrokonan, pe Tomo, ara yiy mbukena piyang.2Pe Tomo ngara kisondriti hu ndrandra wain mepo ippai isa kili yo pe hu konoho ppwai hiyan pwi. Pe ndrandran mepo ngara kappwai opu, ara ngara kisondriti hu para hukappwai kaya soyon.3Pe wawu, ara akana howen pwen, paratesah, nongan kunpwai pwen kinsa kili wawu.4Pe akappai kili yo, pwen andre kuppai kuro ndron kili wawu. Kapa ndrandra mwisi wain kinippai kinna paran pwi, ara andre kinippwai pwi. Pwen tehen tora ko, kapa wawu kanippai kili yo pwi, ara andre wawu kanippwai pwi.5Pe yo mbukeno ara yo mwisi wain ara, pe wawu ara hu ndrandran. Pwen kapa ndramat hamou kippai kiro kili yo, ara andre kippwai soyon. Pe kapa anippai kinsa kili yo pwi, ara andre anmbusi hapesah pwi.6Pe kapa ndramat hamou kinippai kili yo pwi, ara yiy tehe ndrandran handra mepo piyani iya mawen pe iya mang. Pe ngara hu kalokihi hu ndrandran ara, pe kapiyaniy hukaya mwan para katimwiy.7Pe kapa akappai kili yo pe hu nongno kiro kili wawu, pwen sehe melit akasok yo kiya aliy, ara andre kumbusiy tehen aliy kiro ndruwa soksok tawawu.8Pe Tomo, ara andre ngalan kiya paingan, paratesah, wawuppwai pe sangi wawu ara iya soyon, pe wawu pwaingani wawu tehe wawu ndramiro hu.9Pe Tomo ara ndriyan imbuluhi yo, pwen yo, ara tehen aliy, ndriyo imbuluhi wawu yi. Pe wawu koro nondriya namiliwai to.10Pe kapa akaho ndruwa hu nongan para pwahanou to, ara andre wawu koro ndron nondriya namiliwai to tehe yo uro ndruwa pwahanou ta Tomo pe urupo nondriya namiliwai tan.11Yo kunpwai toro pwen kinsa kili wawu, para pwesai to, ara kiro kili wawu, pwen andre pwesa wawu kiya namandran iya.12Pe nongan para pwahanou to, ara iye: Ndriya wawu kimbuluhi wawu hamou-hamou tehe ndriyo ngara kinmbuluhi wawu.13Namiliwai namandran kinto kili ndramat hamou tehen iye pwi, tehe andre kiyki mwoiwan kiya para kisopwat kowasen hu, ara pwi.14Pe kapa wawu koho ndruwa nongno kunpwandrandrahani wawu kinna aliy, pwen wawu ara kowase.15Hapeko kunuyoh wawu tehe wawu ndramat para poya mbulen, ara pwi, paratesah, ndramat hamou para poya mbulen, ara ikowu tesah namandran tan ita mbusiy. Yo uyoh wawu, ara tehe wawu kowase, paratesah, nongan masih uhulingi iyau kili Tomo, ara kunpwai ngawan pwen kinsa kili wawu.16Wawu ara akantakinimo pwi, hapeko yo urakinima wawu, pe uiki mbulen isa kili wawu para akaya pe akappwai kaya soyon, pe sangi wawu, ara andre kinto-kinto. Pwen sehe melit akasok kiya ngolo, ara Tomo andre kiykiy.17Nongan para pwahanou to iye: Ndriya wawu, ara kimbuluhi wawu hamou-hamou.”
Hu ndramat para kol pwan, ara humwisnani hu ndramira Yesu
18Pe Yesu ipwai ipa, “Kapa hu ndramat para kol pwan hu kamwisnani wawu, ara akalohonganiy tehe mamu, ara humwisnani yo tehen aliy.19Pe kapa wawu kapai sura hu ndramat para kol pwan mepo ngara kamwasinani Ngindrai, ara andre hu kanamili wawu tehe hunamili hu mbukenan, hapeko wawu, ara para kol pwan pwi. Yo kuntakinima wawu pwen akansa mawen kol pwan. Pwen tehen tora ko, hu ndramat para kol pwan, ara andre hu kamwisnani wawu.20Pwen hu nongan kunpwai pwen kinsa kili wawu, ara akoro lohonganiy kiya hiyan: ‘Tehe ndramat hamou para poya mbulen, ara yiy kinho hin kili namandran tan pwi.’ Pwen kapa hu kapwalngani yo, pwen ara andre hu kalpwangna wawu tora yi. Pe kapa hu karo ndruwa hu hinonou to, ara andre hu karo ndruwa hu hinonou tawawu yi.21Pe iya ngolo kopu andre hu karandroyani wawu, paratesah, Tomo mepo ipwandrisa yo usa, ara hu kanpahasani yiy pwi.22Pe kapa yo kunsa pe kunwong kinna kili hu pwi, pwen andre hu kakuni hu kora pakut mwomwan tahu pwi, hapeko mahapo, ara handra sai para hu kakohoni hu pakut mwomwan tahu, ara pwi.23Yiy mepo imwisnani yo, ara imwisnani Tomo yi.24Pwen kapa kunho mbusi hu mbulen aro mwalinga hu mepo mamu hamou kinho mbusiy pwi, ara kora pakut mwomwan tahu andre hu kankuniy pwi. Hapeko hu ndraikiya pwoke, ara mahapo hutopo nimei, pe hutopo mwisnani youlu Tomo kene.25Pwen kultuw hu mbusiy, ara pwayan kinpwai pwen ita nongan para pwahanou tahu sahin, para kipoo kisa rayah manan. Nongan ara ipa toro: ‘Hu mwisnani yo, ara ndroiyin pwi.’26Pe kiro mwonen Hamou para Sopwat mepo andre kupwandrisa yiy kisa, mepo iyau kili Tomo, yiy ara Mwoiwan Haiyan iwong nongan ndrokonan mepo iyau kili Tomo. Pe yiy andre kitiyani titiye to.27Pwen wawu yi, ara akatiyani titiye to, paratesah, urandroiyi mbulyo, ara wawu ro sura yo yi.