1Leng ngali Luxaal ina Esliwaa a se atat, o Iesu a se atii we, xan leng ngali papaalii abala xolkolmoxo ina inaman a se xaalame, ngali naba laa sangan Mom. A tigiri titii di malen xan no tsaa, di ta manman lalon xolkolmoxo, oro talaawaa a saan ngali asen we, a titii buxaai di.2Iesu mii xan no tsi asasing di se xale sin luxaal nale, Saatan a se tsigaii xan adodo tsaa Judas Iskariot, xan tsi Saimon ngali babel tali Iesu papan no liman no matenkorot.3Iesu atii we, xan Mom a se tali sin ia no maarang araraa paina xan banam, ma axaal sin Moroaa ma naba mula laa sin Moroaa,4Lalon abia luxaal a til laa lapalaa, axarisli xan uga disdis ta alalen lokobel ma ga alen taawal ulti ia.5Mil, aruati daan lalon diis, ga guraii no xaden xan no tsi asasing ma ga a puraa no taman abia taawal ta alen.6A xaalame sangan Saimon Pita, o Saimon Pita ga paare ngali, â Orong, u ba xap guraii no xaʼigi?â7Iesu ga xisi, â U xap leng sin sawe iaa ta wena xosaraa atala, oro mil u ba atii.â8Pita a paare we, â A xap, u ba suk xap guraii xaʼigi.â Iesu a xisi, â Nawe iaa ba xap guraii no xaiim, iu ba xap tsap nugu tsi asasing.â9Saimon Pita a xisi, â Orong, nangaam guraii mu xaʼigi, oro u na guraii no limaaga ma xuaaga bula!â10Iesu tii ga xisi, â Saa ia ta se sisil a saan mu ngali na guraii no xaden; no isuaan araraa a xap pun. O gim, gim xap pun, oro axuuk ina gim mu a pun.â11Atii saa ina di naba babel tali ia papan no liman no matenkorot, biaabi ga we axuuk mu ia xa ina gim a pun.12Biaa Iesu ta se guraii araraai no xaden di, atamtuel sebula lalon xan no uga disdis ma ga mula laa lalon niaan ta tsotso. Ga atsuraa di, â Gim atii ngali sa iaa ta xosaraa abala sin gim?13Gim putsangi iaa â Unaasasingâ ma â Orong,â a tutiik abia, amuina iaa iwaa mat laxen taamat.14Talaawaa biaa iaa ta se guraii no xaden gim malen nagim Orong ma Unaasasing, gim na eguraii engen no xaden gim.15Iaa taxaaturungi abala puapua ngali gim na amusili senaara iaa tii se xosaraa sin gim.16Iaa asaaiti gim taman so, a xap xa untutule na lot ngen xan manmanel, o xa ngutsu na lot buxa ngen aia xa ta tulen ia.17Talaawaa gim ta se atii abala no maarang, Orong naba atubudaani gim nawe gim xosaraa no.
Iesu alengi xan bababel
18â Iaa xap paare ngali gim araraa, a xap, iaa atii no saa iaa tii se axilangi di. Balawaa ngali taxaa puaa so Inaatel Pat: â Saa ia gelulu ta arie ngani nugu tsoki, naba babel tali iaa.â19â Talaawaa iaa asaaiti gim o setauan sin naba tsap, biaa naba ta tsap, gim ba taltaalnge we, â Iaa iwaa mu, Iaa.â20Iaa asaaiti gim taman so: saa ia ta sirawaa iwaa xa iaa ta tulen, a malen mu, ta sirawaa iaa, ma iwaa xa ta sirawaa iaa, a sirawaa iwaa xa ta tulen iaa.â21Mil ina Iesu ta paare taman abala, nantanuaan asuk mamaet ga paare leng we, â Iaa asaaiti gim taman so: xa ina gim naba babel tali iaa papan no liman no matenkorot.â22No tsi asasing di agar iʼis ngen di. Di araraa di suk xap leng, saa ina di so.23Iexa tsi asasing, iwaa Iesu ta suk titii buxaai, tii tsotso sangan ia,24o Saimon Pita ga putmaata ia, â Atsuraa ia, saa so naba babel tali ia?â25Iwaa taamat a suxa mula ga ale sin Iesu ga atsuraa, â Orong, saa aia?â26Iesu tii ga xisi, â Iwaa xa aia iaa ba ta amadaaki abala pu tsoki lalon diis, iaa na tali sin.â Biaa ta amadaaki pu tsoki lalon diis asuk tali sin Judas Iskariot, xan tsi Saimon.27Biaa Judas ta ngani abia tsoki, Saatan asuk tsigaii. Iesu ga asaaiti, â Sawe iu ta saan ngali xosaraa, iu na xosor isagaalen,â28oro, a xap xa ina di tia lalon abia luxaal na atii ngalisa so Iesu ga paare weaatala sin ia.29Amuina Judas tii tilaamamil sin no xuxute, o biexaal ina no tsi asasing, di ga adodo we, Iesu a tulen ngali laa uuli xaa was, di ta saan ngali, ngali abia luxaal o ngali tali xaa was sin no muunwas.30Tiwaa tsaa biaa Judas tii ngani abia tsoki, a suk tsuul, sin ta se bing.
Iesu a paare leng we, Pita naba taaltalu sin
31Biaa ta se laa, Iesu ga paare, â Talaawaa xan minaalam Xan Tsi Taamat a se tsap lengleng, ma xan minaalam Moroaa a se tsap lengleng sin ia.â32Nawe Moroaa a adi minaalam sin ia, naba aminaalami xan tsi tsaa ma naba aminaalami ia, tiwaa tsaa.33â Nugu no tsi, iaa ba xap man buxa mii gim. Gim ba nanen ngali iaa, malen iaa ta se asaaiti no Jiu, talaawaa iaa asaaiti gim: Gim xap pupua ngali laa lalon abia xolot iaa ba ta laa sin.34â Balawaa papaare watwat uul, iaa ta tali sin gim: Gim na etitii engen gim tsaa. Malen iaa ta titii gim, biaabi gim na etitii engen gim tsaa.35Sin abala, no inaman araraa di ba atii we gim nugu no tsi asasing, nawe gim etitii ngen gim tsaa.â36Saimon Pita ga atsuraa ia, â Orong, itaa u ba laa?â Iesu ga xisi, â U xap pupua ngali amusili iaa laa lalon abia xolot talaawaa. Oro, mil maaba iu ba laa itaa iaa ta laa.â37Pita ga sebula atsuraa, â Orong, ngali sa iaa ga xap pupua ngali amusili iu talaawaa? Iaa ba tali nugu tino ma iaa ba met ngali iu.â38Mil Iesu ga xisi, â Aso iu ba met ngali iaa? Iaa asaaiti iu so, setauan sin puraa naba ta teng, iu ba uliis nanaatuul we, u xap atii iaa!