Yezu ashîgwa amavurha g’omugavu
1Erhi hasigala nsiku ndarhu embere za Basâka, Yezu ajà e Betaniya, emunda Lazaro afûlaga àbâga.2Bamushêgera, na Marta akamurhumikira. Lazaro naye àli omu bâli oku cîbo bo naye.3Mariya anaciyanka enjebe y’amavurha g’omugavu gw’engulo ndârhi, arhondêra agashîga Yezu oku magulu anagahôrhola n’emviri zâge; enyumpa yoshi yayunjula kìsûnunu.4Yûda w’e Keriyoti, muguma w’omu baganda bâge, olya wali ayish’imuhâna, aderha, erhi:5«Owaguzagya ogu mugavu dinaribihumbi bisharhu, akazihà abakenyi!»6Lurhàli lukogo lwa bakenyi aderheraga ntyo, ci bulya càli cishambo na bulya ye wabîkaga enshoho, akazâg’izimba ebyàlimwo.7Yezu, erhi: «Mumuleke. “Ogu mugavu àli agubîkîre olusiku lw’okubishwa kwâni.”8“Bulya abakenyi, ensiku zoshi muli haguma nabo, ci niehe arhali ensiku zoshi mwâmbona”».9Bayahudi banji bamanya oku ho ali aho, banayisha, arhali Yezu yênene orhumire, ci mpu babone na Lazaro afûlaga.10Abajinji b’abadâhwa bahiga okuyîrha Lazaro naye,11bulya Bayahudi banji bakâg’ibaleka erhi ye rhuma, bakayêmêra Yezu.Yezu ajà omu Yeruzalemu
12Erhi buca, erya ngabo y’abantu bâli oku lukulu bayumva oku Yezu ali omu njira y’okujà e Yeruzalemu.13Bahagula amashami g’emishugushugu, bagend’imulinga n’okukayakûza, mpu: «Hozana! Agishwe oyu oyishire oku izîno lya Nyakasane, ye Mwâmi w’Israheli!»14Yezu abona omucukà gw’endogomi, agushonakwo nk’oku byàli biyandisirwe, mpu:15«Orhayôbohaga, mwâli wa Siyoni; Mwâmi wâwe oyo oyishire, ashonyire oku mucûkà gw’endogomi».16Abaganda bâge barhayirukiraga bayumva; ci erhi Yezu abà amâkuzibwa, bakengcra oku ebyo byàli biyandisirwe kuli ye n’oku byo bànali bamujirire.17Balya boshi bâli ah’akûlaga Lazaro omu nshinda anamufûla omu bafù, bakâg’ihamîriza.18Kwo kwanarhumire olubaga lugend’imulinga: bulya bâli bayumvîrhe oku ajizire eco cisômezo.19Obwo Abafarizeyi bakâbwîrana, mpu: «Ka murhabwîni oku murhamuhashe! Obu Olubaga lwoshi lumushimbire!»Yezu alêba oku kukwânîne afè lyo akuzibwa
20Omu bantu baliyishir’iharâmya oku lusiku lukulu, mwâli Abagereki.21Banaciyegera Filipo wali w’e Betisayida omu Galileya, bamubwîra, mpu: «Waliha, rhwankasîmire nîrhu okubona Yezu».22Filipo abwîra Andreya; Andreya na Filipo baj’ibwîra Yezu.23Yezu abashuza, erhi: «Amango Mwene-omuntu akuzibwa gayishire.24Okuli, okuli, mmubwîzire, nka mbeke y’engano erharhogîri omu budaka ekanafâ, enayôrhe yône; ci ekafà, lyo eburha mburho nyinji.25Osîma obuzîne bwâge, anaburhêre; naye oshomba obuzîne bwâge hano igulu, anabulange omu kalamo k’ensiku n’amango.26Olonza okunshiga, anshimbe; n’aha ndi, ho n’omwambali wâni ayish’ibà. Omuntu onshizire, Larha ayish’imukuza.27Bunôla omurhima gwâni gwamâfuduka. Kuerhi naderhaga? Larha, oncize kuli aga mango. Càbà co carhumaga mpika muli aga mango.28Larha, kuza izîno lyâwe!» Izù lyanacirhenga emalunga, erhi: «Nalikuzize nanacîlikuza kandi».29Engabo y’abantu yahali, erhi eyumva, yaderha mpu mulazo; abandi, mpu: «Malahika washambâlaga bo naye».30Yezu ashuza, erhi: «Arhali nie narhumaga eryo izù lyayumvika, ci mwe mwarhumaga.31Ganôla go mango igulu lyatwîrwa olubanja; ganôla go mango omuluzi wa lîno igulu ajugucirwa embuga.32Nâni bano nyînamulwa kurhenga igulu, nânakululira abantu boshi emunda ndi».33Aderha ntyo mpu ayêrekane lufù luci ayish’ifà.34Olubaga lwamushuza, mpu: «Ci rhwayumvîrhe omu Citabu c’Amarhegekooku Kristu àbâho ensiku zoshi. “Kurhi w’oyo ocidesirage, mpu”: “Kukwânîne Mwene-omuntu ayinamulwe?” “Yerigi ndi oyo Mwene-omuntu?”»35Yezu abashuza, erhi: «Obulangale burhaciri ninyu kasanzi kanene. Kaz’imugende obu bwacibona, lyo omwizimya gulek’immugwanyanya. Ogenda omu mwizimya, arhamanya ah’ajà.36Obu mucigwêrhe obulangale, yêmêri obulangale, lyo muhinduka bâna b’obûlangâlè». Erhi Yezu ayûs’iderha ntyo, acîgendera, abarhêreka.Yezu afundika enyigîrizo: okubula obuyêmêre kw’Abayahudi
37Ali ajizire bisômerîne binji omu masù gâbo, barhanamuyêmêraga,38lyo aka kanwa k’omulêbi Izaya kayunjula, erhi: «Nyakasane, ndi wayêmîre ebinwa bîrhu? N’okuboko kwa Nyakasane, ndi kwamanyisîbwe»?39Câbà barhankanayêmîre, bulya Izaya ashubir’iderha, erhi:40«Amasù gâbo agahunyize n’emirhima yâbo ayiziba, mpu lyo amasù gâbo galek’ibona n’emirhima yâbo erek’iyumva, lyo barhahinduka binjà, lyo ntanabafumya».41Izaya aderha ntyo erhi abona irenge lya Yezu, ye anaderhaga erhi alêba ntyo.42Ci kwône banji, ciru n’omu bagula, bamuyêmêra; ci barhakâg’icîyêrekana erhi kuyôboha Abafarizeyi kurhuma, mpu balek’ikagwa omu sinagogi.43Ntyo basîma irenge lirhenga emwa abantu ahâli h’irenge lirhenga emwa Nnâmahanga.44Yezu anaciyâkûza n’izù linene, erhi: «Onyêmêra, arhali nie ayêmêra, ci olya wantumaga,45n’ombwîne erhi owantumaga ye abwîne.46Nie bulangale najîre en’igulu, mpu lyo ngasi onyêmîre alek’ibêra omu mwizimya.47Oyumva ebinwa byâni arhanabishimbe, arhali nie nâmutwîre olubanja, bulya ntayishig’itwa manja, ci nti ncize igulu.48Ongayaguza n’okurhayumva ebinwa byâni agwêrhe owamutwîra olubanja: ebinwa nadesire byo byâmutwîre olubanja olusiku luzinda.49Bulya arhali byâni nadesire, ci Larha wantumaga ye wantegesire eby’okuderha n’eby’okuyigîriza.50Nanyishi oku irhegeko lyâge liri kalamo k’ensiku n’amango. Ebinwa nderha, oku Larha abimbwîzire kwo mbiderha».