Yuḥanna12rif_lti
Adhan s řeɛṭur iɣřan di Bayt-Ɛanya
1Setta n wussan qbeř Řɛid n Tɣarṣt n Useɛdu, yusa-dd Yasuɛ ɣar Bayt-Ɛanya, mani tuɣa iǧa Aliɛazar, wenni dd-issnekkar Yasuɛ zi taddart n imettinen.2Ggin as din ijj n umensi. Marta tuɣa tsexxar, u Aliɛazar tuɣa d ijjen zeg inni akides iqqimen ɣar ṭṭabřa.3Teksi-dd Maryam ijj n uɣarraf n zzect i wedhan zi řeɛṭur n ṣṣenbel teṣfa tiɣřa, tedhen iḍaren n Yasuɛ, xenni temseḥ iḍaren nnes s ucuwwaf nnes. Taddart teccur s řefwaḥet n zzect n wedhan.4Ijjen zeg imeḥḍaren nnes wenni umi qqaren Yahuda Isxariyuṭi wenni t i ɣa iɣdaren, inna:5“Mayemmi war temmenz ca řefwaḥet-a n ṣṣenbel s teřt mya n dinar, ḥima ad temmewc i imezřaḍ?”6Netta inna aya, war iǧi minzi cqan t imezřaḍ, maca minzi netta d aceffar, tuɣa ɣares ssenduq, uca yarbu min dayes immarsen.7Yasuɛ inna: “Jjem tt, aqa txemmeř i-tt i wass n wenḍeř inu.8Minzi imezřaḍ aqa aten řebda akidwem, maca Necc war kidwem ǧiɣ i řebda.”9Aṭṭas n řɣaci zeg Wudayen sřin belli Yasuɛ aqa-t dinni. Usin-dd nitni, war iǧi ḥaca zi ssibbet n Yasuɛ, maca ɛawed ḥima ad ẓaren Aliɛazar, wenni dd-issnekkar zi taddart n imettinen.10Mcawaren imeqqranen n ikehhanen, ḥima ad nɣen uřa d Aliɛazar,11minzi aṭṭas n Wudayen ffɣen-dd zi ssibbet nnes uca umnen di Yasuɛ.Adaf n Yasuɛ ɣar Urcalim12Tiwecca nnes, umi sřin aṭṭas n řɣaci inni dd yusin ɣar Řɛid belli Yasuɛ yusa-dd ɣar Urcalim,13ksin ifetwan n tini uca ffɣen, ḥima ad t řqan, řaɣan:
“Uṣanna! Sseɛd n Wenni dd-yusin s Yisem n SIDI, Ajeǧid n Israil!”14Yufa Yasuɛ ijj n wesnus uca inya xas, am mammec tura:15“War tteggʷed ca, a yeǧis n Ṣihyun, xzar, Ajeǧid nnem ad dd-yas, iqqim x wesnus, aḥenjir n teɣyuč.”16Imeḥḍaren nnes war fhimen ca timesřayin-a di řweqt nni. Maca awarni řami ittwassuɛřa Yasuɛ, řexdenni ɛeqřen belli man aya tura xas uca belli nitni ggin zzayes man aya.17Řɣaci i tuɣa iǧan akides, tuɣa iched aqa Netta iřaɣa-dd x Aliɛazar zeg wenḍeř uca issnekkar i-t-i-dd zi taddart n imettinen.18S man aya iffeɣ řɣaci ameqqran maḥend ad t mmeřqan, minzi nitni sřin belli igga řeɛřamet-a.19Ifarisiyyen nnan jar asen: “Tᵉttwařam mliḥ belli kenniw tᵉttakkwaḍem ɣar walu, xzarem, aqa qaɛ ddunect teḍfar i-t-i-dd.”
Yasuɛ issawař x řmewt d tnukra nnes20Tuɣa din ca n iwdan zi řegnus jar asen inni dd-igeɛɛden ɣar Urcalim ḥima ad ɛebden di Řɛid.21Ina ruḥen ɣar Filippus, wenni zi tendint n Bayt-Ṣayda di Ljalil. Sseqsan t, nnan: “A Sidi, nexs ad nẓar Yasuɛ.”22Yusa-dd Filippus, inna tt i Andrawus, uca Andrawus d Filippus nnan tt i Yasuɛ.23Yasuɛ yarra-dd, inna asen: “Aqa tiweḍ-dd tsaɛɛet i di i ɣa ittwassɛuǧ Mmis n bnadem.24S tidett, s tidett, Necc ad awem iniɣ: Mařa war dd-iwḍi řḥebb n yirden di temmurt, ad immet, xenni ad iqqim weḥḥdes, maca mařa immut, xenni ad dd-yawi řɣiǧet aṭṭas.25Wenni ittexsen tudart nnes, ad tt ixsar, maca wenni i ɣa icarhen tudart nnes di ddunect-a, ad tt ixemmeř i Tudart ittduman.26Mařa ca n yijjen isexxar ayi, ejj i-t ad ayi iḍfar. Mani ɣa iřiɣ Necc, dinni i ɣa yiři ɛawed umsexxar inu. Mařa ca n ijjen ixdem ayi, ad t icenneɛ Baba.27Řexxu uř inu innehweř, min ɣa iniɣ? A Baba, senjem ayi zi tsaɛɛet-a? Maca x uyenni i dd-usiɣ ɣar tsaɛɛet-a.28A Baba, sɛuǧi Isem nnec.” Xenni tusa-dd ict n tmijja zeg ujenna, tenna: “Sɛuǧeɣ t uca ad t sɛuǧeɣ ɛawed!”29Řɣaci i tuɣa ibedden din isřa i-tt, nitni nnan: “Aqa imsar wajjaj.” Inneɣni nnan: “Aqa issiweř-dd ijj n lmalak akides.”30Yarra-dd Yasuɛ, inna asen: “Tmijja-ya war teǧi ca di ṭṭweɛ inu maca di ṭṭweɛ nwem.31Řexxu ad yiři řḥukm x ddunect-a, řexxu ad immenḍar umeqqran n ddunect-a ɣar barra.32U Necc, x minni i ɣa ttwassgeɛɛdeɣ zi temmurt, ad ɣari dd-jebdeɣ marra.”33Inna man aya ḥima ad isscen ɣar man řmewt i ɣa immet.34Řɣaci yarra-dd xas: “Neccin nesřa zi Ccariɛa aqa Lmasiḥ ad iqqim i řebda. I mammec teqqared Cek belli ittxeṣṣa i Mmis n bnadem ad ittwassgeɛɛed? Min iɛna Mmis-a n bnadem?”35Yasuɛ inna asen: “Tafawt ad tiři akidwem drus n řweqt ɛad. Uyurem, řami ɣarwem Tafawt, ḥima war kenniw tᵉttᵉṭṭef taǧest. Wenni igguren di taǧest, war issin mani iggur.36Amnem di Tfawt maḥend Tafawt ɛad aqa-tt ɣarwem, ḥima kenniw ad tiřim tarwa n Tfawt.” Ammu i tuɣa issawař Yasuɛ. Řexdenni yuyur uca innufar zzaysen.
Břa l’iman n Wudayen37Waxxa tuɣa Netta ittegg marra řeɛřamat-a zzatsen, nitni war zzayes uminen ca,38ḥima ad ittwakemmeř wawař n unabi Icaɛya i innan:
“A Sidi, wi yumnen s řexbar nneɣ u i umi ittwassargeb ufus n SIDI?”39S uyenni war zemmaren ad amnen, minzi Icaɛya inna ɛawed:40“Nitni ssdarɣřen tiṭṭawin n yixef nsen, sseqseḥen uřawen nsen, ḥima war ttᵉtwiřin s tiṭṭawin nsen, war fehhmen s wuř nsen, ad tuben uca Necc ad ten ssgenfiɣ.”41Inna Icaɛya ammu, umi iẓra aɛuǧi nnes uca tuɣa issawař xas.42Umnen zzayes ɛawed aṭṭas n imeqqranen n řgens, maca s ssibbet n Ifarisiyyen war zzayes cehden ca s bṭayṭay, ḥima war ten ssuffuɣen zi temzida.43Minzi nitni tuɣa xsen aɛuǧi zeg iwdan x uɛuǧi zi AREBBI.44Maca Yasuɛ iřaɣa, inna: “Wenni dayi ittamnen, war dayi ittimen ca, maca deg Wenni d ayi dd-issekken.45Wenni d ayi iẓrin, iẓra wenni d ayi dd-issekken.46Necc d Tafawt i dd-yusin ɣar ddunect, ḥima kuř ijjen wenni dayi ittamnen, war ittɣimi ca di taǧest.47Mařa ca n yijjen isřa i wawařen inu, maca war daysen ittᵉṭṭef, Necc war xas ḥekkmeɣ ca. Necc war dd-usiɣ ca, ḥima ad ḥekmeɣ x ddunect, maca ḥima ad wceɣ Tudart i ddunect.48Wenni d ayi isseḥqaren uca war iqbiř awařen inu, ɣares wenni xas i ɣa iḥekmen: awař i nniɣ, ad xas iḥkem deg wass aneggaru.49Minzi Necc war ssiwřeɣ ca zi ɣari, maca Baba Wenni d ayi-dd-issekken iwca ayi ict n tewṣeyyet x min ɣa iniɣ d min xef ɣa ssiwřeɣ,50u Necc ssneɣ tiweṣṣa nnes, aqa atent d Tudart ittduman. S uya, min ssawařeɣ, ssawařeɣ t am mammec d ayi inna Baba.”