1Iexa taamat iesan ilaa Lasarus, a maramase. Ia in Betani, xan xobel Maria ma tawaneina Maata.2Iwaa Maria, moton Lasarus ta maramase, iwaa mu tii patsaa daan tso mamainaang papan Orong ga a puraa no xaden taman ulinxuan.3Lomasen tawaneina delu tulen totore sin Iesu, â Orong iwaa iu ta titii a maramase.â4Iesu alongmen abala ga we, â Balawaa maramase naba xapkap lalon minet. A xap, ngali asen xan minaalam Moroaa, biaabi ngali xan tsi Moroaa naba aminaalami sin.â5Iesu a titii Maata mii tawaneina ma Lasarus.6Oro, biaa ta se alongen we, Lasarus a maramase, a sebula manman no leng alua lalon abia xobel ta manman tia.7Mil ga asaaiti xan no tsi asasing, â Gita ba sebula mula laa Judaia.â8Xan no tsi asasing di paare sin, â Rabai, talaawaa mu no Jiu di wena pidili iu taman no xaat, o iu wena sebula mula laa tia?â9Iesu a xisi di, â Gita atii we sangaul axuuk ma ga laa lua ina aua lasiaat. Taamat iwaa ta eses lalon laleng naba xap litke, amuina a nanen lalon xan laleng ina xolkolmoxo ina inaman.10Nawe a eses nabing biaa naba litke amuina biaa laleng a xap manman lalon ia.â11Mil sin abia no maarang, a laa ga asaaiti di, â Turan gita ilaa Lasarus a se urange; oro iaa ba laa atia ngali apadaa ia.â12Xan no tsi asasing di ga we, â Orong, nawe a urange, biaa naba axaau mu.â13Iesu a papaare taman xan minet Lasarus, oro xan no tsi asasing di adodo we, Lasarus a urange mu.14O mil tii ga asaait alengi di, â Lasarus a se met,15ma amuina ngali gim, iaa taton iaa ta xap manman mii di, ngali gim ba taltaalnge. Oro, gita laa sangan ia.â16Mil Tomas, biexa iesan Didimus, ga asaaiti no tsi asasing araraa ga we, â Nagaa laa mii, ngali gita ba met bula mii ia.â17Sin xan tsinap, Iesu tii atik tatanginai malen Lasarus a se matul no leng aet lalon lia pupuna.18Betani aman malen a tuul no kilomita palaaen Jerusalem,19ma xuduxudu ina no Jiu di ga xaalame sangan Maata ma Maria ngali le atuturi delulu amuina moton delulu a se xaapina.20Biaa Maata ta alongmen we, Iesu a se xaalame, ga tsuul ngali laa es balsi ia, oro Maria a manman mu lalon xadi anua.21Maata ga paare sin Iesu, â Orong, nawe u nii manman atala, motogo nii ba xap met.22Oro, iaa atii malen talaawaa Moroaa naba tali sawe u ta ningi sin.â23Iesu ga paare sin ia, â Num taamat naba tapaas mula taman tino.â24Maata ga xisi, â Iaa atii naba tapaas mula sin xapkap ina no leng araraa.â25Iesu ga paare ngali ia, â Iaa, iaa tinapaas mula ma tino. Iwaa xa ta taltaalnge sin iaa naba adi tino, ma nawe a se met naba tino,26ma iwaa ta tino ma ta taltaalnge sin iaa naba suk xap met. U taltaalnge sin abala?â27Maata asaaiti ia, â Iou Orong, iaa taltaalnge we, iu mu Karisito, xan tsi Moroaa iwaa naba ta xaalame lalon xolkolmoxo ina inaman.â28Ma mulina Maata ta se paare weaatalaa, a mula ga laa ileitsoli tawaneina Maria o ga asaaiti, â Unaasasing ila se, a tiirik ngali iu.â29Biaa Maria ta alongmen abala, a tapaas isagaa ma ga suk laa sangan.30Iesu a xap mager tsiga lalon abia xobel, a lo manman tsaa sin abia xolot ta balsi Maata tia.31Biaa no Jiu di ta manman ngali atuturi Maria lalon anua di lasi ta tapaas isagaa ga tsuul, di suk amusili. Di sarowe naba laa lalon lia pupuna ngali laa teng.32Biaa Maria ta laa tsap sin abia xolot Iesu ta manman tia ga lasi ia, a sage putput sangan ga we, â Orong, nawe iu nii manman tala, motogo nii xap met.â33Biaa Iesu ta lasi ta lo tengteng, ma no Jiu biaa di ta xaalame mii di teng bula, tii suk lolbiir buxa lalon nantanuaan ma ga adodo buxa.34Ga atsuraa di, â Gim atetei lalon sen lia pupuna?â Di ga xisi, â Orong, xaalame ma u na le lasi.â35Iesu ga teng.36Mil no Jiu di ga paare, â Gim lasi, asuk titii buxaai ia.â37Oro biexaal ina di, di paare, â A tsalali no matan aia taamat ta baba o ngalisa ga xap pupua ngali tilkaali ia sin minet?â
Iesu atapaasi Lasarus sin minet
38Iesu asuk lolbiir buxa ga xaalame sangan lia pupuna. Biaa lia pupuna aman lalon lia sin gelgel ina buk, o biexa xaat di axos banti matenmat ina tsigatsiga.39Ga paare, â Gim puxenlii abia xaat alen matenmat.â O Maata, moton aia tongaan ga we, â Orong, amuina a se matul no leng aet, a se xapul aia.â40Iesu ga paare ngali di, â Iaa tii asaaiti gim we, nawe gim taltaalnge gim ba lasi xan minaalam Moroaa.â41Ma di ga puxenlii aia xaat. Iesu ga agar xale lapalaa ga paare, â Mom, iaa putsangi axaau sin iu, iu ta se alongmen iaa.42Iaa tii atii we, iu tigiri alongmen iaa, oro, iaa paare taman abala ngali xadi axaau balawaa malep di ta tiltil atala, ngali di ba taltaalnge we iu tulen iaa.â43Biaa ta se paare taman abala, asuk ilei xuupkup, â Lasarus, u na tsuul!â44Iwaa tongaan asuk tsuul taman no liman ma no xaden di tii ulsi taman no xolot ina laplap, o xuan di ngaati bula. Iesu ga paare ngali di, â Gim lubatli abia no laplap ina pupuna, gim aleiwaai ia.â
Di ngiti ngali sas amantei Iesu
45Biaabi xuduxudu ina no Jiu, biaa di ta xaalame ngali le uwaa Maria ma di tii se lasi sawe Iesu tii xosaraa ma di ga taltaalnge sin ia.46Oro, biexaal ina di, di laa sangan no Paarasi di ga asaaiti di taman sawe Iesu tii se xosaraa.47Mil no lalaamua ina no unsausawit ma no Paarasi di ga ilei biexa xalkale ina Sanidrin. Di ga atsura, â Gita ba xosaraa sa? Ilawaa taamat a se xosaraa xuduxudu ina no mat axixila xoror.48Nawe gita ba papaalii, na lo xoxosaraa abala, inaman araraa di ba suk taltaalnge sin. O no Rom di ba xaalame ma di na araabi Xan Anua Moroaa ma xida xobel labalaba.â49Oro iexa ina di, ilaa Kaiapas, iwaa tii unsausawit lapalaa sin abia miet, ga asaaiti di, â Gim suk xap atii xawas!50Gim xap atik axaautsi we, naba axaau ngali xa na xuuk na met ngali no inaman, o na xap abala xobel labalaba na araabi.â51A xap asaait taman abala sin xan adodo tsaa, Oro, biaa tii unsausawit lapalaa sin abia miet, tii tali xan totore propet we, Iesu naba se met ngali abala xobel labalaba,52ma a xap ngali xobel labalaba mu oro, ngali abia xan no tsi Moroaa, di ta man iʼis, ngali giwaa etudim di ngali di ba tsap xuuk.53Ma sin abia leng ma laa, di ga se ngiti ngali sas amantei Iesu.54Ma Iesu ga se xap bula eses iʼis papan no matan no Jiu. Ga laa lalon biexa xobel biil lalon inaman laba Epraaem, ga manman atia mii xan no tsi asasing.55Xadi Esliwaa no Jiu a se atat, o xuduxudu ina no inaman ina no xobel xaatsap, di xaale Jerusalem ngali xosaraa namaang ina amixati ngali aleiwaai di tsaa setauan ina Esliwaa.56Di lo nanen ngali Iesu biaa di ta lo tiltil lalon Xan Anua Moroaa ma di ga etiirik engen di, â Naba soro xap xaalame sin abala luxaal?â57Ma no lalaamua ina no unsausawit ma no Paarasi di ga tali totore watwat we, saa ia ta lasi Iesu lalon xa xolot, na paate alengi sin di, ngali di ba pupua ngali tsiili ia.