1“Nan nidzun bingan dzi nani da agam nabiani, garam mangan mamida i atangꞌa ntiangꞌ ririmpa dumpa sib in muantsi gan, da yaba rugan i atangꞌan, da arangan isu garam wapa nam da garam mpunga garam i uda nam.2Da garam atangꞌa muantsi rururungan da arangan garam mpada tayangꞌ dumpa igi.3Da garam mpada tayangꞌ muantsi igi itus muantsi i arangan. Da arangan inuꞌ dumpa gan da ifaringꞌ bits bits binganggan, da iringant i nifun da ifuari ruan yatsungꞌ arangan da iyu iwaꞌ manaꞌ.4Gubuꞌ uda dumpa gan santan waꞌa sib, da arangan imungꞌ gin da dumpa gan isruꞌ i arangan nifun da yatsungꞌ arangan.5Dumpa igi anungꞌ isangꞌ atsungꞌa garam manaꞌ mangan u, bungꞌ arunt sinungꞌ garam bida nigi, i waringant i arangan nifunggan isruꞌ u.”6Yisu ini nan raman igi da ribarangan, da ribigi wadzidziwan i arangan nanggan nidan igi wainggan u.7Ibinigi da Yisu itip ini binaꞌ, “Dzi ni nan nidzun bingan da agam, dzi aruani isu muantsi nifun i dumpa atangꞌan da waꞌan.8Garam sib angu bada mungꞌ i dzi ugu garam wapa nam da garam mpunga garam i uda nam, da bitsintaꞌ dumpa anungꞌ irim ringan i ribigi u.9Dzi su muantsi nifun. Manga bada da dzi da atangꞌa wasaꞌ da bungꞌ ampa bini. Bungꞌ atangꞌ da nawaꞌ da nayu nam gadan.10Garam wapa nam iba angu i wapa dumpa da isa funub da wayada nidzun angu. Da bitsintaꞌ dzi ba i ribarangan mpada maran taꞌan da mpada ngarubini bingan angu.11“Dzi su garam bini mpada tayangꞌ dumpa. Da garam bini mpada tayangꞌ dumpa ini mais i runggan da irim runggan rai i sifa ngants i dumpa.12Da bitsintaꞌ garam nanga gum i nam ntsuman anungꞌ dumpa rinunggan da wasu garam rururungan mpada tayangꞌ dumpa u. Gubuꞌ arangan tsanganda iyam buman badan, da itangin dumpa rai da irunt sinungꞌ. Da iyam buman igara dumpa igi da ipuꞌ wasi.13Garam nanga gum i nam ntsuman igi irunt an arun, i wain, arangan inang gum i nam ntsuman angu da maran anungꞌ ifur dumpa.14“Dzi garam bini mpada tayangꞌ dumpa. Dzi sruꞌ i gangꞌ dumpa gangꞌ da dzi dumpa gangꞌ isruꞌ i dzi,15ibi Ramangꞌ isruꞌ i dzi da dzi sruꞌ i Ramangꞌ. Da dzi bungꞌ arim runggangꞌ rai i dumpa igi.16Da dzi dumpa gangꞌ fain rumpai da anungꞌ impa ntiangꞌ wasaꞌ ani u. Dzi nafan da nayu aba nampruꞌ nabinigi. Da bungꞌ aringant i dzi nifunggangꞌ da nasu dumpa utup bitsintaꞌ da garam bitsintaꞌ angu i mpada tayangꞌ gin.17Ramangꞌ maran yari i dzi, i wain, dzi bungꞌ arim runggangꞌ rai da dzi bungꞌ atip ayu nanggangꞌ mpada maran taꞌan.18Manga wasangꞌ siata dzi nanggangꞌ mpada maran taꞌan rai u, imaꞌ. Dzi runggangꞌ maranggangꞌ furan angu da dzi bungꞌ arim runggangꞌ rai. Dzi su wain i rima rai da tipa udan. Nigi nan dzi Ramanggangꞌ ini da dzi i dzi nangan.”19Garam Yuda iringant i nan igi da uwayant itip isu iruꞌrun da yudzungꞌ nan da ruan.20Ribigi gan ampi bingan ini binaꞌ, “Marapayam maisan iyantsang arangan da ibrabruꞌ! Agam iburim ringam i arangan nanggan iyaꞌ?”21Da bitsintaꞌ fain ini binaꞌ, “Garam marapayam maisan yantsangan da anungꞌ isangꞌ nida nan bida nigi u. Isangꞌ marapayam maisan nanga garam maran gampaman tsanganda nam, ma?”
Garam Yuda Irim Udzungꞌ i Yisu Nida Runggan Wasi
22Da gubuꞌ mararam tsiraꞌ maran fura i gubuꞌ rima dangki da Anutu i Ungar Mararam ugu iwaꞌ Yerusalem da gubuꞌ rangarang tsiraꞌ.23Da Yisu iyung Solomon tsaparaꞌ gan mingꞌa Ungar Mararam ntiangꞌ gan wasaꞌ.24Garam Yuda imunti itsuafiꞌ Arangan sib da igutin ini binaꞌ, “Gubuꞌ sib angu da u nang aga wangungꞌ isu iruꞌrun i agu garam idzuwai. Da gubuꞌ idzuwai da u bungꞌ ani runggam wasi? Bida agu Garam Anutu Ragadan da wani nan rururungan da agai.”25Yisu ini ribigi nanggan mungaꞌ ibiani, “Dzi ni nan arangan sib da agam wa, da agam wamuaruts u. Gum bini bini dzi nangan i Ramangꞌ binganggan, nigi ikupis dzi wasi,26da bitsintaꞌ agam anungꞌ imuaruts dzi, i agam anungꞌ isu dzi dumpa gangꞌ u.27Dzi dumpa gangꞌ iringant i dzi nifunggangꞌ, da dzi sruꞌ i ribarangan, da ribarangan yatsungꞌ dzi.28Da dzi bungꞌ arim nam mpada ratar ntingan angu rutin, da ribarangan wasangꞌ i rima runggan rai u. Da mangan wasangꞌ i mpungan da dzunga gin sinungꞌ dzi banginggangꞌ u.29Ramangꞌ, aru runggan rima ribarangan da dzi, nampanggan iyus nam santan,da mangan wasangꞌ i mpungan da dzunga gin sinungꞌ Ramangꞌ banginggan u, imaꞌ.30Dzi da Ramangꞌ isu nam wain bitsintaꞌ.”31Gubuꞌ garam Yuda ringanta i nan igi, da itip iyu tauf i tapuda Arangan funub.32Da Yisu ini da ribigi ibiani, “Dzi santingꞌ gum bini bini ampi bingan Ramangꞌ tangindan da dzi i nangan imingꞌ agam maranggam sib. Da gum bini idzuwai igi gan inang da agam ini tapuda dzi funub i tauf?”33Garam Yuda ini Yisu nifunggan mungaꞌ ini binaꞌ, “Aga wani tapuda agu funub i gum bini igi mangan u, da bitsintaꞌ u ni nan asub i Anutu. Agu garam gar angu da u buni nanga runggam bida agu Anutu.”34Yisu ini nan mungaꞌ ini binaꞌ, “Anutu nanggan kakaran ani rumingꞌ wasaꞌ i agam nanggam faidagin nida binaꞌ, ‘Dzi ni, agam isu anutu faingꞌ.’35Anutu runggan ifaringꞌ rib uda i nanggan igi ibi anutu faingꞌ, da agi wasangꞌ i siata Anutu nanggan kakaran igi rai u.36Da bitsintaꞌ Ramangꞌ iraga dzi isu i rugan nanggan mararam da itangin dzi iruꞌ ba intap. Ibinigi da wain idzuwai da agam ini dzi nida nan asub i Anutu i dzi nida binaꞌ, ‘Dzi aruani isu Anutu Narunggan’?37Bida dzi mamida i nanga Ramangꞌ guman, da agam anungꞌ muarutsa dzi u.38Da bitsintaꞌ bida dzi nanga Arangan guman da bida agam mamida i muarutsa dzi, da wamuaruts gum bini dzi nangan igi angu. I sanab bida nigi da agam bungꞌ au uwayant dzidziwandan da nasruꞌ gin nabi Ramangꞌ impa dzi wasaꞌ da dzi mpa Ramangꞌ wasaꞌ.”39Da ribigi itip yintsaꞌ i mpunga Arangan, da bitsintaꞌ Arangan irunt sinungꞌ ribigi da ifa gan arun.40Da Yisu yis mpui Yordan udziꞌ ifa marafain aru Yowanis ruruba garamin ugu da ifampa nigi.41Da garam ampi bingan ifan da Arangan i nigi da ini binaꞌ, “Yowanis anungꞌ inang nam maran mangan u. Da bitsintaꞌ nan santan Yowanis nida i garam ani nan nidzun bingan.”42Da mingꞌa nigi da garam ampi bingan imuaruts Yisu.