Read Gwa 1

Gwa1pib_wbt

Tokanchi

¹Yinuwakikolu wane rawa Tokanchi. Ga wa Tokanchi Goyakaluymananru. Ga wa Tokanchinwa Goyakalu.²Yinuwakikolu Tyenwa Goyakaluyma.³Ptowrunanuka kamrutka Waleya. Wale mwaknu gikenna kamrutka wa gwachritka.⁴Wale rawa giweklu. Ga wa giweklunwa yine pokamlatyegitachri.⁵Pokamlalu mapshagawaka pokamlatachri. Wa mapshagawaka gi gakagloklu.

Gwa gipgujtatlu pokamlalu

⁶Waneru satu jeji Goyakalu yokanatanru. Gwa giwakatletachri.⁷Wale gina rupgujtalewatinripa, rupgujtatyaplu pokamlalu, ralixinripna pejnuruneko wale chinanu.⁸Gi wa pokamlalni wale, seyni runa rupgujtatyaplu pokamlalu.

Pokamlalu galikakpotunanu

⁹Tokanchinwa pokamlalu galikakpotunanu. Wa pejnuruko yineru pokamlatachri tye psolchijneko gapokachri.¹⁰Tyechijne rawanata. Tye psolchijneko kamrutka Waleya. Tyechijne gajene gi gimatlu.¹¹Walenu runyegita Wale. Ga wa Walenune gi wa yoptotluna.¹²Seyni pejnuruneko yoptotjene Wale gitakna Goyakalu wgenene rixinripna, wa ralixgiwakatjene.¹³Wanna gi wa granchiko wugenetikna, gi wa manchi galukyawaka, gi wa jeji galukyawakako, seyni Goyakaluya wugenetikna.

Tokanchiko manewata

¹⁴Tokanchiko manewata. Wixatskala rawanatapa. Wetlu royaknu. Girchi satupjerutu Gituru goyaknu waneylu. Kgimutlewaklerpotni. Galikakpotni.¹⁵Gwa gipgujtatlu. Wane china sapleta, “Tyenwa nchinjenatanru, ‘Najxigi ginachripa, muchichachri gitaya, gi rixanu muchinanu gwachrini gitaya.’ ”¹⁶Gi rixanu wane rixle gixoluruya wyoptojeta pejnurunekwu. Ga wa rumutlewle wanepnute rumutlewle potu wyoptota.¹⁷Gi rixanu Moysisiya reneeka Tokanchi Yokanatkaluru. Wa Geso Kristo chinanu rawa gimutlewlu ga wa galikakpotunanu tokanchi.¹⁸Gikena getlu Goyakalu gi pagogneko. Girchistsi gwachri, satupjerutu Gituru, Wale ginkakletlu.

Gwa Katlewakleru gipgujtale

¹⁹Tyenwa Gwa gipgujtale, wa Goteyone yokanatinitkana Gerosaleya sasertotene ga wa Rewinane repomgiyapluna, “¿Giryi pixa?”²⁰Rupgujetnawa Gwa. Gi wa nutatnawa. Rupgujetnawa, “Gi wa Kristono gita.”²¹Repomgaluna, “¿Klunerkoxni? ¿Giliyaklayge pixa?” Wane china, “Gi waleno.” “¿Wa tokanchi geneklewatachrirayge?” Rugita, “Gike. Gi waleno.”²²Giyagni wane chinruna, “¿Gi gixachriyi? wunkakyapna wyokanatjene. ¿Gi pchinnawa pixnanuko?”²³Wane china:“Gitni giplaji yineru mwiyawakanu saplewatyachrino,wane chinachrino:Mpotukatanru Gitsrukaachigapo,wa Gisayiya tokanchi geneklewatachri chinyawaka.”²⁴Wa yokanatkalune, Gwariseyonenu.²⁵Repomgaluna. Wane chinruna, “¿Klu koxa pkatlewatya, wa Kristomigjekyi, gi wa Giliyyi, gi wa tokanchi geneklewatachrikoxyi?”²⁶Gwa gigitna. Wane chinna, “Gita katlewata gonuya. Seyni gixatskala rawa wa gixa mumatanutu.²⁷Walenwa gita gajxigi ginachri. Gi wa gita gimukluni wa nkoshpirokyaplu yoshmaklejixitsa.”²⁸Tyekaka wane gixkaluru Wetawara Pokchi, Gorta wakanute, wa Gwa katlewjetyawaka.

Getanru Gowega Wgene Goyakalunu

²⁹Waleprikgogne Gwa getlu Geso wale yegi yachri. Wane china, “Getanru Gowega Wgene Goyakalunu, tye psolchijneko gajene konmukochiretachri.³⁰Tyenwa nchinjenatanru, satu jeji najxigi ginachripa, Walenwa muchichachri gitaya, gi rixanu muchinanu gwachrini gitaya.³¹Gi numatanatlu. Seyni wa rumatikolupa Gisrayiline yegi, giyagni nuna gita nkatlewatinripa gonuya.”³²Wa Gwa gipgujtalewata. Wane china, “Netlu Giwekikaluru tengogne gijrukyachri. Motkoko pixka rixa Geso gogo gwachri.³³Gi numatanatlu, seyni wa nyokanatjeru gonu nkatlewatinripa, Wale wane chinno, ‘Wa Giwekikaluru peta gijruklegogwakatanru, Wale gogwaka gwachri, Walenwa Giwekikaluru Kpashiri katlewatyachri.’³⁴Gita getlu. Nunkakletlu Tyenwa Goyakalu Wgene.”

Muchichachine Geso yimaklene

³⁵Waleprikgogne rumepe tunwaleta Gwa, ga wa gepi yimaklene.³⁶Rushinga yaletinri Geso, wane china, “Getanru gowega Wgene Goyakalunu.”³⁷Gepi yimaklene yijnako yanumsaletlu. Romkagitatkaluna Geso.³⁸Ruprotaka Geso. Retna rawgajxigitjene. Wane chinna, “¿Klu gijga?” Wa wanna wane chinru, “Rawi (walenwa yokaakaluru, Yimaklewatachri), ¿ginaka pwa?”³⁹Wane chinna Wale, “Ginanu. Getapanru.” Wane yana. Retluna ginakakta rawa. Walgogne rutukna Wale yegi. Kayinwakpapkotkani.⁴⁰Wa gepi Gwa yijnakotachine, romkagitjene, satni Gantirishi Simo Petro gepuru.⁴¹Gantirishi gikshikgapkatlu waleko yegwaklu Simo. Wane chinru, “Wukshikatkalu Mesiya.” Walenwa yokaakaluru Kristo.⁴²Geso yegi raniklu. Geso getlu. Wane china, “Pixni wa Simo, Gona wgene. Pixa giwakatko Sega. (Walenwa yokaakaluru Sotlu.)”

Geso tomgana Wilipi, Natanayli

⁴³Waleprikgogne Kalile raluka yaleta Geso. Rukshiklu Wilipi. Wane chinru, “Pomkagitanno.”⁴⁴Wetsayta Pokchi gajerni Wilipi. Walenwa Gantirishi ga wa Petro pokchi.⁴⁵Wilipi gikshiklu Natanayli. Wane chinru, “Wukshikatkalu Moysisi yonyegitanru Tokanchi Yokanatkaluruya, ga wa tokanchi geneklewatachine koxa yonyegitanru. Gesni, wa Gosi wgene, Nasare Gajeru.”⁴⁶Natanayli wane chinru, “¿Nasarege rumkata giyakletya pagixanu kigleru?” Wilipi wane chinru, “Punanu. Petapanru.”⁴⁷Geso getanataplu Natanayli. Wane chinyegitlu, “Getanru satu galikakotunanu Gisrayili. Walenwa mayrokletu.”⁴⁸Natanayli wane chinru, “¿Ginaka pumatyano?” Geso gigita. Wane chinru, “Wilipi ma tomgakanuwayi, wa gikera rapukote pwanatini, netyi.”⁴⁹Rugita Natanayli. Wane chinru, “Rawi, Pixni Goyakalu Wgenyi. Pixni wa Gisrayiline Pogiryi.”⁵⁰Geso gigitlu. Wane chinru, “Gi rixanu wane nchinyi, ‘Netyi wa gikerampukoya,’ ¿palixge? Tyekaka pnute tsru petanu.”⁵¹Wane chinru, “Galikakni, galikakni wane nchingi, xanikakayakawa getanru tengogne gitpukinri, ga wa Goyakalutowrene gatskomtachine, gijrukamtachine Gita Yineru Wgenno yegi.”

Gwa 1 / pib_wbt