1Sin atiltsoli so, Totore tii se manman tsaa, iwaa Totore tii se manman mii Moroaa ma biaa Totore, ia tsaa Moroaa.2Ia tii manman mii Moroaa sin atiltsoli so.3Sin ia mu, no maarang araraa atsap. Nawe ia nii xap, naba xap xawas naba tsap.4Sin ia mu, tino, ma biaa tino, a tali laleng sin no inaman.5Biaa laleng ina leng atsila lalon lodo o lodo ga xap pupua ngali bibingli laleng.6Iexa taamat ia tii xaalame, Moroaa a tulen, iesan ilaa Jon.7A xaalame malen xa tiltsoxoti ngali papaare leng taman abia laleng ina leng, ngalibi, sin ia mu, no inaman araraa di ba taltaalnge.8Jon tsaa a xap abia laleng, a xaalame mu ngali tiltsoxoti abia laleng.9Biaa laleng so, ta tali laleng sin no inaman araraa, biaa ta se xaalame lalon xolkolmoxo.10Ia tii se manman lalon xolkolmoxo ina inaman, ma Moroaa axosngi abala xolkolmoxo sin ia oro xolkolmoxo tii ga xap nen xilalaa ia.11Tii xaalame sangan xan no inaman tsaa, o di ga xap sirawaa ia.12Oro biaa di araraa, di ta sirawaa ia, biaa di ta taltaalnge sin iesan, a tali abia banam ngali di ba tsap xan no tsi Moroaa.13Oro biaa xan no tsi Moroaa di xap deltsoli sin xadi no iaaiaa, ma a xap sin sirsiir ina pakpak, ma a xap sin sirsiir ina minaxis oro sin xan sirsiir Moroaa.14Totore a se tsap taamat toto, ma ga manman lolobet ina gita, gita se lasi xan minaalam, biaa minaalam ta xuuk mu, iwaa ta xaal sin Mom, auus taman amiimiilam papan amiimiilam ma soina.15Jon a paare leng taman aia Totore. Atol ga paare, â Ilawaa aila iaa tii asaait taman we, â Iwaa naba ta amil papan iaa, a lot buxa ngen iaa, amuina ia setauan ngen iaa.â â â16Amuina sin xan amiimiilam ta us buxa, gita se adi axuuk tubudaan papan iexa.17Moroaa a tali lo sin gita sin Moses; amiimiilam ma soina axaal sin Iesu Karisito.18Asuk xap xa na se lasi Moroaa, oro iwaa xan tsi ta xuuk mu, iwaa Moroaa so, iwaa ta manman mii Mom ma ga se alengi xolkolmoxo ina inaman taman Moroaa.
Jon unaaxaxadaan a xap Karisito
19Balawaa tii xan papaare leng Jon, biaa no Jiu in Jerusalem di tii tulen no unsausawit ma no Liwai ngali tiiriki ia, ia saa.20Tii xap bong, ataxaa puaa ngali paare leng taman balan so we, â Iaa xap Karisito.â21O di ga atsuraa ia, â O saa iu? Iu Elaija?â A paare, â A xap, iaa xap Elaija.â â O iu iwaa propet, Aisaia ta papaatinai?â A xisi, â A xap.â22Xapkap ina, no unsausawit ma no Liwai di atsuraa, â O saa iu? U na asaait alengi giem, ngali laa taal mulangenai xa xixiis sin abia di, di ta tulen giem. O iu saa so?â23Jon ga xisi di sin xan totore Aisaia iwaa propet, â Iaa inan aia xa ta ililei lalon xobel biil, â Xosor atutiki xan sal Orong.â â â 1:23 Ais 40:324No Jiu bula di tii tulen biexaa Paarasi mii di,25di tiiriki ia, â Ngalisa iu ta axaxadaan nawe u xap Karisito, o Elaija o xa propet?â26Jon ga xisi di, â Iaa axaxadaan taman daan, oro labatina gim, axuuk xa ia ta tiltil gim ta xap atii.27Iwaa mu xa ta amil papan iaa, iaa xap muun mamainaang buxa ngali lubati xan no bubut.â28Balawaa no araraa atsap lalon xolot Betani, xaatalaa ina daansel Jodan, biaa Jon tii lo axaxadaan tia.
Iesu xan Tsi Sipsip Moroaa
29Leng papan, Jon a lasi Iesu ta xaalame sangan o ga paare, â Gim lasi, xan Tsi Sipsip Moroaa iwaa ta xaa saali namaang tsaxa ina xolkolmoxo ina no inaman.30Ilawaa taamat iaa ta papaatinai, â Iexa taamat ia naba ta amil papan iaa, a lot buxa ngen iaa, amuina tii setauan manman ngen iaa.â31Iaa tsaa iaa tii xap atii ia, oro muina iaa ta xaalame ngali xosaraa axaxadaan taman daan, ngali ia naba tsap lengleng sin no inaman in Israel.â32O mil Jon ga tali abala xan papaare leng ta we, â Iaa lasi Nantanua ta xaalame lapula, axaal balalangit malen buna, ga tsotso papan.33Iaa nii xap atii ia, oro iwaa xa ta tulen iaa ngali xosaraa axaxadaan taman daan a asaaiti iaa, â Iwaa taamat gim tii lasi Nantanua tii xaalame lapula ga tsotso papan, iwaa mu aia naba xosaraa axaxadaan taman Nantanua Pat.â34Iaa se lasi, ma iaa ga papaare leng weaatalaa, ilawaa xan Tsi Moroaa.â
Nanaaxuuk ina xan no tsi asasing Iesu
35Leng papan Jon a sebula le tiltil tia mii xan no tsi asasing alua.36Biaa tii lasi Iesu ta es liu ga we, â Gulu lasi, xan Tsi Sipsip Moroaa.â37Biaa delu ta alongen ta paare weaatalaa, delu suk amusili Iesu.38Iesu a putsi ma lasi delulu ta amusili ia, o ga atsuraa delu, â Gulu saan ngali sa?â Delu ga xisi weaatalaa, â Rabai (muina unaasasing) itaa u manman?â39A xisi, â Gulu xaalame ma gulu na le lasi.â Delu laa mii, ma delu ga lasi itaa ta xaa manman, ma delu ga manman mii sin abia leng araraa. Amat malen nanaaet ina aua nale.40Endru, iwaa turamasen Saimon Pita, tii xa ina abia delulu, delu tii alongen sawe Jon tii paare taman ma delu ga amusili Iesu.41Nanaaxuuk ina maarang, Endru a tsalei turamasen, ilaa Saimon, ma ga asaaiti weaatalaa, â Gelulu se tatanginai Mesaiaâ (muina abala, Karisito, iwaa Moroaa ta se xanei).42Ma ga giwaa ia laa sangan Iesu. Iesu a lasi ma ga asaaiti weaatalaa, â Iu Saimon, xan tsi Jon. Iaa ba a tso iesani iu taman Sepasâ (muina Pita).
Iesu a ilei Pilip ma Natanael
43Leng papan, Iesu adodo ngali laa Galili. A laa tatanginai Pilip, ma ga asaaiti, â Xaalame, amusili iaa.â44Pilip ia ina inaman laba Betasaida, malen mu Endru ma Pita.45Pilip a laa tatanginai Natanael, ma ga asaaiti weaatalaa, â Giem se tatanginai iwaa taamat Moses tii asaait taman lalon buk lo, ma no propet bula di tii asaait taman. Iwaa taamat iesan ilaa Iesu, ia in Nasaret, xan tsi Josep.â46Natanael atsura, â Nasaret! A pupua ngali xawas axaau naba xaal Nasaret?â Pilip a xisi, â Xaalame u na le lasi!â47Biaa Iesu ta lasi Natanael ta xaalame ga asaait taman, â Taan Israel so aila! A xap xa daraxe sin.â48Natanael ga atsuraa Iesu, â U atii iaa sen parawe?â Iesu a xisi ga we, â Iaa tii setauan lasi iu, sin Pilip tii xap mager ilei iu. U tii manman paina ie fik.â49Natanael ga paare leng, â Rabai, iu xan tsi Moroaa, ma iu xadi King no Israel.â50Ma Iesu ga paare, â U taltaalnge, amuina iaa ta asaaiti iu we, â Iaa setauan lasi iu paina ie fik.â Mil, U ba lasi no maarang ta lot buxa ngen abala!51Iaa asaaiti gim taman so, gim ba lasi balalangit naba tsalel, ma xan no angelo Moroaa di ba xaxaale lapalaa ma di ba xaxaalame lapula papan xan Tsi Taamat.â