Read John Iesu da bino dave John mi gagurisina. 1

John Iesu da bino dave John mi gagurisina.1bhg_wbt

Tuturobéda awa Ge isinesina.

¹Tuturobéda awa Ge isinesina, edo Ge ae God de daedo isinesina, edo Ge awa God.²Imo awa tuturobéda God de daedo isinesina.³Edo Ge einda toda God mi rorae berari esisina. Edo rorae berari God mi esisina isira awa, ainda toda akuta ami esisina.⁴Edo Ge awa wasiri tutu, edo wasiri awa embomai berarida parara.⁵Edo parara muyaeda doda datembedo eira, edo muyaemi ari awa akeimbari tao ae.

God mi John Bapataito Ari Embo piesiri gupusina awa embomaida yai Parara karigarate.

⁶Embo da (1) isinesina, edo ainda dao awa John. Embo awa God mi piesiri gupusina.⁷Imo gupusina awa, embomai berarida yai Parara karigain. Ango ari embomai berari Pararada bino ingido gebé orote.⁸Edo John imo akuta awa Parara ae, ata imo gupusina awa Parara awa embomaida yai arapa tari gorote.⁹Awawa Pararabé ami butuda gupeite embomai berarida yai parara piedo eira.¹⁰Imo awa butuda isima edo esisina, edo God mi ainda toda butu awa esisina, awarata embomai butuda ami imo gae arapa ae.¹¹Edo imo awa ainda butu topoda gupusina ata ainda embomaibé ami imo ajiregesitera.¹²Ata berari ainmi imo bera edo awamaneda gebé ari ainda daoda pietera, inemi awara tari awamanede piesira awa, awamane God da mamai ara.¹³Edo God da mamai awa ewowoda edo gumbari ae, ko tamopisida engari ae, ko iuda jipapa ango ae, ata God mi akuta awamane ainda mamai esira.

Ge awa embo tamopiside esisina.

¹⁴Ge awa embo tamopiside esisina, edo natokare toropuda daedo isima edo esisina. Nanekaremi embo awa matawa jisimi gositera. Edo ine ainda dave ari iji berari natokare yai arapa edo esisina edo iji berari God da gebé namondekare tedo esisina. Awa ainda taogari. Aindabé imo awa God da Mai dakaima, taogari awa ainda Mamo da yai edo natokare yai gupusina.¹⁵Edo John mi embo ainda daoda ge karigesite aorogatedo sisina, “Embo evire, na ainda daoda ge eiwa tedo etena, ‘Embo ainmi nato amboda gupeira awa na daginegari, aindabé na engae gisida imo isinesina.’”¹⁶Edo ainda dave ari bajinabé bajinada edo ami kaena beraride kando pieuri budo etera, nei budo douri nei da (1) budo era.¹⁷Gebé, God mi Moses da toda Aodaripipisisina, ata Iesu Keriso da toda awa ainda dave ari ae gebé de kaenato yai piesiri gupusina.¹⁸Iji tuturobéda edo gundo iji boroko einde embo da ain jisimi God gae. Maidakaimami akuta, imo Mamo da demonda isima edo eira, ami Mamo averi awa kaenamonde tesiri gositera.

John Bapataito Ari Embo Iesu da begata sirigesisina.

¹⁹Edo ge amboda gumaina eiwa awa John da ge Iesu da daoda ami karigesisina, iji ainde Jew embomaiJerusalem ainda ami, “Imo averi?” awa tedogorote pirisi mane ae Levi da ewowo manede pietero John da yai maunsitera.²⁰Edo John ge arapada karigesisina, edo ge onjigae, ata arapada karigesisina, “Na awa Kerisoae.”²¹Ango tesiri gido awamanemi tedogositera, “Awatedo imo averi? Imo Elijahra?” John mi sisina, “Na awa ae.” Awamanemi tekago sitera, “Imo Perovetara?” Ami mina sisina, “Ae.”²²Edo awamanemi ainde sitera, “Imo averi? Nakare teyo gido overegedo maundo embo nakare pietero gumbera awamane taro gore. Imo akuta awa nongo tain esi?”²³Edo John mina sisina: “Dá ango peroveta Isaiah mi sisina, na awa ‘embo abu damodamoda aorogateira: “Badarida begata sirigewo dambu darare.” ’ ”²⁴Edo Parasi manemi embobo awa John da yai pietero maunsitera.²⁵Edo embobo ami embo ainde tedogositera, “Edo imo Keriso ae, ko Elijah ae, ko Peroveta ae, ro awaembo imo embomai bapataito edo esi?”²⁶Edo John mi awamanede mina sisina, “Na un mi embomai bapataito edo ena, ata itomane toropuda embo da (1) petari isira imomane gae.²⁷Embo ami nato amboda gupeira awa na bé daginegari. Nane inono atembedo ainda tai woru teugari tao ae.”²⁸Buro berari eiwa Betabara nasida un Jodani kupo neida idegesisina. John yai ainda isite embomai bapataito edo esisina.

Iesu awa God da Wo Sipu Mai.

²⁹Edo deguta neide, John mi Iesu imo kena gupeiri gido sisina, “Ovire giwo, God da Wo Sipu Mai! Omi embomai butu berarida jimbo bebegae awa kotembedo dodo itae ain gupeira!³⁰Embo evire, nane ainda daoda ge eiwa tedo etena, ‘Embo ainmi nato amboda gupeira awa na daginegari, aindabé na engae gisida imo isinesina.’³¹Edo imo embo averi na gae. Ata na un mi bapataito eite gumena, Israel embomaida yai embo awa arapa ari gorote.”³²Edo John mi ge eiwa karigedo sisina, “Na Asisi ni ribo ango utuda edo wowosiri gena, edo embo da (1) tamonda wotedo isira.³³Na imo embo averi awa gae, ata God mi na piesiri guputena un mi Bapataito anate ami sisina awa, ‘Embo ainda yai Asisi wowosite ainda tamonda isiari gata, eiwa awa embore ami Asisi Kotopu mi embomai bapataito edo aina.’³⁴Edo na awa jisimi gari edo karigetena, eiwawa God da Mai.”

Iji tuturoda Iesu ainda ambodani engo tapusina.

³⁵Edo tekago deguta neide, John ae ainda ambodani tote (2)de yai ainda petedo itero,³⁶Iesu ainto edo daginegeteiri John mi embo awa gido sisina, “Ovire giwo, God da Wo Sipu Mai!”³⁷Edo ambodani tote (2) ainda ge ingido Iesu ambo ambo esitera.³⁸Edo Iesu wareregedo awamane gido imo ambo ambo edo gupero sisina, “Imomane ro gain evi?” Awamanemi ainde sitera, “Rabbi” (Ainda moka awa ‘Atopatari’.), “imo nonda isima edo esi?”³⁹Embo ami awamanede sisina, “Puwo gave.” Ango tesiri awamane gundo imo isima edo eira yai awa gositera, edo awa ora 10ango eiri deguta ainde imonde daedo itero jijirisina.⁴⁰Embo tote (2) John ge siri ingido Iesu ambo ambo esitera, awamaneda da (1) awa Andrew. Edo imo awa Simon Peter da nameji.⁴¹Andrew mi gisibé ainda nameji Simon tamundo ainde sisina, “Nakare Messiahtambera” (awa Keriso).⁴²Edo Andrew embo awa kundo Iesu da yai maunsisina. Edo iji ainde Iesu embo awa gido ami sisina, “Imo awa Simon, Jonah da mai. Ito dao Cephastedo ara.” (Ainda moka awa Ganuma.)

Iesu mi Philip ae Nathanael de dao sisina.

⁴³Ango edo deguta neide Iesu yai Galili mamain jipapa esisina. Edo Philip tamundo embo ainde sisina, “Na ambo ambo eyo.”⁴⁴Edo Philip awa nasi bajina Besaida embo. Edo nasi dá awa Andrew ae Peter deda nasi.⁴⁵Philip mi Nathanael tamundo embo ainde sisina, “Nakare embo eiwa Moses mi Aodarida gagurisina edo daedo peroveta manemi gaguritera awa tambera—Iesu Nasaret Embo, Joseph da mai.”⁴⁶Edo Nathanael mi ainde sisina, “Nasaret! Rorae dave da (1) nasi ainda edo gumbari tao rita?” Philip mi embo ainde sisina, “Puyo gate.”⁴⁷Iesu mi Nathanael imo kena gupeiri gido ainda daoda sisina, “Giwo, Israel embobé awa evire. Ainda yai ge pitawa tari itaeǃ”⁴⁸Nathanael mi ainde sisina, “Imo na nongo edo bé gotesi?” Iesu mi embo ainde mina sisina, “Philip imo dao tae gisida, ni dunga tutuda iteto na imo gena.”⁴⁹Nathanael mi ainde mina sisina, “Atopatari, imo awa God da Maiǃ Imo awa Israel embomaida Daotariǃ”⁵⁰Iesu mi embo ainde mina sisina, “Aindabé nane imonde tetena, ‘Imo ni dunga tutuda iteto gena,’ awatedo imo gebé esita? Imo wasiri babain eiwa daginegari awa gata.”⁵¹Edo Iesu mi embo ainde sisina, “Eiwa awa gebé bajina imondemane tena. Iji boroko einde edo amboda, utu pirigari God da anelamane visido wotedo Embo da Maitamonda eiaro gawa.”

John Iesu da bino dave John mi gagurisina. 1 / bhg_wbt