Keremiyaxi8hch_wb2

1»Yawé mɨpaɨ kanaineni: “'Iya tukaritsie te'aitamete wa'umete pɨwatixɨriyani meta Kura kiekatari wahetsiemieme memanuyetekai, meta mawari wewiwamete meta Kakaɨyari niukametemama, metatsiere Kerutsareme kiekatari wa'umete.2Tau hɨxie tiheitɨ kanayeimɨkɨ meta metseri hɨxie, meta yunaime xurawetsixi muyuawitsie miemete wahɨxie, mɨkɨ muyuawitsie miemete memɨwanaki'eriekai, memɨwarayexeiyakai memuwaruweiyakai meta memɨwarahɨawekai. Wa'umete pɨkaku'ɨiyani meta pɨkakateukieni, kwitarai hepaɨ kwiepa puyuhayewa.3Naitsarie kwiepa hakewa nemɨwareutanɨ'axɨa memutawikwei 'ikɨ nuiwaritsie miemete 'axamemɨte'u'iyari, kemɨ'ane memuyuhayewa memɨkwinikɨ mepuyuwaɨriyani matsi memayeyuyurinikɨ pɨkatixaɨ. Mɨpaɨ kanaineni Yawé Naimekɨmɨtɨrɨkaɨye”.

'Axamɨti'ane meta 'uximatɨarika

4»Peru 'ekɨ mɨpaɨ ketiniwarayehɨtɨa ne Yawé mɨpaɨ nemainekɨ:»“Kepauka teɨteri memekaxɨrɨwe,¿kamɨtsɨ mekate'anuku'uwe?Kepauka xewitɨ yuhuyeta 'umietɨ meuyeweni,¿kamɨtsɨ karanuani yuhuyeta?5¿Titayari kamɨtsɨ 'ikɨ teɨteri humete'uyunixɨ?¿Titayari Kerutsareme 'uyupataka katiyuwaɨriya munuanikɨ tawari?'Itarika mepɨkataunie,meta mepɨkayuwaɨriya nehetsɨa memɨ'axɨanikɨ.6Kwi yemekɨ nepu'enaxɨ,nemi'enienikɨ tsikere xeime heitserie tikuxatame,peru xewitɨ pɨkatihayewawe ke'axamɨtiuyuri,xewitɨ tɨma pɨka'ixeɨmate kename 'axatiyuriene.Yunaitɨ yamepɨteyurie kemɨtiwanake,kawayutsixi memɨkayuwiyanɨa wahepaɨ kepauka memɨyutakwinitsie.7Wikixitɨtɨ muyuawitsie memu'uwamepɨtemate xeiwiyaritsie watukari kemɨraye'axe,Kukuru meuyɨwi meta 'itsitame meta wauraimepɨtemate kepauka xaɨtsie pɨta memɨyehu.Peru neteɨterima mepɨka'imateYawé 'aitsikateya.
8»”Mepɨka'uyukatetewiya mɨpaɨ meputiyuane:‘Tepɨtemaiwawe, Yawé 'inɨari niukiyari 'ipaɨ paine’,matsi te'utɨwamete wa'anɨyɨkɨ katini'utɨani.9Memɨtemaiwawe mepɨtewiyarikatsitɨarieni,mepɨtiwiyarieni mepɨteka'eniexɨani.Xɨka me'iku'eirieni Yawé niukieya,¿ketitakɨ metemaiwawetɨ metehakɨne?10'Ayumieme wa'ɨitama hipame 'ukitsi nepɨwayetuirieni,meta wakwie hipame pɨta nepɨwayetuirieni.Karikɨ 'etsimeyumatetɨ meta 'ameyumatetɨ,yunaitɨ mepɨtehiwe'erie mɨkatiwapiini,Kakaɨyari niukametemama meta mawari wewiwamete,yunaitɨ mekateni'itawani.11Neniwe 'uka witsimɨti'ɨimari mepi'uayema herie miemekɨ xeikɨa,meta mɨpaɨ mepɨte'ikɨhɨawe: ‘Kayuwatɨ puma, kayuwatɨ puma’,'aixɨtsɨ kayuwatɨ mɨka'umatsie.12¿Kamɨtsɨ mete'uyutitetewiyaxɨkemɨtixani'eriwakɨ yamete'uyurieka?Hawaikɨ, tixaɨtɨkɨ mepɨkateyutitetewiyawawe,mepɨka'imate paitɨ tita mɨtitewiyarika.'Ayumieme, mepatixɨrieni kemɨ'ane mematixɨriyani wahamatɨa,kepauka 'uximatɨarika wahetsie nemɨkawiwieni—Yawé mɨpaɨ kanaineni—.
13»Yawé mɨpaɨ kanaineni:“Kepauka kaxie nemeu'inɨimɨkɨtixaɨtɨ nepɨkatiukaxexeiya,meta piní hetsie 'ikwaxi pɨkaheukatei,xawariyari pɨyɨyɨna.Kamɨtsɨ, hikɨ ne nepɨtixenawairienitita nemɨtixeyetuiri”».
14«¿Keteteyurie 'ena tetitetɨ?Hikɨmɨtɨka, teyunaitɨ kiekari kuraruyari 'amatitetewatsie tepɨyehumana temekwinikɨ.Yawé takakaɨyari pɨtatsikwine.Haa pɨtatsi'uharitɨa 'uayemakame,'axatemɨte'uyurikɨ hepaɨtsitana.15Tepɨta'ikwewakai kayuwatɨ temu'uwanikɨ,peru 'aixɨa ti'anetɨ pɨkatinua.Tekatekukuyetɨ temu'uwanikɨ tepɨta'ikwewakai,peru matsi pɨta punua marika.16Rani kiekariyaritsie pa'eniɨriɨkɨkawayutsixi wapuxerikayari,meta kepauka memetitsuana,naitɨ kwie puwatayuane.'Ikɨ kwieyari meka'unake 'umekanahuni,meta naime tita mana mɨtixuawe,kiekari meta mana kiekatari».
17«Xekeneunenieri. Kuuterixi xehetsɨa nepɨwareutaxɨrɨwakuuterixi memɨmɨya memɨxetikeni,meta mɨkɨ wahepaɨtsita tiuyemaitɨ xewitɨ pumawe»,Yawé mɨpaɨ kanaineni.
18Nekukuiniriya pɨkayunɨtɨarinɨa,ne'iyari pɨmɨxime.19Neteɨterima waniwe 'uka hiwarieya pa'eniɨriɨkɨ'ikɨ kwieyari manuye'atɨkatsie paitɨ:«¿Tamɨ Yawé Tsiyuni katitikie?¿Tamɨ mana kati'aita?»«Yukakaɨyarixikɨ memɨnetsi'uyehaxɨatɨakɨ,kakaɨyarixi tixaɨtɨ memɨkateyunaki'erie meta memɨkawamatekɨ».
20«'Itsanari kananutiyani, witari kananuyeyani,peru tame 'akuxi tepɨkatawikweitsitɨariewawe».
21Neteɨterima waniwe 'uka mɨtiukwinitɨariekɨ neta nepɨtiukakukuine,nepɨnehiwerie, netari nepeuma.22¿Kamɨtsɨ Karaha tiumaweri waritsamu?¿Kamɨtsɨ manari tiumawe tiyu'uayemawame?¿Titayari neteɨterima 'aixɨamekateka'eriwawe?
expand_more
Search