Keremiyaxi6hch_wb2

Kerutsareme 'imatɨrieka kemɨrayemari'itɨarie

1»Xekenayekɨni Kerutsareme kiekariyaritsie Wenikamini xiɨyarimama.'Awa xekenetahɨtsi Tekuha paitɨ.'Inɨari xekenanuyewi Weti-Hakereni paitɨ.'Uximatɨarika mepɨtatsiwewirieni meta mepɨtatsika'una,kuyaxi meyumɨiretɨ metɨrɨkaɨyetɨ tayeta 'amepayehu.2Tsiyuni nekanika'unarɨmeni,witsimɨti'ɨimari meta mukweriwa'ane.3Tehɨwemete meta yumuxatsima mewara'arietɨ mepɨ'axɨani hetsɨana:'auriena mepayaxetɨkɨne,yuxexuitɨ mepenayexeiyaxɨani hakewa wamuxatsima memɨtehetikwa'anikɨ».
4«Xekeneuyukuha'aritɨa mɨkɨ temɨtamienikɨ.Tekanitamiekuni tuka haye'ayu.Peru, xɨa'ui tame, tukarikɨ pɨkareuteremeta 'etɨriya 'apɨtewi tɨkarikɨ mieme.5Hikɨmɨtɨka, tɨkarikɨ tepɨwatakwini,titatsie memɨteyukɨtɨrɨkariya tepɨwaka'unierieni».6Mɨpaɨ kanaineni Yawé Naimekɨmɨtɨrɨkaɨye:«Kɨyexi xekeneutiwitekixekeneutawewi makeme Kerutsareme xemeutahaxɨanikɨ.'Ikɨ kiekari peuyewetse mɨtikwinitɨarienikɨ,mana nanaimarika xeikɨa muxuawekɨ.7Putsuta haa kemɨrewatineika,mɨpaɨta 'axamɨti'ane Kerutsareme pɨtiuhane.Hetsiena nanaimarika xeikɨa pɨrayu'eniɨriɨkɨ meta 'imieri,mana kwiniya xeikɨa nepɨxeiya meta teɨteri mewitekietɨkaime.8Keneu'apata, Kerutsareme,nemɨkamatsi'uku'e'eiriwanikɨ.Xɨka mɨpaɨ peka'ɨyɨni, makumawe nepɨmatsihayeitɨani,xewitɨ mɨka'anuyeika».9Yawé mɨpaɨ kanaineni Naimekɨmɨtɨrɨkaɨye:«Xekeniwarutiwawa 'ixaheritsixi memuyuhayewaxɨ.'Aixɨa xeketeniwaruwawa, kaxie 'imatɨrieka mieme xemɨwautɨweni hepaɨ,mamateyatsie tawarita xekeneukaxeiya,kaxie 'inɨweme mɨtiuka'iyari hepaɨ».
10¿Kemɨ'ane nepɨtahɨawe?¿Kemɨ'ane nepayemari'itɨani?¿Kemɨ'ane pɨnetsi'enieni?Yunakata mepeukanatɨkamepɨkaheti'enatɨkɨka.Yawé niukieya 'axamepɨte'enie,mepixani'erie memi'enienikɨ.11Peru ne Yawé haxɨayakɨ nepɨhɨne,meta nepɨka'inewieri.«'Ahaxɨa tɨɨri kaye 'utuma memɨye'uwa wahetsie keneukawiwi,metatsiere temari wahetsie,karikɨ mekanitiwiyariekuni memɨneneɨke meta memɨwikie,'ukirawetsixi meta kwinimieme memɨte'ukirawetsixi».12Yawé mɨpaɨ kanaineni:«Wakiite, wakwie meta wa'ɨitamahipame wahetsiemieme katinayeimɨkɨ,karikɨ ne netɨrɨkariya nekananunɨ'amɨkɨ'ikɨ kwieyaritsie kiekatari wehetsiemieme.
13»'Etsimemɨyumate meta memu'ukirawetsixi,yunaitɨ mepɨtehiwe'erie tita mɨkatiheitseriekɨ memɨte'iwanikɨ.Kakaɨyari niukametemama meta mawari wewiwamete,yunaitɨ mepɨte'itawa.14Neteɨterima mepɨwa'uayema herie miemekɨ xeikɨa,meta mɨpaɨ mepɨtewarahɨawe: “Kayuwatɨ puma, kayuwatɨ puma”,'aixɨtsɨ kayuwatɨ mɨka'umatsie.15¿Kamɨtsɨ mete'uyutitetewiyaxɨkemɨtixani'eriwakɨ yamete'uyurieka?Hawaikɨ, tixaɨtɨkɨ mepɨkateyutitetewiyawawe,mepɨka'imate paitɨ tita mɨtitewiyarika.'Ayumieme, tsepari kemɨ'ane memɨwarutakwi,kepauka 'uximatɨarika wahetsie nemɨkawiwieni, nepɨwaka'una»,Yawé kanaineni.16Yawé mɨpaɨ kanaineni:«Huyeta xekenewa'uti hikɨ xekeneutanierixɨa,xekeneuta'iwau huye meripai mieme hepaɨtsita.Xekeneuta'iwau huye 'aixɨa mɨ'ane hepaɨtsita,hikɨ mɨkɨ xepɨka'uku'e'eiriwani.Mɨpaɨ xepɨte'ikaxeiya 'uxipiya xemuku'eriwa.Peru mɨkɨ mɨpaɨ mekaniutiyuani:“Hawaikɨ tepɨka'enukuweiya”.17Ne kuyaxi tehɨwemete nepuwaru'uitua xehetsiemieme, hikɨ mɨpaɨ neputayɨ:“Xekeneta'enanaka 'awa petayuani”.Mɨkɨ mɨpaɨ mekaniutiyuani:“Tame tepɨkata'enanaka”.18'Ayumieme, nuiwarite xekeneu'enana.Xepɨtehetimani tita neteɨterima wahetsie mɨtinuani.19Neuxei, kwiepa xemɨtama naitsarie xekeneu'enana:'Ikɨ teɨteri wahetsie 'uximatɨarika nepɨ'atɨani,ke'axamemɨteyɨkɨhɨawekaikɨ xeikɨa,neniuki memɨka'u'enikɨ,matsi ne'ɨkitɨarika mepehɨa.20¿Titakɨ nereiyehɨwa 'ikɨ 'ɨkwa Tsawa manetɨarie,meta 'ikɨ 'uwá makaka xeime kwieyaritsie 'ateewa paitɨ manetɨarie?Wamawari taiyariyari pɨkanetsinake,wamawarika pɨkanetsinake».21'Ayumieme, Yawé mɨpaɨ kanaineni:«'Ikɨ teɨteri wahuyeta nepɨtiu'uitɨani.Wapaapama meta waniwema 'ukitsi mana mepekaxɨrieni,wa'aurie memɨtitei meta hamikutsixi mepɨkwini».22Yawé mɨpaɨ kanaineni:«Neuxei. Tayeta kuyaxi mepayehu,xewitɨ nuiwari mariwetɨ puyukuha'aritɨwakwie manu'axetsie paitɨ.23Tupi mepu'ɨ meta pitsika,mepayu'eririya meta mepɨkateyukanenimaya.Wahiwari haramara hepaɨ pɨtiyu'eniɨriɨkɨ,meta kawayutsixi wahetsie meputei.Tsiyuni niweya witsipemɨti'ɨimari, 'ahetsɨa mepɨta'erie,meyuha'aritɨatɨ memɨyutakwinikɨ».
24'Ari tepɨtemarie,meta tamamate pɨtiweranare,hiwerika pɨtatsikema,kemɨtiukakukuine niweyame mɨpaɨ tepɨte'uka'eniwa.25'Akanamieni mɨtatsi'aye'unie 'ixipara hakwetɨ.Yeuta xepɨka'ayekɨkani,meta huyeta xepɨkaheu'uwani.Naitsarie marika puxuawe.26Hiwerika kamixayari kenanakatɨki, nekiekari,naxipa keneutikurupi.Hatsiwimekɨ keneutatsuakani,'aniwe mexɨakame hetsiemieme kepemuyɨwe hepaɨ xɨka 'umɨni,karikɨ pɨkatatimaritɨanimɨtatsika'una 'umamie.
27«'Ekɨ Keremiyaxi ne nekiekaritsie nepɨmatsi'anukake,wa'inɨnɨatamekɨ nekamananayexeiya xɨka 'aixɨa 'aneni meta nenieremekɨ,pemɨretimanikɨ metapemitixeiyaxɨanikɨ kememɨte'u'uwa.28Yunaitɨ mɨkɨ te'ayuye'uniekate mepɨhɨkɨ,'axaniukikɨ xeikɨa memuku'uwa,yunaitɨ mɨkɨ wurunitse mepɨhɨkɨ meta tepɨa,'axa'anemekɨ memɨwewiya.29'Eka yɨtɨrɨkariyakɨ tai kananutihɨtsiwani,tepɨa purumu tai pikwaniyawe,peru 'axamemɨte'u'iyari 'aixɨa mepɨkayuyurinɨa,tixaɨtɨ pɨkarayeika tsepa mu'itiya.30'Ayumieme mɨpaɨ mepɨte'uterɨwarɨwa “Pɨrata manuyewiwiya”:Yawé hetsiemieme mekananuyewiwiyani».
expand_more
Search