Yerusalaamey Morken Teqetis
1Hinteno, Biniyaame asaw, hinte shempuwa ashshanaw baqatite! Yerusalaamepe keyite! Taquhe kataman moyze punnite! Beet-Hakareeman malla bessite! Pudeha baggafe iitabaynne gita dhayoy yaana hanees.2Taani lo77iyanne ufaysiya Xiyoone katamata dhaysana.3Henthanchoti banta wudiya ekidi yaa yaana. Iya yuushuwan banta dunkaaniya tokana; issoy issoy ba wudiya heemmana.4“Yerusalaame olanaw giigetite! Dendite! Iya seeta gallas oloos. Shin ayye! Sa7i qammees; omarsa kuyay aduqi aduqi bees.5Hessa gisho, dendite! qamma olidi iya miixaa laalloos” yaagidi maqetoosona.6Ubbaafe Wolqaama Goday haysada yaagees: “Mithata qanxite. Yerusalaame gimbiya miyen biitta doorite. He kataman naaqoy kumida gisho I seeretanaw bessees.7Haatha olli haathe pulteysada ika ba iitatetha pultees. Makallinne dhayoy iya giddon si7etees; iya hargeynne madunthay ta sinthana.8Neno Yerusalaame, ta seera eka. Akay, giiko, ta neepe shaaketananne ne biitta asi bayna baysa kessana” yaagees.9“Woyne poshiliyada, Isra7eele asaa giddofe attidaysata loythidi poshilite. Woyne qoriya asada, hinte kushiya daashshata giddo zaaridi yeddite” yaagees Ubbaafe Wolqaama Goday.10“Ta ooddes odo? Oona seero? Ooni si7anee? Enti si7onna mela enta haythay tullis. Godaa qaalay entaw miichas attis; enti iyan ufaytokona.11Godaa hanqoy tanan kumis. Ta ha sheniya teqanaw danda7ike. Oge bolla de7iya yooga nayta bollanne shiiqida na7atethata bolla ta hanquwa tiga. Machiya, azinaynne cimida asa ubbay attokona.12Taani he biittan de7eyisata bolla ta kushiya yeddiya wode enta keethay, enta goshshaynne enta macheti ubbay haratas imetana” yaagees.13“Guuthafe gita gakanaw ubbay bana go77iyabaa koyees. Nabetinne kahineti ubbay cimmoosona.14Ta asaa maduntha pathonnaba oothidi guutha dhale wothoosona. Saroy baynashin, ‘Saro; saro!’ yaagosona.15Enti ha shaatiya oosuwa oothidi yeellatidona? Akay, enti kumethi yeellatibookona; enti yeelli aybeko erokona. Hessa gisho, entika kundidaysata giddon kundana. Taani enta seeriya wode enta kawushana” yaagees Goday.16Goday haysada yaagees: “Ogiyan eqidi xeellite; beni ogey de7iya bessaa oychite. Lo77o ogey awun de7iyako oychidi iyan hemetite; hinte shempo demmana. Shin hinte, nuuni he ogiyan hemetoko!” yaagideta.17Taani naageysata hinte bolla shuumada, “Moyze girsaa si7ite” yaagas. Shin hinte, “Nu si7oko” yaagideta.18“Hessa gisho, kawotethato, si7ite! Taani ta asaa bolla oothanaba akeekite.19Sa7an de7iya asaw, haysa si7ite! Enti ta qaala si7onna ixida gishonne ta higgiya kadhida gisho ta enta bolla dhayo ehana.20Saaba biittafe ixaani woyko haaho biittafe yida sawoynne qimamey taw aysee? Hinte xuussa yarshoyka eketenna. Hinte yarshoy tana ufaysenna” yaagees.21Hessa gisho, Goday, “Taani ha asaa sinthan dhube wothana; aawatinne nayti entan dhubetana; shoorotinne laggeti dhayana” yaagees.22Goday, “Pudeha bagga biittafe olanchoti yoosona; issi gita kawotethay sa7aa gaxape dendis.23Enti dongenne toora dancidosona; enti qadhey bayna wozana minotanne maarotethi eronnayisata. Enti paran gaallabiya wode abbada guummoosona. Hinteno, Xiyoone katama asaw, enti hintena olanaw salpidosona” yaagees.24Nuuni he odaa si7in, nu kushey argaacis; maccasi iqethi oykeysada nuna metoynne un7i oykis.25Morkey mashsha oykida gishonne yan han dagami de7iya gisho soope keyopite; oge bollaka bentofite.26Dhayseysi qoponna nu bolla yaana gisho, kayo ma7o ma7idi, bido bolla gondoretidi, asi ba issi na7as yeekiya mela ta asaas yeekite.27Goday Ermiyaasako, “Neeni enta ogiya xomoosana melanne paacana mela birata paaciya asada ta nena oothas.28Enti ubbay zigiranaw yuuyosona; odin si7onna makallanchota. Enti naase biratadanne biratada mino; enti ubbay nagara oothosona.29Birata bolla de7iya shi7a xuuggidi geeshshanaw gilpey punnees. Shin geeshshanaw waayida waayey coo gidis; ta asaa giddon de7iya iitati kichibookona.30Goday enta yeggidi aggida gisho, enti yegetida bira geetetana” yaagees.