Jeremías
51
/
cuk_nvs
Babilonia-dulemar sabsur-odurdaklegoed
1
Weyob Bab-Jehová soged:
“Babilonia-yalagi dule-obeloged-burwa an ogoloed,
Caldea-dulemar-angi-yoledimaladgi an burwa barmidoed.
2
Dulemar oros-uka-milegedyob-dulemar-imakedi, Babilonia-dulemargi an barmidagoed.
Adi, Babilonia-dulemar bela sate imakegar.
E-sabsur-odurdaklegoed-ibagi, igar-baid-baidsik egi ainidamaloed.
3
Dule-sigumiedi, melle warsi-yaa-imakega be imakmalo,
degi, melle esgoro-mor-yoega be samalo.
Melle e-sapingana wile be dakmalo,
bela naitinagase e-sorda-bila-onomalad be obelomalo.
4
Babilonia-yalagi burgwar omiledmaloed,
neg-galimbabali e-muimar omiledoed.
5
Israel-dulemar, degi, Judá-dulemala, angi-isgusmar-inigwele, we-yalagi isgued-omelosmar-inigwele,
degite, ani Bab-Jehová-Bela-Gangued-Nikadi, Israel-dulemar-e-Bab-Dummadi, gwen an egi bangussulid.
6
”Babilonia-neggweburgi be wakinmar,
be wala-walagwengi san bendakmar,
melle Babilonia-isguedba be burgwemalo.
7
Babilonia-dulemar an-argan-yaurgine, nog-gobed-orbiidyobi gued.
Bela napaneg-naid-omumsadiid.
Neggwebur-dummagana bela a-vino gobsamalad,
degidbali, neggweburmar suli-suli itodmalad.
8
Degi, ukiagwale, Babilonia-dulemar galakude gusmalad,
degine, bela oitoles gusad.
A-ulale, akigindemalad, ega be ina sedamala, nabir sunna nugualile.
9
” ‘Babilonia-dulemarga anmar ina-nued daksanad,
degi-inigwele, gwen nugussulid.
Anmar mete nasunna,
e-yala-yalase gannar namarsun.
Ar Babilonia-dulemar-e-isguedi bela nibnegse warmaknaid,
degi, bela mogirsega warmaknaid.’
10
”Israel-dulemar soged:
‘Bab-Jehová anmarga igar nudaksad.
Be dagmar,
Sión-yalagine, Bab-Jehová-ibmarmar-imaksadgi anmar sunmakoed.’
11
”¡Sigumar be oswiswimakmar!
¡Sigu-abgamalad be nasikmar!
Bab-Jehová, Babilonia-dulemar-obelogega, Medo-dulemar-e-reymar ogannosad.
We-ibmar-guoedi, Bab-Jehová buged imakegalad,
ar Babilonia-dulemar ese-goled-neg-bibichismalad-ular,
deyob imakoed.
12
Babilonia-galu-matusulidgi-gwichiguega, bander be oyomar.
¡Sordamar be ogannomar!
¡Dule-nakulemalad be urbemar!
¡Dukued-galu be sobmar!
Bab-Jehová ibmar-imakbiedi imakoed,
Babilonia-dulemargi-ibmar-sogsadi, sogedba imakoed.
13
Bemar, Babilonia-dulemar, diwar-dummagan-nagaba be mamaimalad,
ibmar-nuegan-bukidar be nikamalad.
Emide, be-ibagan-bergued warmaknonikid,
be-gudigued wese gwinmaknonikid.
14
Bab-Jehová-Bela-Gangued-Nikad e-sunnad weyob ibmar-imakedse sogsad:
‘Ses-bukibayobi, an be-neggweburgine be-isdarmalad enogoed,
begine obinmaloedbali, binnasuli gormakdemaloed.’
15
”Bab-Jehová, e-ganguedgi, napneg nasiksad,
e-binsaed-nikadbali, napneg ilemaksad,
e-ibmar-wisidbali, nibneg obinnisad.
16
Bab-Dummad binnasur-sunmakedbali, nibneggi diimar-uurmakega imakdaed,
magatibali, mogir-ainakwega imakdaed.
Mala-ibyed-abalagi, dii-owiardaed,
burwa-galumargi, burwa-oniardaed.
17
”Bela dulemar binsaedsulidamaladid, aku-neg-itomaladid.
Bela dulemar-orgi-arbamaladi, e-ibmar-sobedgi bingedar itomalad,
e-ibmar-sobarmaladi, dule-yardakmaladid,
gwen burba-dulad nikasulid.
18
We-ibmarmala, binsaledid, binsa egi dodolegedid,
e-sabsur-odurdakleged-iba-nonikile, bela obelolemaloed.
19
Jacob-e-Bab-Dummaddi, we-ibmar-sobarmaladyobsulid.
Ar Jacob-e-Bab-Dummadi, bela ibmar-saedid,
Bab-Jehová-Bela-Gangued-Nikadye nugad.
A-Bab-Dummad Israel-dulemar, egadiga-guega na susad.”
20
Bab-Jehová soged:
“Babilonia, bemar anga mardoyobi gued,
be angala bila-onogedgi ibmar-ebulegedyob gued.
Bebali, an neggwebur-dummagan bibisged,
degi, dulemar-baid-baid-bukmaladi beba an obelobalid.
21
Bebali, molimar, degi, sorda-moligi-sii-urwemaladi, an obelobalid.
Bebali, ur-napaginmalad-bila-onogedgi-ebulemaladi, degi, e-onanamaladi, an obelobalid.
22
Degi, bebali, machergana, omeganse-bakale, an osulobalid.
Bebali, sergana, sapingana an obelobalid.
An bebali, masmala, yagana, obelobalid.
23
Bebali, sibad-edarbemaladi, degi, e-sibad-wawaadmar an osulobalid.
Bebali, sapurba-arbamaladi, e-moli-bebe-nikamalad-abin-abinnid-napa-imumaladse-bakale, an obelobalid.
De-ukinbali, dummagan-negsemamaid,
degine, dummadga-arbamaladi, bebali an obelobalid.”
24
Bab-Jehová soged: “Babilonia-dulemar Sión-yalagi-ibmar-imaksadba, bemar-wagab an Babilonia-buged-imakoed, bela e-dulemar an buged-imakoed.”
25
Bab-Jehová soged:
“Babilonia, an begi-gwichid,
be emar-obeloged-yalad, bela be napa-obelogedid.
Begine an-surgan an oyodoed,
akwasaila-akale an be-balimetoed,
degi, yala-gummakaledga an be-imakoed.
26
”Ani Bab-Jehová soged:
Be-akwamar, neg-sobega suosurmalad.
Be-akwamar negsailaga-sigega bei suosurmalad.
Ar bela be-yala ollobi naguoed.
27
”Neggweburgi bander be onakmar.
Dulemar-imbagi gar-trompeta be ogormar.
Babilonia-sordamargi-gwichiguega, Ararat-sordamar be urbemar.
Mini-sordamar, degine, Askenaz-sordamar be urbemar.
Bila-onolegedgi sorda-idued-dummad-dule-idugega be amimar.
Sesmar-duurmakmaiyobi, molimar egi duurmakmai be imakmar.
28
Babilonia-neggweburgi-gwisguega, neggweburmar guagwar be urbemar.
Babilonia-sordamargi-gwisguega, Media-yar-e-reymarse be gormar.
Degine, Media-e-dummagan, Media-e-negsemamaid be onmakmar,
degi, Babilonia-neggweburgi gwisguega bela yalamarse be gormar.
29
Napa wawanmaknaid,
bela giglimaknaid.
Bab-Dummadi, Babilonia-dulemargi-ibmar-sogsad imaknaid,
Babilonia-yala nega-dulesulidga, degi, dulemar bar egi bukuosulidga imaknaid.
30
Babilonia-sorda-bila-onomaladi, bila-onoged boggusmalad.
Neg-gandikmaladba dukus bukusmalad.
E-gala-ganguedi, nollomakdemalad,
omeganyobi dobe itodmalad.
E-negmar dule-isganamarse ogumaklesad,
e-yawagak-bargamalad ei bibichismalad.
31
Gayaburba-berbegedi, baid-gayaburba-berbeged-sorbali abarmakmaid,
Babilonia-reyga-sogega: ‘Bela dule-baigan be-ibe neggwebur susye,
32
dule-isdarmaladi, diwar-obaklemamaidgi bukusmarye,
nakuleged-negmar-bukwad ogumaksamarye,
degi, bela sorda-bila-onomaladi gwakidmarye.’ ”
33
Ar Israel-dulemar-e-Bab-Dummad-Jehová-Bela-Gangued-Nikadi weyob soged:
“Babilonia-yalaga odurdakleged-iba omosad,
Babilonia-yala-yeerdaklegedi, orosgisaar-dakleged-welesayobi daklegoed. Bela swanga naguoed.”
34
Jerusalén-dulemar soged:
“Babilonia-rey-Nabucodonosor an-obelosmalad,
suli-suli an-imaksamalad, bate-olloo-mellesiiyobi an-imaksamalad.
Ibdula-dummad-demargined-dule-doeyob an-dosad,
angi-immelesadba, a-sorbali, gannar agsad.”
35
Jerusalén-dulemar sogmalad:
“Babilonia-dulemala igi anmar-wiosa,
deyobi, Babilonia-dulemar gumarmosun.”
Sión-dulemar sogmalad:
“Igi Babilonia-dulemar anmar-ablis eosmala,
deyob e-ablis ei ariomosun.”
36
A-ulale, Bab-Jehová weyob soged:
“Israel-dulemar, be-ibmar-imaksadgi an bemar-bendakoed,
ani an bemarga buged-mai imakoed.
Ani an Babilonia-demar odinguoed,
e-dii-sailagan-ariomamaid ani an dinnaa saoed.
37
Babilonia-neggwebur akwamar-dunnumake-bukwadga gudoed,
achu-sapur-uaya-gannagan-negga gudoed.
Neg-dobed-dummadga gudoed,
egi dodolegega gudoed.
Nega-dulesulidga, gudoed.
38
Babilonia-dulemar bulale achumigur-uurmakebayobi uurmakdemaloed,
achumigur-bipiganabayobi akigindemaloed.”
39
Bab-Jehová soged:
“Neg-diopisur-itoarmalale, ani an ega gobed dakoed.
Wergumalaga an omumsaoed,
suitii gabemai-saegala,
geg atake an imakoed.
40
Igi sibad-wawaad-senigana e-oburgwileged-negse seleddae, debayobi, an sedoed.
Igi sibad-machergana, degi, sibad-wawaad-machergana, e-oburgwileged-negse seleddae, debayobi an sedoed.
41
”¡Be dakena! Babilonia-neggwebur napneg-naidgi-nuga-nika-siidi, igi bergus-sii be dake.
Igi dule-baiganse sabsuli-sules be dake.
Be dake, igi Babilonia-yala, dulemar-baiganga dobed-yalaga-gude be dake.
42
E-isdarmaladi Babiloniaʼgi demaryobi mulusad.
Demar-weleganyobi egi arwisad.
43
Babilonia-neggweburmar bela olloo nagusad.
Nega-dinnaregedyobi-dakle nagusad,
nega-dulesulidyob-dakle nagusad.
Dulemar bar egi bukwasulid,
a-yalagi dulemar gwen bar iirmakbuksulid.
44
Babiloniaʼgine an bab-dummad-Bel sabsuli-odurdakoed.
Ibmar-dosadi gannar agega an imakoed.
Dulemar-baigan bar ese dagosurmalad,
degine, Babilonia-galu-matusulid-akwabiid bela ayaroed.
45
”¡Mimmigan, Babiloniaʼgi be ainimar!
Na be wala-walagwengi Bab-Dummad-urwedgi be san bendakmalo.
46
Neggweburgine, dulemar-sunmakedgi, melle dobgumalo, melle gegegwa be itomalo.
Birga-ilibali gayaburbamar baid-baid ainimai guoed.
Babilonia-yalagi galagwensuli-neg-gued-gaya ainimai guoed,
Dummagan-negsemaladi na muchub-muchub yolenanai gumaloed.
47
Babilonia-bab-dummagan-obelogoed-ibagan bato omosad.
Bela Babilonia-yala bingegunai guoed,
muimarbi yala-enosa naguoed.”
48
Bab-Jehová soged:
“Babilonia-galakuoedga, nibnega, napnega, degi, bela egi ibmarmar-bukwadi, weligwaledba binnasuli namakmaloed.
Ar e-isdarmaladi dad-nakwed-argan-sapiledsiki Babiloniaʼgi danimaloed.
49
”Babilonia-dulemala, Israel-dulemar-oburgwisadbali, oburgwilemarmogargebed.
Degine, bukidar dulemar-baigan-oburgwisbalidbali, Babilonia-dulemar oburgwilemarmogargebed.
50
Israel-dulemar, be es-suidgi-burgwissurmaladi, gwae be wakitemala.
Ar bemar dikasuli be bukwamalale, Bab-Jehová-nug be odummomalo.
Melle Jerusalén-neggwebur be iemarbalo.”
51
Bemar sogmalad:
“Anmargi dulemar isdar-sunmake-itogedba anmar bingedar itoye.
Anmar-mesagwar-imaklegedi anmar-wagar-gisii imakye.
Ar dule-bamaladi bese-goled-negse dogsamalad-ulale, anmar bingedar itoye.”
52
A-ulale, Bab-Jehová soged:
“Ibagan danikid, a-ibagi, an Babilonia-bab-dummagan obelogoed.
Babilonia-yalagine dulemar-naibigumaloedi bukidara akigitemaloed.”
53
Bab-Jehová soged:
“Ar Babilonia amba e-galu-matusulid-akwabiidi nibnegse imakye-sogele, degi, nibali e-bubawarmar ogwisye-sogele,
amba an e-obelogega e-isdarmaladi an egi barmidoed.
54
”Babilonia-yala-akale, binnasuli e-dulemar-sabsurgunaidba-bobukwadi magar itoleged.
55
Bab-Jehová Babilonia-yala bela obelonaid,
dulemar-oimakbukwad bela obelonaid.
Babilonia-e-isdarmaladi demar-mullugan-uurmakmaiyobi,
e-dolewar binnasuli uurmakbukwad.
56
Babilonia-e-isdarmaladi Babilonia-yala-obelogega, egi gwichigudanimalad.
Babilonia-sordamar-bulegan bela galemaloed,
e-sigumala bela ei bibisgelegoed.
Ar Bab-Dummad-Jehová dulemar na e-odurdaklemaloedbali ega ibmar imaked.”
57
Ani an Rey-guedi, Bab-Jehová-Bela-Gangued-Nikadi weyob soged:
“Babilonia-e-dummagan, degi, e-binsaed-ibegan, an omumsaoed.
Ega-negsemamaid, an omumsaoed.
E-sordamar-dummagan, degi, e-sorda-bila-onomaladi an omumsabaloed.
We-dulemar degisadegu gabidmaloed,
bali gannale atakosurmalad.”
58
Bab-Jehová-Bela-Gangued-Nikadi weyob soged:
“Babilonia-galu-matusulid-akwabiid e-mata-dummad, bela nagase babatoed.
Degi, e-yawagak-matusurmaladi ogumaklegoed.
Dulemar binsarsunna alamaksamalad,
degine, binsarsunna gar-itosmalad, unnila sooga alamaksamalad.”
59
Weyobi Bab-Dummad-gayaburba-barsoged-Jeremías, Nerías-machi-Seraíasʼga igar uksad. Deunni, Sedequías birgabakegus-negsemaidgined. Seraías, Judá-rey-Sedequíasʼbo Babiloniaʼse nadmalad. Agine Seraías dulemar-idumai gusad. Seraíasʼde Maasías-wagwad.
60
Jeremías bela Babiloniaʼgi boni-dummagan-danikoedi garda-suid-bipirmakaledgi narmaksagusad. Wegisundo, Babilonia-yalagi ibmarmar-gumaloedi bela narmaklesad.
61
Jeremías, Seraíasʼga weyob sogsad: “Babiloniaʼse be modapile, bela we-gardagi ibmarmar-sognaid be absogo.
62
”Seraías, geb a-sorbali, Bab-Jehováʼga weyob be sogo:
‘Bab-Jehováʼye, bede sogsa gusad:
Ani an bela we-yala obelogoye,
degisadegu ollobi-nai an imakoye.
Dulemar, bipisaale bar urbega an imakosurye,
degine, ibmar-durganse-bakale, dulemarba ambikuosurye.
Bela ibmar-sate guoye, be sogsad.’
63
”Bela be we-garda-suid-bipirmakaled-absosale, egine be akwa edinno. Geb agine Éufrates-diwargine be a-garda metoed.
64
Geb a-sorbali, be weyob sogo: ‘Igi we-garda dii-ulak-dogde, deyobi, Babilonia-yala dogdemogoed, bipisaale bar gannale Bab-Dummad egi bonigan barmidagoedgi san-onogosulid.’ ” Wesega Jeremías-sunmaksadi bergunaid.
Powered by Seed Bible API
expand_more
Search
All books
Old Testament
New Testament
chevron_left
Previous Chapter
Books
search
Search
explore
Discover
share
Share
chevron_right
Next Chapter