Read Zelemii 5

Zelemii5bqc_sim

Gbɛ̃e maao

¹À Yelusalɛũ zɛaↄ kɛɛlɛ à gwa,à wɛɛlɛ a gãaɛↄu à e dↄ̃.Tó yãmaakɛn sĩanwɛɛlɛnae ku we,má sùuukɛ ń wɛ̃́lɛpio.²Baa kɛ́ aaì mɛ Dii ku,ń beeo aaì lɛgbɛ̃ ń mↄafilioɛ.

³Dii, sĩana ↄ̃ ńlɛ wɛɛlɛmáo lò?N ń gbɛ̃́, i ↄ̃máo,n ń kɛ́ búɛbuɛ, ↄ̃ aa gì totoapi mai.An swã́ gbãakũ̀ lán gbɛwa,aa gì nↄ̀sɛlilɛi.⁴Ɔ̃ ma mɛ̀ taasideↄnɛ, aa mi vĩo,aa Dii yãkɛaↄ dↄ̃o,aa dↄ̃ yã́ pↄ́ ń Lua lɛ́ yáńnↄo.⁵Má gɛ́ mà yã'o maezↄ̃ↄↄnɛɛ,aa Dii yãkɛaↄ dↄ̃o lé?Aa dↄ̃ yã́ pↄ́ ń Lua lɛ́ yáńnↄo lé?Kási gbɛ̃́piↄ sↄ̃ aa n zuu bↄ̀ńla,aa n baↄ kɛ̃̀kɛ̃máɛ.⁶Ayãmɛto nↄ̀ↄmusu a bↄ lákpɛu à kusimá,àwalɛwana a bↄ gbáau à ń dɛdɛ.Gbɛaana a naalɛnɛ́ wɛ̃́nkpɛ,i gbɛ̃́ pↄ́ bↄ̀ↄ taitai,asa an tàaeↄ dasikũ̀,an pↄ̀ↄbↄzãkɛa kɛ̀ zài.

⁷Yelusalɛũ, má sùuukɛnnↄe?N gbɛ̃́ↄ pãkpàmaziɛ,aaì yã́si ń tã́aↄɛ, i kɛ mámɛo.Má tò pↄ́ mↄ̀má,ↄ̃ aa sì káalua kpɛ́u aa gbãsĩkɛ̀.⁸Sↄ̃sa kãa pↄ́ an mɛ fɛlɛaↄnɛ,an baade ì lua a gbɛ̃́dee nↄi.⁹Ma Dii ma mɛ̀má ĩadamá yã́pi yã́io lé?Má tↄsi buipi taawao lé?

¹⁰À gɛ ma vɛ̃ɛbu dúuzↄ̃,ãma ásu dɛɛlɛ píio.À a gↄ̃naↄ zↄ̃zↄ̃,asa gↄ̃napiↄá ma pↄ́ no.¹¹Isailiↄ ń Yudaↄ bↄ̀ ma kpɛ.Ma Dii mámɛ má ò.

¹²Aa Dii ɛɛbò aa mɛ̀:Màa no, vãie a wá leo.Wá kↄ̃'e ń zĩo ge ń nↄanaoo.¹³Ãnabiↄ lɛ́ lɛ́'ĩana gbaɛ,Dii yã́ aalɛ oo.Aamɛ aa ń pↄ́ e ńzĩawa we.

¹⁴Ayãmɛto ma Dii Lua Zĩgↄ̃de ma mɛ̀,lá màa gbɛ̃́piↄ ònɛ,má a yã́ sóso kánɛ ń lɛ́u tɛ́ ũɛ,gbɛ̃́piↄ iↄ dɛ yàa pↄ́ tɛ́pi a kũwà ũ.¹⁵Isailiↄ, ma Dii ma mɛ̀má bui pↄ́ kú zã̀zã sóikɛwáɛ,bui pↄ́ kú za zi mɛ́ aↄ ku gↄↄpiiɛ.Bui pↄ́ ili ń yãmaomɛ́ á ń yã'oa dↄ̃o.¹⁶An gbàlaↄ ì ga inɛ́ɛ,ampii gↄ̃sa gbãaↄnɛ.¹⁷Aa pↄ́ pↄ́ á kɛ̀kɛↄ ń á blɛↄ naaa,aai á nɛgↄ̃ɛↄ ń á nɛnↄɛↄ sɛ́lɛ.Aa á zuↄ ń á sãↄ ń á bleↄ naaa,aai á vɛ̃ɛbɛↄ ń á kaadↄɛmbɛↄ sɛ́lɛ.Aa á wɛ̃́lɛ bĩ́ide pↄ́ álɛ a náaikɛↄ dɛ̃ↄnzↄ̃ ń ń zĩkabↄↄ.

¹⁸Ma Dii ma mɛ̀, baa gↄↄ bee má á kɛ kɛ́lɛkɛlɛo.¹⁹Tó wà n la, bↄ́yãi ma Dii ń Lua má kɛ̀inɛ́ màa píii, ní onɛ́, lá aa pãkpàmazi aa zↄblè dii zĩ̀loↄnɛ ńzĩa bùsuu, màa aa zↄble bui zĩ̀loↄnɛ bùsu zĩ̀lou sↄ̃.

²⁰À yã́ɛ bee o Yakↄbu buiↄnɛ,í a kpàwakɛ Yudaↄnɛ à mɛ:²¹Sↄũ nↄ̀sɛsaideↄ, à yãma,á wɛ́ vĩ, ili gu'eo,á swã́ vĩ, ili yãmao.²²I kũ à vĩakɛmɛɛo lé?I kũ à lualua ma aɛo lé?Ma Dii mámɛ málɛ á la.Ma bùsu'ũfãa kàlɛ ísia zↄ̃lɛ ũ,kↄↄ pↄ́ ma dàɛ̀n we,a í a fↄ̃ à a baa vĩ bauo.Baa kɛ́ a í ì zãampapa,ìli fↄ̃ à a baa vĩ̀o.Baa kɛ́ a ikooaↄ ì kↄ̃fĩkɛ,ìli fↄ̃ à a baa vĩ̀o.²³Gbɛ̃́piↄ swã́ gbãa, aa fɛ̀lɛmanↄ,ↄ̃ aa pã̀alɛmɛɛ aa gɛ̃̀zɛa.²⁴Baa kɛ́ mi lou manɛ́ a gↄↄwaza káabuana e à gɛ́ bↄlɛi,mɛ́ ma pↄkɛkɛgↄↄ dìlɛnɛ́,aali okↄ̃ɛ wà vĩakɛ ma Dii ń Luaɛo.²⁵Á vãikɛa mɛ́ kpà pↄ́piↄnɛ,á duuna mɛ́ gìɛ́ à maa e.²⁶Vãikɛnaↄ ku ma gbɛ̃́ↄ guu,aaì ń wɛ lán fíikpanaↄwa,aaì baikpá gbɛ̃́ↄnɛ kɛ́ aa e wà ń kṹ yã́i.²⁷Lá bã ìↄ ka bãwɛna bãkabↄ pai,màa mↄafili ń ua pà,ↄ̃ aaì kɛ ↄdeↄ ũ wà gbãakũ,²⁸aaì kã́, an mɛ iↄ tɛkɛ.An vãikɛa gɛ̃agɛ̃̀,aali yã́si ń nɛtonɛↄ, yã́ e bↄńnↄ nao.Aali zɛ ń pↄesaideↄ aa ń yãnakpàmáo.²⁹Ma Dii ma mɛ̀,má ĩadamá yã́pi yã́io lé?Má tↄsi buipi taawao lé?³⁰Yã́ pↄ́ wa ye a gĩyãiowì vĩakɛɛ̀ kↄ̃̀ ń bùsuu.³¹Ãnabiↄ ì ãnabikɛkɛ ń ɛɛo,sa'onaↄ zĩa yã́ mɛ́ ì dↄaanɛ́.Màa ma gbɛ̃́ↄ yei,ãma kpelewa aa kɛ zã́i?

Zelemii 5 / bqc_sim

Gbɛ̃e maao

Zelemii5bqc_sim