Read Keremiyaxi 49

Keremiyaxi49hch_wb2

Niuki 'Amuni hetsiemieme

¹Yawé mɨpaɨ kanaineni 'amunitsixi wahetsiemieme:«¿Karikuta 'Ixaheri niwemama 'ukitsi mepɨka'u'uwa?¿Piiniteya memɨte'anupinikɨ kari pɨkawarexeiya?¿Titayari kakaɨyari Muruki Kahari kwieyari yupiini rayeitɨa,meta teɨterimamata mɨkɨ kiekariteyaritsie metetitei?»²Yawé mɨpaɨ kanaineni: «Tukari kanaye'amɨkɨ,kepauka ne kuyaxi nemɨwa'atɨani me'utihiwame memɨyutakwinikɨXawaha kiekariyaritsie 'amunitsixi wahetsɨa,kiekarieya 'unitɨ meta ka'akukiepayatɨ kanayeimɨkɨ,meta kiekariteya kanititaiyariemɨkɨ.Hikɨ 'Ixaheri mɨpaɨ mepɨtewanawairieni yukwiemeripaitɨ memunawaiyariekai—Yawé mɨpaɨ kanaineni—.

³»Keneutatsuakani, Hetsiwuni, karikɨ 'Ahi kiekariyari muka'unariekɨ.Xekeneutihiwani Xawaha niwemama 'ukari.Hiwerika kamixayari xekenanakatɨtɨkani, xekeneutitsuanani,kuraru 'amatitewa taɨta paitɨ xekenewanautsatɨweni,Muruki kakaɨyariyari 'ateewa paitɨ kananutɨkiemɨkɨ,yunaitɨ mara'akatemama meta waparewiwamete.⁴'Ekɨ pepuyuta'ɨre 'akwie mayeweri hetsiemieme,'akwie mayeweri 'aixɨa mɨtiuyuruwa hetsiemieme,Neniwe 'uka pemɨnetsi'aye'unie, 'apiinitɨarika mɨraye'atɨkatsie pemɨtiwiya,mɨpaɨ pemutaine: “¿Kemɨ'ane pɨnetsitamieni?”⁵Ne marika nekananunɨ'amɨkɨ 'ahetsiemiemepemɨ'akuweiyanenikɨ naitsarie kwiepa—Yawé Naimekɨmɨtɨrɨkaɨye mɨpaɨ kanaineni —.Yunaitɨ xekanitaweiyariekuni yuxexuitɨ xekanitayeixɨakuni,nixewitɨ pɨkaxekuxeɨrieni xemuyuta'unaxɨani.

⁶»Peru 'arikeketa,'amunitsixi 'aixɨa me'itɨariekame nekaniwarayeitɨamɨkɨ»,mɨpaɨ kanaineni Yawé.

Niuki 'Erumi hetsiemieme

⁷Yawé mɨpaɨ kanaineni Naimekɨmɨtɨrɨkaɨye 'Erumi hetsiemieme:«Kaniumaweniri memɨtemaiwawe Temani kwieyaritsie.Memɨtemaiwawekairi mepɨkatekuxata mete'uyemaitɨ.¿Kamɨtsɨ kemɨtimaiwe tiutsewiximarie?⁸Rerani kiekatari:Xekeneuyuta'una, yu'ɨtɨma xekenehu.Terɨta meutatetewatsie xekeneuyuti'awietaxɨa.'Uximatɨarika nekanipitɨamɨkɨ 'Etsahu hetsie,kanaye'akari tukarieya mɨrakwinitɨarienitsie.⁹Kaxie 'inɨwemete xɨka 'ahetsɨa me'u'axɨani,tsiereta yapaɨmeme kaxie mepɨhayewa.Xɨka tɨkarikɨ tenawayamete 'ahetsɨa me'u'axɨani,tinaime mepɨkatehanutɨni.¹⁰Peru ne naime 'Etsahu nekatininawairiemɨkɨ,meta hakewa meyuti'awiwieta nekanitaxeiyamɨkɨ, muyuti'awieta pɨkayɨwe.Yunaitɨ mekanikwi'iwakuni niwemama, 'iwamama meta yunaitɨ 'auriena kiekatari,mekanikumaweriyariekuni meta mepɨka'u'uwaniri.¹¹Nutuite 'ahetsɨa miemete keniwaruku'eiri,ne watukari nepɨ'ɨwiyani.Meta wiuraxi nehetsie meketewiyani».¹²Yawé mɨpaɨ kanaineni: «Kemɨ'ane wahetsie mɨkarahɨiwa mɨtiukwinitɨarienikɨ tekɨxiyari memanu'i, 'ekɨ matsi 'ahetsie mɨrahɨiwa pepɨkahayewarieni pekatikwinitɨarietɨ. Kaneuyeweka pemɨtikwinitɨarieni, matsita 'ekɨ mɨkɨ tekɨxi pekananu'imɨkɨ».¹³Yawé mɨpaɨ kanaineni: «Ne nekɨmana mɨpaɨ nekatininehɨritɨaka, Wutsira 'axa'itɨaritɨ kanayeimɨkɨ, teɨteri mekanitimamakuni, tewiyarika kanipitɨariemɨkɨ meta kanakumaweriyariemɨkɨ. Yuheyemekɨ naitɨ kiekariteya 'u'unitɨ kaniyuhayewamɨkɨ».¹⁴Yawé niukieya nepu'eni.Xewitɨ tixaxatame nuiwarite mɨpaɨ pɨtiwakɨhɨawe:«Xekeneuyukuxeɨrieka, 'Erumi kiekariyari xekeneutami'a.Xekeneuyukuha'aritɨa xemitamienikɨ».

¹⁵«Kiekari nitixaɨtɨkɨ mɨkatiyunaki'erie nepɨmatsi'ayeitɨani,yunaitɨ teɨteri mepɨmatsixani'erieka.¹⁶'Ekɨ 'aita mukatataritsie pemɨkiekame,meta hɨri 'amanutitɨtɨtsie:pepɨ'akwamanaxɨ hipame pewamariutatɨmeta 'a'iyari 'uyuta'ɨrekaku.Tsepa 'ateewa paitɨ pemɨyuti'itɨatɨa kwixɨ hepaɨ,mana paitɨ nemenanakahɨamɨkɨ—Yawé mɨpaɨ kanaineni—.¹⁷'Erumi, 'umariwekaremekɨ pekanika'unariemɨkɨ,xewitɨ mɨkɨ kiekari 'aurie xɨka 'uyeyani,kanitimamɨkɨ kiekari 'unime xeiyatɨ.¹⁸Tsuruma, Kumuxa meta kiekarite 'auriena mamanetɨkakememɨte'uka'unarie mɨpaɨ pɨtiyɨni,nixewitɨ tawari manatewi pɨkayutakitɨani—Yawé mɨpaɨ kanaineni—.

¹⁹»Kurutani mɨ'ɨtsiyata maye mayeneikamakutsiɨraɨye 'ɨxapa yapauka mɨ'axe hepaɨ,yapauka neniwatimariutamɨkɨ 'erumitsixi,wahetsiemieme xeime nekananayexeiyamɨkɨ.Tawari Kakaɨyari pumawe nehepaɨ 'anetɨ.Xewitɨ mɨnetsita'iwa pɨkayɨwe.Nixewitɨ muxatsi wahɨweme netsi 'aye'unietɨ pɨka'ayeiwe».²⁰'Ayumieme, xekeneu'eni Yawé kemɨtiyurienikɨ yatikuxatatɨ:'Erumi hetsiemieme,xekeneu'eni kemɨtiyurieniTemani kiekatari wahetsiemieme:Waniwema 'etsimemɨtɨtɨ mekananuhapaniekunimuxatsi tɨɨrixi wahepaɨ,'ayumieme makɨ'ɨxaya wahetsie mumiemetɨkai'akumawetɨ kanayeimɨkɨ kaniti'unariemɨkɨ.²¹Kwie kaniutayuani'Erumi matihɨiyatsie,Haramara Mɨxeta hetsie paitɨkanewa'eiyani wahiwari.²²Mɨrayuye'unie kananutiyani mɨtawienikɨmexɨiwa kaniyutamiemɨkɨ kwixɨ hepaɨ,Wutsira kiekariyaritsie yu'anate kanitaweraxɨamɨkɨ.'Iya tukaritsie 'Erumi kiekatari kuyaxi kwinimieme memɨte'ayu'iwa meteniuka'eniwakuni,'uka tiniwerɨmetɨ mɨtiuka'eniwa hepaɨ.

Niuki Ramatsiku hetsiemieme

²³Niuki Ramatsiku hepaɨtsita mieme:«Kamati meta 'Axipari kiekatari waɨkawa mekanimamaka,memɨte'utamarikɨri 'axakemɨtiyɨni hepaɨtsita.Waɨkawamekɨ mekani'iyarixietɨkani,memɨyunɨtɨani mepɨkayɨwawe hamewari kemɨtiuyuane hepaɨ.²⁴Ramatsiku kiekatari mepɨkayumaiwawe,mepuyuta'unakekai, peru marikakɨ mepɨka'uyɨwekaxɨa.Hiwerikakɨ meta kukuiniyakɨ mepɨkayɨwawe memayekɨne,'ukarawetsixi matɨari memɨtiniwexɨaximeni wahepaɨ.²⁵Ramatsiku kiekariyari yunaitɨ 'aixɨa memutiyuane 'ahepaɨtsita meta pemɨnetsitemawieritɨa.¿Ketitayari 'ateɨterima mekameteku'eiriwawe?²⁶'Iya tukaritsie temarikiekaritsie kaye 'utɨma mekaniuheitɨkaikuni,kuyaximama yunaitɨ mekanikwi'iwakuni—mɨpaɨ kanaineni Yawé Naimekɨmɨtɨrɨkaɨye—.²⁷Ramatsiku kuraruyari nekanitaiyamɨkɨ,meta mɨkɨ Weni-'Arari paratsiyuteya kanitixɨtsitɨamɨkɨ».

Niuki Tseraxi meta Katsuxi wahetsiemieme

²⁸Yawé mɨpaɨ kanaineni Tseraxi hetsiemieme meta Katsuxi mɨtiwa'aitɨa wahetsiemieme, Nawukurunutsuxi Wawiruniyatsie ti'aitame muwarutakwikai:«Xekeneuhuni, Tseraxi xekeneutami'a.Xekeniwarutayuniya mɨkɨ teɨteri tau manatineika hepa kiekatari.²⁹Wa'ixuriki kiiyarite meta watewama mepɨtenawaiyarieni,wanawi 'ɨkariyarite, tinaime wapiinite meta wakameyutsixi.Teɨteri mɨpaɨ metenixehiwiekuni:“Naitsarie marika puxuawe”.

³⁰»Xekeneuyuta'unaxɨa, Katsuxi kiekatari.'Ari xekeneuyuta'unaxɨa, xekeneuyuti'awietakwieta 'ameukateewata—Yawé mɨpaɨ kanaineni—.Nawukurunutsuxi, Wawiruniyatsie ti'aitame,katinikuxatani xehetsiemieme kemɨxeyurieni,kanitaxewiriyari xehetsiemieme kemɨtiyurieni.

³¹»Xekenehu, xekeneutami'a mɨkɨ kiekari kayuwatɨ mɨtimatixaɨtɨ 'atsikatiyuriweme muyu'erie,kiekari mɨkareka'itupari meta kɨyexi meuku'uwe mɨkahexeiya,meta yuxaɨtame 'ateewapaitɨ mukuma—Yawé mɨpaɨ kanaineni—.³²Wakameyutsixima xepiinite pɨrayani,meta wawakaitsixima memɨyumɨire xekaniwanawairiekuni,Naitsarie kwiepa nekaniwataxɨriexɨamɨkɨmɨkɨ teɨteri yumu'utsie naime memuyukaxika,tsepa hakewa meme'uwani mepe'uximatɨarieka—Yawé mɨpaɨ kanaineni—.³³Katsuxi yawixi memayu'eririya wakie kanayeimɨkɨ,kakiepatɨri kanayeimɨkɨ yuheyemekɨ.Nixewitɨ tewi mana pɨkatayerɨni,xewitɨtɨma mana kietɨ pɨka'ayani».

Niuki 'Erami hetsiemieme

³⁴Yawé kemutayɨ 'Erami hepaɨtsita mieme, yuniukame Keremiyaxi pɨtiutaxatɨa mɨtitaxatakɨ mexɨakame wiyaritsie Tserekiyaxi ti'aitakaku Kura kwieyaritsie.

³⁵Mɨpaɨ kanaineni Yawé Naimekɨmɨtɨrɨkaɨye:«'Erami tupieya nekanitamuramɨkɨ,tita hetsie mɨtiyutɨrɨkariyakai nekanikumaweriyamɨkɨ.³⁶'Erami kwieyari hetsie kuyaxi naitsarie kiekatari nekaniwa'atɨamɨkɨnaitsarie kiekatari nekaniwarawitɨxɨamɨkɨ.Naitsarie kiekatari wahetsɨa nekaniwataxɨriexɨamɨkɨ,naitsarie kwiepa kemakuyewamekananuhapaniexɨakuni yayupapaɨmetɨ.³⁷'Erami kiekatari marika nepɨwapitɨani memɨwaraye'unie wahɨxie,memɨwakwiku wahɨxie,ne nekaniha'aka wahetsiemieme,wahetsie 'uximatɨarika nekani'atɨamɨkɨ—Yawé mɨpaɨ kanaineni—.Memɨwaraye'unie mepɨwaranukuweiyayunaime mewakwimeke mepɨtehayewa.³⁸Ne'uweni 'Erami nepɨtakeni,meta ti'aitame mana kiekame nekanika'unamɨkɨ meta 'iparewiwametemama—Yawé mɨpaɨ kanaineni—.