Keremiyaxi
48
/
hch_wb2
share
Share
Niuki Muhawi hetsiemieme
1
Mɨpaɨ kanaineni Yawé Naimekɨmɨtɨrɨkaɨye, 'Ixaheri kakaɨyarieya, Muhawi hetsiemieme:
«Xɨa'ui Newu hetsiemieme, karikɨ kanika'unariemɨkɨ.
Kiriyatahini kaniwiyariemɨkɨ meta kanitewiyarikatsitɨariemɨkɨ.
Kiekarieya kuraruyari 'amatitewa nitixaɨtɨ pɨkarayeitɨarieni kanika'unariemɨkɨ.
2
Muhawi witsikemɨtixeiyariekai kaniukumawere,
Hetsiwuni kiekariyaritsie mekatenikuxatani hepaɨtsitana mieme 'axamemiyurienikɨ:
“Neuxei, hikɨmɨtɨka 'ikɨ teɨteri tepɨwarakumaweriya”.
'Ekɨtsiere Marimeni, kayuwatɨ pekanitamarimɨkɨ,
pekananukuweiyariemɨkɨ 'ixiparakɨ.
3
Tsuari hiwariyari kana'eniɨriɨkɨni Kurunahini kiekariyaritsie mieme:
memuta'unariekɨ meta memakumaweriyariekɨ.
4
Muhawi kanika'unariemɨkɨ,
tɨɨriyamama watsuari 'ari kani'enierieka.
5
Ruhiti teikɨmanayaritsie
mekaniutihuni tsuarikɨ mekatehayewatɨ,
Kurunahini kɨatsaritayaritsie
kukuiniya hiwariyari kaniwati'eniɨriɨkɨni,
memuka'unariekɨ.
6
Xekeneuyuta'unaxɨa. Kemɨ'ane mɨyɨweni ke'uyutawikweitsitɨani.
'Ɨtsi makumawetsie mieme xekeneyu'erieka.
7
'Awewiyatsie pemɨtiwiyakɨ meta 'apiinitɨarikatsie,
'ekɨtatsiere pekaniwiyariemɨkɨ.
'Akakaɨyari Kemuxi mɨtitewa kananutɨkiemɨkɨ xeime kwieyaritsie,
mara'akatemama meyunaitɨ meta memɨwaparewiekai.
8
Ti'uname 'ukanamieni naime kiekarite ka'unake,
nixewitɨ kapɨtawikweni.
Mayeweritsie ka'ayekiepayatɨ kanayeimɨkɨ,
meta hɨri manaweri kanita'unariemɨkɨ,
yemekɨ Yawé kemutayɨ.
9
Tetetsie xeteha'utɨame xekeneutaketsa ma'eriwanikɨ Muhawi hetsiemieme,
karikɨ 'ari kaniuka'unarieni,
kiekariteya kanakumaweni,
nixewitɨ tɨma tewi mana puka'uyeika.
10
»'Axake'itɨarieka kemɨ'ane yamɨkatikayani
Yawé 'uximayatsikayatsie.
'Axake'itɨarieka kemɨ'ane
xuriya mɨkatayeurieni yu'ixiparakɨ.
11
»Muhawi kwieyaritsie kayuwatɨ kaniumakaitɨni 'amɨtiuyukamatsietɨtɨ,
kaxie winuyari mɨkawatayuitɨariwa hepaɨ.
Hatsuaku mana kiekatari xeime kwieyaritsie mepɨkahehapaniewawe.
Winu hepaɨ xeime haxu tekɨxiyarita pɨkakatuariewe.
'Ayumieme 'aixɨa kema'ane pɨkaheuyeiwe,
meta yaxeikɨa 'aixɨa pu'ɨa».
12
Yawé mɨpaɨ kanaineni: «Peru tukari kanaye'amɨkɨ
kepauka teɨteri nemɨwatanɨ'ani Muhawi hetsie,
yutekɨxite memɨtiyeuriexɨanikɨ,
meta yuye'ɨrɨte memɨtitaraxɨanikɨ.
13
Hikɨ Muhawi kaniyutitewiyamɨkɨ yukakaɨyari Kemuxi hetsiemieme,
'ixaheritsixi kememɨteyutitetewiyaxɨ Weteri hetsiemieme,
tuki hetsie yemekɨ memɨtewiyakai.
14
»Xeme mɨpaɨ xepɨte'uyu'ɨrekai:
“Tame temɨtehayu'iwa tekanihɨkɨtɨni,
teɨteri kuyaxata miemekɨ temɨkamama”.
15
Muhawi kanika'unariemɨkɨ
meta kiekariteya,
—mɨpaɨ kanaineni Ti'aitame,
Yawé Naimekɨmɨtɨrɨkaɨye mɨtitewa—:
Mana kiekatari temari 'aixɨa memɨ'anene
mekanikwi'iwakuni.
16
Muhawi mɨka'unarienitsie kanehuraniri,
'uximatɨarikaya kanaye'aximeniri.
17
Xekeneutitsuanani hetsiena mieme yunaitɨ 'auriena kiekatari,
kemɨ'ane xemimariekai kemɨtimariwekai.
Mɨpaɨ xekeneutiyuaneni: “'Itsɨ panumurarie
mɨtɨrɨkaɨyekai meta mumariwekai”.
18
»'Ekɨ, Riwuni pemɨkiekame:
kenanakaye'a 'a'uwenitsie
kwiepa makunaraunitsie keneutayexi,
karikɨ Muhawi 'uname 'ekɨta kamenitamiemɨkɨ
'akuraru 'amatitetewa kanika'unamɨkɨ.
19
'Ekɨ 'Aruhexi kiekariyaritsie pemɨkiekame,
huye 'utɨa keneutakeka keneutanierixɨa,
memɨyu'unatɨwe keniwaruta'iwawiya, 'ukitsi meta 'ukarawetsixi:
“¿Kekuta muwa reyɨ?”
20
Muhawi tixaɨtɨ pɨkarayeitɨarie,
kana'iwarieni.
Xekeneutitsuanani meta xekeneutihiwani.
'Axinuni hatɨayari 'utɨa xeketeneutaxata
kename Muhawi 'uka'unarie.
21
'Uximatɨarika kaninuani hɨri makuweritsie paitɨ:
Huruni, Yahatsa meta Mepati kiekariyaritsie,
22
Riwuni, Newu meta Weti-Riwɨratahini wahetsie,
23
Kiriyatahini, Weti-Kamuri meta Weti-Mekuni wahetsie,
24
Keriuti meta Wutsira wahetsie,
meta naime kiekarite Muhawi kwieyaritsie miemete,
hurawa meta 'ateewa mukumanekai.
25
Muhawi tɨrɨkariyaya kaniukumawere,
tɨrɨkariya pɨkahexeiyari
—Yawé mɨpaɨ kanaineni—.
26
»Muhawi xekeneuhayewa matiwenikɨ tawekame hepaɨ,
Yawé hɨxie mariweme mayuyeitɨakɨ.
Yuhayaritsie ke'ukaweni,
'atsieriwame kehayani.
27
'Ekɨ Muhawi, neteɨterima 'ixaheritsixi pepuwananaimakai,
pepɨwakuxatakai pewayuriyatɨ,
tenawayamete wahamatɨa pemuwarutaxeiya hepaɨ.
28
Muhawi kwieyaritsie kiekatari,
yukiekaritetsie xekenayekɨni,
'aita xekeneuteni.
Kukuruxi wahepaɨ xekene'aneni
'aitekɨa memuyuti'ituatɨwa.
29
»Tekanimaika kemɨtiuyuta'ɨre Muhawi,
'ɨrikakɨ panutiyeika.
Waɨkawa pɨtiyukatawe'erie meta puyuta'ɨre.
Waɨkawa payu'eriya meta mariweme payuyeitɨwa.
30
Ne nekanimaika kemɨtiyuwaɨriya 'axa'utaitɨ,
peru tsepa kemɨtiyuta'ɨre tixaɨtɨ 'atsipɨkatiyurieni
—Yawé mɨpaɨ kanaineni—.
31
'Ayumieme neputatsuaka Muhawi hetsiemieme,
yunaime teɨterimama wahetsiemieme nepɨnehiwerie,
meta neputa'aiwa kiekari Kixi-Keretsi hetsiemieme.
32
'Ahetsiemieme neputatsuaka Tsiwima kiekariyari, kaxie haraweriyari hepaɨ pemɨ'ane,
keyuri Katsexi hetsiemieme,
'amamate yɨrariyari haramaratsie peuka'axe
meta Katsexi paitɨ,
peru kaninuamɨkɨ ti'uname
'aharawerita hetsie naime katinika'unamɨkɨ.
33
Kwie 'aixɨa mɨtiu'anetsie Muhawi kwieyaritsie
kaniukumawere temawierika meta nanai.
Winu nepukumaweriyaxɨ memiwewiekai,
meta kaxie ketsinamete memutihiwakai meyutemamawietɨ mepukumawerixɨ,
hiwari hikɨ mieme temawierika hiwariyari pɨkahɨkɨri.
34
»Hetsuwuni 'aiwarieya kana'eniɨriɨkɨni 'Eraré meta Yahatsa paitɨ,
metatsiere Tsuhaxi paitɨ,
meta Kurunahini paitɨ meta 'Ekɨrati-Tseritsiya paitɨ.
Meta haixate Nimirini mieme
kaniukawaxɨani.
35
Teɨteri nekaniwarakumaweriyamɨkɨ Muhawi kiekatari
mawari memɨwawewirie kakaɨyarixi memɨte'atimawiyarɨwatsie
meta yukakaɨyarixi 'ɨkwa memɨwatairie
—Yawé mɨpaɨ kanaineni—.
36
»Ne'iyari pirikɨxa muyuhiwerie hepaɨ putaine,
ne'iyari patsuaka Muhawi hetsiemieme,
pirikɨxa hiwerika mukayuitɨwani hepaɨ putaine
ne'iyari patsuaka Kixi-Keretsi hetsiemieme,
mɨrakumaweriyariekɨ
piiniteya ketipaɨmeme mɨtiuxeɨriekai.
37
Yunaitɨ mepumu'umetse
meta yunaitɨ mepanuyexirietɨka,
meta yumamatetsie naitsarie mepeuxitekietɨka,
metatsiere yunaitɨ hiwerika kamixayari mepanakatɨtɨka.
38
Naitsarie Muhawi kwieyaritsie kii heima
meta naitsarie kaye 'utɨma,
tsuari xeikɨa kani'enierieka,
Muhawi nemutataraxɨkɨ
tekɨxi 'axamɨ'ane mehɨiyani hepaɨ
—Yawé mɨpaɨ kanaineni—.
39
Kekuta tiutsanarie.
Neuxei mɨya mekateniutsuanani.
Muhawi kanawarini
tewiyarikakɨ.
'Auriena kiekatari hetsiena mieme
mekanimamaka meta mekaniyuriyani».
40
Yawé mɨpaɨ kanaineni:
«Neuxei. Muhawi maye'unie kwixɨ hepaɨ katiniwieneni,
Muhawi heima kaniwieneni.
41
Kiekariteyatsie katinitahaxɨamɨkɨ,
meta kiekariteya kuraruyari 'amatitɨtɨ kana'iwarieni.
'Iya tukaritsie, kuyaxi Muhawi kiekatari wa'iyari
'uka tiniwerɨmetɨ mɨtiuyɨyɨaka hepaɨ pɨ'aneni.
42
Muhawi kwieyari kanikumaweriyariemɨkɨri,
Yawé hɨxie mariweme mayuyeitɨakɨ.
43
Marika, mɨki teukiya meta winiyari,
kaniwatakwewieka Muhawi kiekatari
—Yawé mɨpaɨ kanaineni—.
44
Kemɨ'ane muyuta'una marikakɨ putsuta kaneukawemɨkɨ,
kemɨ'aneta putsuta muwatiyani winiyaritsie kaniyɨhɨamɨkɨ,
karikɨ ne nekani'atɨamɨkɨ Muhawi hetsie
'uximatɨarika kepauka tukarieya maye'ani
—Yawé mɨpaɨ kanaineni—.
45
»Kiekatari hipatɨ mekaniyuta'unani Hetsiwuni 'etɨriyayatsie paitɨ,
mekaniuku'uweni mekatɨrɨkawitɨ.
Hetsiwuni kiekariyaritsie tai payeneika,
Tsikuni kiekariyaritsieta, tai
Muhawi kanaya mɨtaxɨtsitɨanikɨ
meta yunaime teɨteri muwanake hipame wahamatɨa memuyukwitɨwenikɨ meta memuyuti'ɨre wamu'ute.
46
Xɨa'ui, Muhawi.
Kemuxi kiekarieya puka'unarie,
'aniwema temari mepanuhapanieni, meta yaxeikɨa
'aniwema 'ukitsi mepanuhapanieni xeime kwieyaritsie.
47
Peru 'arikeketa,
Muhawi hetsie 'aixɨa 'itɨariekame nekanayeitɨamɨkɨ»,
Yawé mɨpaɨ kanaineni. 'Ena kaniu'aka Muhawi kemɨtikwinitɨarieni.
Powered by Seed Bible API
expand_more
Search
All books
Old Testament
New Testament
chevron_left
Previous Chapter
Books
search
Search
explore
Discover
chevron_right
Next Chapter