Yerusalaame Kundethaa
1Sedeqiyaasi Yihudan kawotida uddufuntho laythan, tammantha ageenan, Babiloone kawoy Nabukadanaxoorinne iya olanchoti ubbay yidi, Yerusalaame teqidosona.2Sedeqiyaasi kawotida tammanne issintho laythan, oyddantho ageenan, uddufuntho gallasan Babiloone olanchoti katama gimbiya menthidosona.3He wode Babiloone kawa halaqati, Ergaal-Sarasira, Samgaar-Nabo, Sarsakimanne Ergaal-Sarasira geeteteysati hara daro halaqatara issife yidi Giddo Penge geetetiya bessan uttidosona.4Yihuda kawoy Sedeqiyaasinne iya olanchoti ubbay Babiloone olanchota be7ida wode baqatidosona. Qamma katamaape keyidi, kawa atakilte bessaa efiya ogiyara, nam7u dirsa gimbeta issife gathiya pengiyara keyidi Yordaanose Zangaarako simmidi bidosona.5Gidoshin, Babiloone olanchoti enta yedethidi, Iyaarko demba gathishe, Sedeqiyaasa oykidosona. Hamaata biittan, Irbila kataman de7iya kawa Nabukadanaxoorako efidosona. Kawoy Nabukadanaxoori yan Sedeqiyaasa bolla pirdis.6Babiloone kawoy, Sedeqiyaasa ade nayta iya sinthan, Irbila kataman wodhis; qassi Yihuda halaqata ubbaa wodhis.7Sedeqiyaasa ayfeta wooci kessidi, iya Babiloone biitta efanaw santhalaatan qachis.8Babiloone olanchoti kawo gadhonne asay de7iya keetha ubbaa taman xuuggidosona; Yerusalaame gimbiyaka laallidosona.9Kawa naageysata halaqay Nabuzardaani kataman attida asaanne kaddidi iyako yida asa ubbaa di77idi Babiloone biitta efis.10Kawa naageysata halaqay Nabuzardaani aykoka bayna guutha manqota Yihudan aggidi, entaw woyne gadenne goshsha gade immis.Ermiyaasi Biletis
11Nabukadanaxoori, kawa naageysata halaqaa Nabuzardaana haysada yaagidi kiittis:12“Bada Ermiyaasa koya demmada, iyaw koshshiyaba ubbaa ootha; iya bolla hara iitabaa aykoka oothofa” yaagis.13Hessa gisho, Nabuzardaani, Nabushazbaana, Ergaal-Sarasiranne Babiloone kawa halaqata ubbaa kiittidi,14Ermiyaasa qashetidi de7iya, naageysata dabaabape kessidosona. Ba soo efidi wothana mela Safaana na7aa, Akqaama na7aa Godoliyas hadara immidosona. Hessa gaason, Ermiyaasi ba biitta asaara issife de7is.15Ermiyaasi naageysata dabaaban qashetidi de7ishin, Godaa qaalay iyako haysada yaagidi yis.16“Bada, Tophe addiya Ebemelekako haysada yaaga: ‘Ubbaafe Wolqaama Goday, Isra7eele Xoossay, haysada yaagees: hizape guye ta odidaysada ha katamaa bolla lo77oba gidonashin, dhayo ehana. Hessi ubbay haniya wode ne ha kataman uttada, ne ayfen be7ana.17Gidoshin, he gallas ta nena ashshana; ne yayiya, ne morketa kushen aathada immike.18Ta nena polo ashshana; ne olan hayqaka; ne tanan ammanetida gisho, hayqope attana’ ” yaagees Goday.