ኤርምያሳ ዳብዳብያ
1ናብያ ኤርምያስ ድኤትዳ አሳ ግዶን ደእያ አትዳ ጭማታስ፥ ካህነታስ፥ ናበታስነ ናቡካዳናፆር የሩሳላመፐ ድእድ፥ ባብሎነ ኤፍዳ ኡባስ የሩሳላመፐ የድዳ ዳብዳበይ ሀይሳፈ ካልድ ፃፈትዳይሳ።2ሀይስ ሀንዳይ፥ ካዎይ እኮንያን፥ እያ አይያ ካውያ፥ እያ ሞርናት፥ ይሁዳነ የሩሳላመ ሀላቃት፥ ኩሸ ሂላንቾትነ ብራታ ቆፀይሳት የሩሳላመፐ ድኤትድ ብድ ስምና።3ኤርምያስ ይሁዳ ካዎይ ሰደቅያስ ባብሎነ ካዋ ናቡካዳናፆራኮ ኪተትዳ ሳፋና ናኣ ኤልኣሳነ ካልቄ ናኣ ጋማራ ቦላ ሄ ዳብዳብያ የድስ። ዳብዳበይ ሀይሳዳ ያጌስ፦4“ኡባፈ ዎልቃማ ጎዳይ፥ እስራኤለ ፆሳይ፥ የሩሳላመፐ ባብሎነ ድኤትዳ አሳ ኡባስ ሀይሳዳ ያጌስ፦5ኬ ኬፅድ ያን ደእተ። ካ ዘርድ አይፍያ ሚተ።6ማቾ ኤክድ ማጫ ናአነ አደ ናአ የልተ። ህንተ አደ ናይታስ ማቾ ኦይችድ እምተ፤ ህንተ ማጫ ናይታ አዝናስ እምተ። ኤንቲ ማጫ አደ የሎ፤ ያን ታይቦን ዳርተ፤ ጉፆፍተ።7ህንተ ድኤትድ ብዳ ካታማስ ሳሮይ ዳና መላ ኮይተ። ሄ ካታማስ ጎዳ ዎስተ። እያዉ ሳሮይ ደእኮ፥ ህንተዉካ ሳሮይ ዳና።8ህንተ ግዶን ደእያ ህንተ ናበትነ ማሮት ኦድያባን ጭመቶፍተ፤ ኤንቲ አሙህያ አሙሁዋ ስኦፕተ።9ኤንቲ ታ ሱንን ዎርዶ ትንብተ ኦዶሶና፤ ታ ኤንታ ኪታብከ” ያጌስ ኡባፈ ዎልቃማ ጎዳይ፥ እስራኤለ ፆሳይ።10“ህንተ ባብሎነን ጋምእያ ላፑን ታሙ ላይይ ፖለትያ ዎደ ታ ህንተ ግሾ ያዳ፥ ህንተና፥ ህንተ ቢታ ዛራዳ ኤሀና ጋዳ ገልዳ ቃላ ፖላና።11ታኒ ህንተዉ ቆፕያ ቆፋ ኤራይስ። ሄ ቆፋይ፥ ዉርሰይ ሎኦነ ኡፋይስ ደእያ፥ ህንተና ጎእያ ቆፋፐ አትሽን፥ ቆህያ ቆፋ ግደና።12ሄሳፈ ጉየ፥ ህንተ ታና ፄጋና፤ ታኮ ያናነ ታና ዎሳና፤ ታካ ህንተና ስአና።13ህንተ ታና ኮያና፤ ህንተ ታና ህንተ ኩመ ዎዛናን ኮይዳ ዎደ ደማና።14ታ ህንተዉ በንታና፤ ታ ህንተና ድኤተፈ ዛራና። ታኒ ህንተና ላልዳ ካዎተታፐነ ዱማ ዱማ በሳፈ ሺሻና። ታ ህንተና ድኦን ደንዳ ህንተ ቢታ ጉየ ዛራዳ ኤሀና” ያጌስ ጎዳይ።15ህንተ፥ “ጎዳይ ናበ ኑስ ባብሎነን ደንስ” ያግደታ።16ግዶሽን፥ ዳዊታ አራታን ኡትያ ካዋባነ ህንተ መላ ድኤትድ ቦና አትዳ አሳባነ ህንተ ዳቦታባ ጎዳይ ሀይሳዳ ያጌስ።17“ታ ኤንታ ቦላ ማሸ፥ ኮሻነ ጋዶ የዳና። ታ ኤንታና ሜተታናዉ ዳንዳኤቶና ኢትዳ ባላሰ ም አይፈዳ ኦና።18ታኒ ኤንታ ማሻን፥ ኮሻንነ ጋዶን የደዳ፥ ኤንታ ሳአን ደእያ ካዎተ ኡባስ ዳጋማ ኦና። ቃስ ታ ኤንታ ከሳዳ የድዳ ቢታ ኡባን ባደስ፥ ዳጋማስ፥ ቦረስነ ጫሻስ ኦና።19ታ አይለታ ናበታ ባጋራ ዛራ ዛራዳ ኪትዳ ታ ቃላ ኤንቲ ስኦና እፅዶሶና። ህንተ ድኤትድ ብዳይሳትካ ስኦና እፅደታ።20ህንተኖ፥ የሩሳላመፐ ባብሎነ ድኤትድ ብዳ አሳዉ፥ ህንተ ኡባይ ጎዳ ቃላ ስእተ” ያጌስ ኡባፈ ዎልቃማ ጎዳይ።21ታ ሱንን ዎርዶ ትንብተ ኦድያ፥ ቆላያ ናኣ አካባባነ ማሰያ ናኣ ሰደቅያሳባ ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ። “ታ ኤንታ ባብሎነ ካዋ ናቡካዳናፆራስ አዳ እማና። ህንተ ፄልሽን፥ እ ኤንታ ዎና።22ሄሳፈ ጉየ፥ ይሁዳፐ ድኤትድ፥ ባብሎነ ብዳ አሳይ እስ አስ ባዳናዉ ኮይኮ፥ ‘ባብሎነ ካዎይ ታማን ፁግዳ ሰደቅያሳዳነ አካባዳ ጎዳይ ነና ኦ’ ያጋና።23ኤንቲ እስራኤለን ኢታ ናጋራ ኦዶሶና። ኤንቲ ባንታ ሾሮታ ማቸታራ ላይማትዶሶና፤ ታ ኤንታ ኪቶና ዎርዶ ትንብተ ታ ሱንን ኦድዶሶና። ሄሳ ኤረይ ታና፤ ሄሳስ ታኒ ማርካ” ያጌስ ጎዳይ።ሻማያስ ፃፈትዳ ዳብዳበ
24ናሄላመ አድያ ሻማያስ ሀይሳዳ ያጋዳ ኦዳ፦25“ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ ‘ኔኒ ነ ሱንን የሩሳላመን ደእያ አሳስ፥ ማእሰያ ናኣ ካህንያ ሶፎንያሳስነ ሀራ ካህነታስ ዳብዳበ የዳዳሳ።’ ነ ሶፎንያሳስ ሀይሳዳ ያጋዳሳ፦26‘ፆሳ ኬን ሀላቃ ግዳና መላ ጎዳይ ነና ዮዳሄ በሳን ካህነ ኦድ ሹምስ። ባና ናበ ግድ ትንብተ ኦድያ ጎያ ኦናካ እያ ቶሁዋ ዱን፥ እያ ቆያ ሳንላታን ኔኒ ቃቻናዉ በሴስ።27ያትን ባና ናበ ግያ አናቶታ አድያ ኤርምያሳ አይስ ሄሳዳ ኦብኪ?28ኤርምያስ፥ ድኤተ ላይይ ዳሮ ግድያ ግሾ ባብሎነን ኬ ኬፅድ ደእተ፤ ካ ዘርድ አይፍያ ሚተ’ ” ያግድ ኑና ኪትስ።29ካህነይ ሶፎንያስ ናብያ ኤርምያሳስ ዳብዳብያ ናባብስ።30ጎዳ ቃላይ ኤርምያሳኮ ሀይሳዳ ያግድ ይስ፤31“ሀ ኪታ ድኦን ደእያ አሳ ኡባስ ኪታ፤ ናሄላማ አድያ ሳማየባ ጎዳይ ሀይሳዳ ያጌስ፤ ታኒ ኪቶና ሻማየይ ዎርዶ ትንብተ ኦድድ ህንተ ዎርዶን አማንታና መላ ኦስ።32ታ ናሄላማ አድያ ሻማያነ እያ ሶ አሳ ሴራና። እ ታ ቦላ ማካላባ ኦድዳ ግሾ ሀ አሳ ግዶን እያዉ እስ አስካ ደኦን አተና። ታኒ ታ አሳስ ኦና ኬሀተ እ በኤና” ያጌስ ጎዳይ።