ZEREMI22gub_wbt

1Uze'eg Tupàn ihewe. — Eho Zuta ywy rehe har wanuwihawete hàpuzuhu pe nehe kury. Tawi izuapyr romo hekon a'e. Eze'eg a'e pe har wanupe nehe: Tuwihawete, tuwihaw hehe we har wà, teko Zeruzarez pe har wà. — Peinu katu Tupàn Tuweharupi Wiko Ma'e ize'eg nehe kury, ere wanupe nehe, i'i ihewe.3— Ihe Tupàn Tuweharupi Wiko Ma'e amume'u ko ma'e peme kury. — Pezapo ikatu ma'e wanupe nehe. Pemunar zo wama'e rehe nehe. Imunar ma'e imunar waiko wama'e rehe wà. Pepyro imunar ma'e wanuwi pe wà nehe. Pepuraraw kar zo ma'erahy amo ywy rehe arer peywy rehe har wanupe nehe, tu 'ym ma'e wanupe nehe no, kuzà imen umàno ma'e kwer wanupe nehe no. Pezuka zo teko ikatu ma'e 'aw tàpuz ihewe imur katu pyrer pe wà nehe.4Aze peruzar tuwe ko heze'eg nehe, a'e mehe Tawi izuapyapyr wiko wiwi putar penuwihawete romo wà nehe. Wixe wiwi putar 'àg ukenawhu rupi ywyramawa rehe wapyk pà wà nehe, kawaru kupe pe wà nehe no, tuwihaw uzehe we har wanupi wà nehe, wemiruze'eg wanupi wà nehe no.5Aze naperuzar kwaw heze'eg nehe, a'e mehe amume'uahy ko ma'e herer rehe ihe kury. 'Àg tàpuzuhu uzeapo putar ywytyra'i ita iapo pyrer romo nehe. Ihe Tupàn Tuweharupi Wiko Ma'e aiko ko ma'e imume'u har romo ihe.6Tuwihawete hàpuzuhu Zuta ywy rehe har ipuràg eteahy Zireaz ywy ài a'e, ywytyr Irimano ywy rehe har ài no. Nezewe rehe we azapo putar ywyxiguhu romo ihe nehe. Ni amo nuiko kwaw a'e pe wà nehe.7Amono kar putar awa a'e pe ihe wà nehe. Umumaw putar a'e tawhu wà nehe. Paw rupi werur putar utazy wà nehe. Uhaw putar izyta ipuràg eteahy ma'e ywyràkàxigyw iapo pyrer wà nehe, tata pupe waneityk pà wà nehe.8A'e re teko amo ywy rehe har tetea'u ukwaw putar huwake uzehezehe upuranu pà wà nehe. — Màràzàwe tuwe Tupàn Tuweharupi Wiko Ma'e uzapo agwer ma'e 'aw tawhu uhua'u ma'e pe a'e, i'i putar wà nehe.9Amo umume'u putar wanupe wà nehe. — Hemiaihu upytu'u uze'egaw Tupàn rehe we wemiapo katu kwer heruzar ire wà. Umuwete amo tupàn wà. Uzapo ma'e wanupe wà. Omono ma'e wanupe wà.

Ze'eg Zeoakaz rehe har

10Teko Zuta ywy rehe har wà, Pezai'o zo tuwihawete Zuzi rehe nehe.Pezemumikahy zo imàno awer rehe nehe.Pezai'oahy ta'yr Zeoakaz rehe nehe.Weraha putar xe wi wà no.Nuzewyr pixik kwaw xe nehe.Nuexak pixik kwaw ywy uzexak kar awer nehe.11Zeoakaz Zuzi ta'yr upyta u hekuzaromo Zuta ywy rehe har wanuwihawete romo a'e.Tupàn Tuweharupi Wiko Ma'e uze'eg nezewe Zeoakaz rehe.— Oho tuwe xe wi.Nuzewyr pixik kwaw nehe.12Zauxiapekwer weraha putar amo ae ywy rehe wà nehe.Umàno putar a'e ywy rehe nehe.Nuexak wi pixik kwaw ko ywy nehe.

Ze'eg Zeoaki rehe har

13Aze amo uzapo tawhu purupe ma'erahy ipuraraw kar pà wà nehe, ma'e rehe imunar pà wà nehe,aze numekuzar kwaw uwake har wama'ereko haw nehe,aze umuma'ereko e kar wà nehe, uzemumikahy putar wà nehe, ta'e azepyk putar wanehe nehe xe.14— Azapo putar tawhu uhua'u ma'e ihe nehe,aze amo i'i nehe.Azapo putar ipupyaikaw pyrer uhua'u ma'e i'aromo nehe, aze i'i nehe, uzemumikahy putar nehe, ta'e azepyk putar hehe nehe xe.Uzapo putar màràmàràn ukenaw ywate no.Upyao putar pàrirogaw ywyràkàxigyw pupe nehe.Umupiràg putar nehe no.15Erezapo tàpuzuhu ywyràkàxigyw pupe ipyao pyrer ne.Ikatu amo tàpuzuhu wi.Aipo xo a'e rupi zo ereiko tuwihawete romo.Zuzi neru wiko wyzài tuwihawete ài.Ikatu a'e. Na'imunar kwaw.Hemiapo kwer paw ikatu.16Wereko katu hemetarer 'ym ma'e wà, ma'e hereko 'ymar wà no.Heko awer ikatu.Agwer ma'e iapo har wexak kar hekwaw haw purupe wà.Ihe Tupàn Tuweharupi Wiko Ma'e aiko ko ma'e imume'u har romo ihe.17Xo neremetarer neremimono'og ràm zo erexak iko.Erezuka ikatu 'ym ma'e iapo 'ymar ne wà.Erepuraraw kar ma'erahy teko wanupe wama'e rehe nemunar pà, i'i Tupàn tuwihawete pe.
18A'e rupi Tupàn umume'u ko ma'e Zeoaki Zuzi ta'yr Zuta ywy rehe har wanuwihawete pe uzeapo ma'e ràm xe kury.
— Ni amo nuzai'o kwaw Zeoaki imàno awer rehe wà nehe.— Iaiw imàno awer, hemyrypar, Iaiw imàno awer, ni'i kwaw wà nehe.Ni amo nuzai'o kwaw hehe wà nehe.Ni amo nuhapukaz kwaw izupe wà nehe.— Hezar, heruwihawete, ni'i kwaw wà nehe.19Uzutym putar hetekwer zumen umàno ma'e kwer hetekwer ài wà nehe.Umutyk putar ukenawhu rupi tawhu wi heityk pà katu pe wà nehe, i'i Tupàn.

Ma'e uzeapo ma'e ràm Zeruzarez pe har wanupe

20Teko Zeruzarez pe har wà.— Peho Irimano ywy rehe penehapukaz pà nehe.Peho Màxà ywy rehe penehapukazahy pà nehe.Tuwe teko wenu peze'eg mehe wà nehe, Te ywytyruhu Moaw ywy rehe har pe wà nehe.Ta'e zauxiapekwer weityk ywy rehe har penuwake har pemyrypar paw rupi wà xe.21Tupàn uze'eg peme a'e, Peneko haw ikatu mehe a'e.Nezewe rehe we napepurenu wer kwaw hehe.Pekwàkwàmo mehe arer we peiko nezewe.Naperuzar pixik kwaw Tupàn.22Ywytu umuhàmuhàz putar penuwihaw wà nehe.Zauxiapekwer weraha putar pemyrypar wemipyhyk kwer romo wà nehe.Uzapo putar tawhu peneko awer ikàg 'ym ma'e romo wà nehe, Imaranugar ma'e romo wà nehe no.Ta'e ikatu 'ym ma'e tetea'u pezapo pe xe.23Peiko ywyràkàxigyw Irimano wi herur pyrer wamyter pe.— Ni amo nuzapo kwaw ikatu 'ym ma'e zanewe wà nehe, peze peiko.Ma'erahy ihem mehe pekuhegatu putar nehe.Peiko putar kuzà umemyrzexak kar ma'e ài nehe. Hahy putar tuwe peme nehe.

Tupàn uzepyk tuwihawete Zoaki rehe

24Tupàn Tuweharupi Wiko Ma'e uze'eg Zoaki Zuta ywy rehe har wanuwihawete Zeoaki ta'yr pe kury. — Amume'uahy ko ma'e hereko haw rehe ihe kury. — Aze mo ereiko tuwihawete ikwà ku'aw har hepo awyze har pe har romo, urenuhem mo ihe.25Amo teko ipuruzuka wer nerehe wà: Mawiron pe har wanuwihawete Namukononozor, zauxiapekwer hehe we har wà no. Erekyze wanuwi. Oromono putar a'e teko wanupe ihe nehe.26Oromono kar putar ywy neremigwaw 'ym pe nehy rehe we nehe. Napezexak kar kwaw a'e pe. Pemàno putar a'e pe nehe.27Pemonokatu putar peneha peywy rehe nehe. Nezewe rehe we napezewyr kwaw a'e pe nehe, i'i Tupàn.28Na'e aze'eg ihe kury. — Aze ywy'a uzeka, izar weityk. Nuputar kwaw. Aipo Zoaki wiko ywy'a ài. Zauxiapekwer weraha ywy ikwaw pyr 'ym pe ta'yr wanehe we wà. Màràzàwe tuwe weraha wà.
29O ywy, ywy, ywy.Einu katu Tupàn hemimume'u kwer nehe.30Tupàn umume'u a'e awa heko àwàm a'e.— Ereiko putar nera'yr 'ym pà nehe.Ikàg 'ym ma'e romo ereiko putar nehe.Naheta kwaw nera'yr Zuta ywy rehe har wanuwihawete romo wiko ma'e ràm Tawi zàwenugar wà nehe.Ihe Tupàn Tuweharupi Wiko Ma'e aze'eg kwez kury.
expand_more
Search