Iita Kawota Bolla Xoossa Pirda
1Goday haysada yaagees; “Duge Yihuda kawa gadho bada, yan ha qaala oda.2‘Neno Yihuda kawaw, Dawita araatan uttidayso, neeni, ne moorinnatinne ha pengiyara geliya ne asay Godaa qaala si7ite!3Suure pirdaa pirdite; xillo oothite. Bonqetidaysa un7ethiya asaa kushepe ashshite. Bete asaas, yi7otasinne am7etas gene oothopite woyko sugopite. Xillo asa suuthu ha bessan gussofite.4Ha kiitata hinte naagiko, Dawita araatan uttiya kawoti paranne para gaare toggidi, banta moorinnataranne banta asaara ha kawo gadho pengiyara gelana.5Shin hinte kiitetonna ixiko, ha kawo gadhoy baysa gidana yaagada ta Goday ta huuphen caaqas’ ” yaagees Goday.6Goday Yihuda kawo gadhuwaba haysada yaagees: “Neeni taw Galada biittanne Libaanose zuma mela gidikoka, ta nena mela biittanne asi doonna katama oothana.7Taani nena laaliya asaa ola miishe oythada kiittana; enti ne ziga tuuqeta qanxerethidi, taman yeggana.8“Dumma dumma kawotethatape asay he katamaa matara aadhishe, ‘Goday ayis ha gita katamaa haysada oothidee?’ yaagidi issoy issuwa oychana.9Enti zaaridi, ‘Godaa banta Xoossara caaqida caaquwa menthidi, hara xoossata goyinnida gishonne oothida gishosa’ ” yaagana.10Hayqida kawa Iyosiyasas yeekofite woyko kayotofite. Hessa aggidi, di7etidi bida Saalomasseeletidi yeekite. I guye simmenna; ba yeletida biitta zaaridi be7enna.11Ba aawa bessan Yihudan kawotidi de7ishe, ha bessaafe bida Iyosiyaasa na7a Saloomaba Goday haysada yaagees. “I guye simmenna.12I di7etidi bida biittan hayqana; simmidi ha biitta be7enna” yaagees Goday.13Ba keetha genen keexeysa, geella ogen pooqe bolla pooqe gujeysa, ba asaas aykoka immonnanne gate qanxonna oosiseysa ayye!14He uray, “Taani taw gita pooqey de7iya dalga keethi keexana” yaagdi, ba keethas dalga maskooteta kessidi, ziga mithan alleeqisidi, zo7o qalame tiyees.15Ne daro zigan keexidaysi nena lo77o kawo kessees gada qopay? Ne aawa Iyosyaasas miyabaynne uyaabay dhayidee? I suure pirda pirdis; xillo oothis. Hessa gisho, iyaw ubbabay injetis.16I manqotasinne metootanchotas suure pirdiya gisho, ubbabay iyaw injetis. Godaa erees guussay haysa.17Shin ne ayfeynne ne wozanay shempiday, cimon go77a demo, xillo suuthi guso, genenne un7etho bollana.18Hessa gisho, Goday Iyosyaasa na7aa, Yihuda kawa Iyo7aqeemaba haysada yaagees: “I hayqiya wode enti iyaw, ‘Woo! Ta ishaw, woo! Ta ishaw’ yaagidi yeekokona. Qassi, ‘Woo! Ta godaw, woo! Ta kawaw’ yaagidi zeleelokona.19Iya moogoyka hare moogo mela gidana. Iya ahay gooshetidi, Yerusalaame pengetape ya baggan yegetana” yaagees Goday.20Goday Yerusalaameba haysada yaagees: “Olas neera zupeteysati ubbay xoonetida gisho, pude Libaanose bada, yan waassa. Baasane biittan waaso suulisa; Abariima zuman waassa.21Ne saro de7iya wode ta new odas; shin ne tana si7onna ixadasa. Ne na7atethafe doomin ne hanoy haysa; ne taw kiitetonna ixadasa.22Ne henthanchota ubbaa carkoy efana; olas neera zupeteysati di7etidi baana. He wode ne iitatetha ubbaa gisho yeellatananne kawuyana.23Hinteno, Libaanose zigan keexetida keethan de7eysato, iqethi oykida maccasada un7i hinte bolla puttu giiko hinte waananee?” yaagees.24Goday haysada yaagees: “Ta de7oy ero! Neeni Iyo7aqeema na7ay, Yihuda kawoy Yo7akini, ta ushacha kushen de7iya ta attamiya migiddo gidiyakoka ta nena kessa yeggana.25Nena wodhanaw koyeysatas, ne yayiya Babiloone kawa Nabukadanaxoorasinne iya olanchotas ta nena aathada immana.26Ta nenanne ne aayiw hinte yeletonna hara biitta holana; hinte nam7ayka yan hayqana.27Hinte simmanaw laamotiya biitta polo simmeketa” yaagees.28Ha addey Yo7akini, kadhetidanne meqida xuggee? I, oonika koyonna miishee? Inne iya nayti ayis goodetidi, eronna biittan yegetidi attidonaa?29Biitte, biitte, biitte, Godaa qaala si7a!30“Iya kochaafe issuwasika injetonna gishonne Dawita araatan uttiya woyko Yihudan kawotiya asi issoyka bayna gisho, ha addiya, na7i bayna asi, ba laytha ubban de7oy injetonna asi” gada xaafa yaagees Goday.