Read ዔርሚያሴ ማፃኣፖ 14

ዔርሚያሴ ማፃኣፖ14mdy_twf

ቂኢጮ ሉማ

¹ናንጊና ናንጋ ጎዳ ሃጊ ሙካንዳ ሉማ ዛላ ሂዚ ታኣም ጌዔኔ፦²«ዪሁዳ ዖዪሢዳኬ፤ካታማ ዒዞኮ ቢያ ሃይቢሮ ሳዛ ጋሽኪሢዳኬ፤ዴራ ዒዞኮ ዖዬሢሮ ሳዖ ሲላላ ዴዒ ዬኤካኔ፤ዬሩሳላሜያ ናንጊና ናንጋ ጎዳ ባንሢ ዒላቲሢዳኬ።³ዖርጎጮ ዓሳ ዋኣሢ ዴንቃኒ ፔኤኮ ማዻ ዓሶ ኮይሲሢ ዳካንዳኔ፤ዬያሮ ዬይ ማዻ ዓሳ ዋኣፆ ዔቶ ዔቶ ቤዞ ዴንዳንዳኔ፤ጋዓንቴ ፔቴታዖ ዔያታ ዋኣሢ ዴንቂንዱዋኣሢሮ ጉዞ ጉሪ ኬዲ ማኣሪ ሙካንዳኔ፤ዎዛ ቲቂ፥ ካራ ዔያታ ባይዛንዳሢሮዖዪ ፔኤኮ ቶኦኮ ዔያታ ዔኤቢና ካንቂ ዓኣቻንዳኔ።⁴ዒርዚ ባይቃንዳሢሮ ሳዓ ፃኣዺ፥ ፃሃንዳኔ፤ጎሽኪ ዎርቃ ዓሳኣ ዎዛ ባይዚዖዪሢና ፔኤኮ ቶኦኮ ዔኤቢና ካንቂ ዓኣቻንዳኔ።⁵ማኣቲ ጋዓባኣዚኮ ዜርሢ ባይቃንዳሢሮሮኦቶ ሾሾዓዖ ናዖ ቦኦላ ሃሺ ፔ ጎጲ ባኣዚ ኮይሢ ዓኣዻንዳኔ።⁶ኪርሞሎ ዺባ ዋኣፆ ዼኤቦና ሜታዻንዳሢሮጌሜሮ ቶኦኮ ቶኦኮ ኬስኪ ዉኡኮጉዲ ሆጊንቲ ሃንታንዳኔ፤ሙዖንዶ ባኣዚ ዔያታ ዴንቂንዱዋኣሢሮ ዛጎ ባሺንታንዳኔ።⁷ታ ዴራ ታ ባንሢ ሂዚ ጌይ ዒላታንዳኔ፦‹ዎዚ ኑኡኮ ዻቢንቶ ሚርጉማ ኑጊዳ ማርካዼያ ማዔቴያናንጊና ናንጋ ጎዳሢዮ! ኔና ኑ ቦንቻንዳጉዲ ኑና ማኣዴ፤ኔጊዳፓ ኑ ሃኬኔ፤ ኔና ኑ ዖዪሴኔ።⁸ዒስራዔኤሌ ዓሳ ዓውሳንዳኔ ጌይ ጉሙርቃሢ ኔና ሌሊኬ፤ካራ ኑም ባይቃኣና ካሮ ጌሣሢ ኔናኬ፤ሂዳዖ ኔኤኒ ኑኡኮ ሳዖይዳ ሾኦቺ፤ጊንሣ ሃሣ ፔቴ ኬሊ ዎርቃዖ ዴዴንዳያጎይሢ ዓሲ ማዔሢ ዓይጎሮዳዖ?⁹ዶዲ ፖኦሊሴታዖ ካራ ባይዜያ፥ ሃሣ ሜሌ ዓሲ ማኣዳኒዳንዳዒባኣ ፖኦሊሴጉዲ ኔ ዓይጋ ማዓይ?ናንጊና ናንጋ ጎዳሢዮ! ኔኤኒ ኑ ባኣካ ዓኣኔ፤ኔ ሱንፆና ኔና ኑ ዔኤላኔ፤ሃዳራ ኑና ኬኤሪፖ።› »

¹⁰ናንጊና ናንጋ ጎዳ ሃያ ዴሮ ዛሎ ሂዚ ጋዓኔ፦ «ታጊዳፓ ዔያታ ሃኪ ዓኣዻኒ ናሽካኔ፤ ፔና ዔያታ ቃዚ ቆላያቱዋሴ፤ ዬያሮ ታና ዔያቶ ባካ ዎዛሱዋሴ፤ ዔያታ ማዼ ዻቢንቶ ቢያ ማሊ ጶቂሢ ጶቂሢ ዔያቶ ጎሞ ዛሎሮ ታ ዔያቶይዳ ሜቶ ዓጋንዳኔ።»¹¹ናንጊና ናንጋ ጎዳ ታኣም፦ «ሃያ ዴሮም ኮሺ ባኣዚ ማዺንታንዳጉዲ ሺኢቂፖ፤¹²ዔያታ ሙኡዚ ሃሺ ሺኢቄቴያ ታ ዔያቶም ዋይዛዓኬ፤ ሚቺ ዒንጎ ዒንጊሢታቴያ ሃኣኮ ዒንጊፆዋ ዔያታ ታኣም ዒንጌቴታዖ ዔያቶ ባካ ታና ዎዛሳዓኬ፤ ታ ዔያቶ ዖልዚና ናይዚና፤ ሃሣ ፑርታ ዶርዖና ኩርሲሳንዳኔ» ጌይ ኬኤዜኔ።¹³ታኣኒ ዒማና፦ «ናንጊና ናንጋ ጎዳ ማዔ ቢያ ባኮ ማዤ ጎዳሢዮ! ኔ ማሊፆ ኬኤዛኔ ጋዓ ሜሌ ዓሳ ‹ዖልዚንታ ናይዚንታ ሙካዓኬ› ጌይ ጌይ ዴሮም ኬኤዛኔ፤ ዔያታ ‹ኑኡኮ ሳዖይዳ ባይቁዋዖ ዴዴዓ ኮሹሞ ሌሊ ማዓንዳሢ ኔኤኒ ኬኤዜኔ› ጋዓኔ» ጌኤኔ።¹⁴ናንጊና ናንጋ ጎዳ ሂዚ ጌይ ማሄኔ፦ «ዬያታ ታ ማሊፆ ኬኤዛኔ ጋዓ ዓሳ ታ ሱንፆና ሉኡዙሞ ባኣዚ ኬኤዚሢ ዓርቄኔ፤ ታ ዔያቶ ዳኪባኣሴ፤ ታ ዔያቶ ዓይሤ ባኣዚያ ባኣሴ፤ ፔቴ ባኣዚታዎ ታ ዔያቶም ኬኤዚባኣሴ፤ ፆኦሲ ፔጋሲ ዻዌም ኑ ዴንቄኔ ዔያታ ጋዓ ባካ ቢያ ታጊዳፓ ታ ዻዌያቱዋሴ፤ ዔያታ ሎንሣ ሎንሣ ቢያ ሉኡዙሞ ባኣዚ፥ ፔ ዦዋቶ፥ ሜሌ ካኣሽኮ ካኣዦፓ ዔያታ ዔኬያና ፔ ማሊሢፓ ኬሲ ኬኤዛያ ጉሪ ባኣዚኬ።¹⁵ታኣኒ ዔያቶ ዳኩዋንቴ ፔኤሮ፦ ‹ኑ ሳዖይዳ ናይዚታቴያ ዖልዚ ሙካዓኬ› ጌይ ጌይ ታ ሱንፆና ሎንሦ ኬኤዛ ዬኖ ዓሶ ታኣኒ፥ ናንጊና ናንጋ ጎዳ ዖልዚና፤ ሃሣ ናይዚና ዎዺ ኩርሲሳንዳኔ።¹⁶ዬይ ሎንሣ ኬኤዚንቴ ዴራኣ ቢያ ናይዚና፥ ሃሣ ዖልዚና ኩዳንዳኔ፤ ዔያቶኮ ሌዛ ቢያ ዬሩሳላሜ ካታሞይዳ ጎይፃ ጎይፃ ኬኤሪንቲ ዓታንዳኔ፤ ዔያቶ ዱኡካንዳ ዓሲ ጴዻዓኬ፤ ዬይ ዔያቶኮ ላኣሎይዳ፥ ዓቲንቆ ናኣቶይዳ፤ ሃሣ ዉዱሮ ናኣቶይዳኣ ዓቱዋዖ ቢያሢዳ ማዺንቲ ኩማንዳኔ። ዔያታ ማዼ ዻቢንቶጉዴያ ኮይሳ ሜቶ ታ ዔያቶይዳ ዓጋንዳኔ።»¹⁷ዬኖ ዛሎ ዴሮም ታኣኒ ሂዚ ጌይ ኬኤዛንዳጉዲናንጊና ናንጋ ጎዳ ታና ዓይሤኔ፦«ዴራ ታኣኮ ፑርታ ጎይሢ ሜቂ ኪፃዼኔ፤ ጋፒ ማኣሳኔኔ፤ዬያሮ ዓኣፓፓ ታኣኮ ሮኦሮንታ ዋንቶንታ ቢያ ዓቢሢ ዎታኔ፤ሃሺሢባኣያ ታኣኒ ዬኤካኔ።¹⁸ካታማፓ ታኣኒ ኬስካዖ ዖልዚና ሃይቄ ዓሲ ሌሲ ዴንቃኔ፤ካታሞ ጊንሣ ታ ጌላኣና ናይዚና ሃይቃኒ ሳዛ ጋሽካ ዓሲ ታኣም ጴዻኔ፤ታ ማሊፆ ኬኤዛ ዓሶንታ ቄኤሶንታ ፔ ሜቶሮ ሌሊ ጳሽካኔ፤ዔያታ ዎካ ዓኣዻቴያ ዔሩዋሴ።»

ዴራ ፆኦሲ ቃይሼ ቃይዦ

¹⁹ናንጊና ናንጋ ጎዳሢዮ! ዪሁዳ ጋፒ ኔኤኒ ኬኤራኒዳ?ፂዮኔ ዴሮዋ ዒፃዖ ኔ ጋጋፒያ?ዻቃኒ ኑ ዳንዳዑዋ ጎይሢሃያይዲ ኑና ኔ ማኣሳንሤሢ ዓይጎሮዳዖ?ኮሹሞ ኑ ዴንቃንዳኔ ጌይ ኑ ሃጋኣ ዎዛ ጌሤኔ፥ጋዓንቴ ፔቴታዖ ኮሺ ባኣዚ ኑም ጴዺባኣሴ፤ኑና ፓሣንዳ ባኣዚ ኑ ዴንቃንዳኔ ጌይ ሃጋኣ ዎዛ ኑ ጌሤኔ፥ጋዓንቴ ሂርጊሻ ሜታ ኑጊዳ ዺቢ ዺቢ ዓኣዼኔ።²⁰ናንጊና ናንጋ ጎዳሢዮ! ኑኡኮ ዻቢንቶ ኑ ዔሬኔ፤ኑ ዓዶንሢ ማዼ ጎማኣ ኑኡም ዔርቴኔ፤ጎኔና ኔ ቤርታ ጎሜ ኑ ማዼኔ።²¹ኔ ኑና ጉሙርሴ ቃኣሎ ኔኤኮ ቢያ ማሊ ጶቂሢጋፓ ኑና ቦሂ ሃሺፖ፤ኔኤኮ ዼኤፑማ ፔጋዺ ዔርታ፥ ኔኤኒ ቦንቺንቲ ዴዓ ካኣቱሞ ዖይታ ጌሢንታ ዬሩሳላሜ ሞኦሪሲፖ፤ኑኡና ዎላ ኔ ሳላዺ ጫኣቄ ጫኣቁሞ ማሊ ጶቂሤ።²²ሜሌ ዴሮ ፆኦዞ ባኣካፓፔቴ ፆኦሲታዖ ዒርዚ ዋርቂሳኒ ዳንዳዑዋሴ፤ጫሪንጫኣ ፔ ሼኔና ዒርዚ ፆዺሡዋሴ፤ናንጊና ናንጋ ጎዳ ማዔ ኑ ፆኦዛሢዮ!ዬያ ቢያ ማዻሢ ኔናታሢሮኑኡኒ ጉሙርቃሢ ኔናኬ።

ዔርሚያሴ ማፃኣፖ 14 / mdy_twf

ቂኢጮ ሉማ

ዴራ ፆኦሲ ቃይሼ ቃይዦ

ዔርሚያሴ ማፃኣፖ14mdy_twf