Keremiyaxi12hch_wb2

Keremiyaxi Kakaɨyari kemɨtiutahɨawixɨ

1'Ekɨ, Yawé heitseriemekɨ pekatinikuxatanikepauka nemɨniukixie 'ahamatɨa.Matsi hikɨ nepɨmatitaxatɨanikeyuta'etsiwa tita mɨtiheitserie hepaɨtsita.¿Titayari 'axamemɨte'u'iyari 'aixɨa mete'itɨarie?¿Titayari teyukwamanamete kayuwatɨ mete'u'uwa?2'Ekɨ pepɨwaruka'etsa, mɨkɨta mepananayata,mepɨtiwawere meta mepukaxuxuawere.Yutenikɨ mepɨmatsinɨawa,peru wa'iyaritsie pepɨkayeka.3Yawé, 'ekɨ ne pepɨnetsimate,'ekɨ pepɨnetsixeiya meta pepɨtimate kenemɨtinewaɨriya 'ahetsiemieme.Keniwaranuhapani, muxatsi memɨkwi'iwa wahepaɨ,keniwaranuyeteɨxi 'iya tukaritsie memɨkwi'iwakɨ.4¿Kepaukake pɨkawiye 'ena kwiepa,kepaukake pɨtitiyɨra tupiriyate?Yeutari meta memɨte'awɨwawe mepɨkwi'iteɨteri 'axamemɨte'uyurikɨ 'ikɨ kwieyaritsie kiekatari,memuyuwaɨriya mɨpaɨ memɨtiyuanikɨ:«Kakaɨyari kepauka temeuyeweni pɨkatatsixeiya».

Kakaɨyari kemɨtiuta'a

5«Xɨka teɨteri memanautsawawe wahamatɨa pe'uti'uxikeni,¿Kehepaɨ petiwaruta'iwawe kawayutsixi?Xɨka pehekawautseni makuweritsie,¿kepeyɨniri Kurutani mu'ɨtsiyatsie?6'A'iwamatɨtɨ, 'axeikɨa nunuiwakate,mepɨmetsi'uku'eiri meta 'axameputiyuane 'ahepaɨtsita.Tsepa waɨkawa witsimemɨmetekɨhɨawe,yuri pepɨkatiwa'eririeka.
7»Neteɨterima nepuwaruku'eiri,tita mɨtinepiinitɨkai nepiku'eiri,neteɨterima nemɨwanaki'erie nepuwayetuamemɨwaraye'unie wahetsɨa.8Nepiinite nemɨtiwayetuirienikekai nehepaɨtsitamayetsi wahepaɨ meputiyuane.Mepɨnetsikukewe tɨma,'ayumieme nepɨwaxani'erie.9Nehetsiemieme neteɨterimawiki witsimeu'ane hepaɨ nepɨtiwaxeiyakaimemimietɨwe wirɨkɨxi.Xekenehu, xekeniwarukuxeɨri yunaime yeutari.Xekeniwa'atɨa memitakwanikɨ.10Yuwaɨkawatɨ muxatsi wahɨwemete nekaxie haraweriyari mepuka'unaxɨ,nekwie naime mepakuketsi,neharaweri witsimɨ'anekaimakumawe mepayeitɨa.11'Unime mepuhayewaxɨ,'akuwakime meta 'akumaweme nehɨxie,naitɨ 'ikɨ kwieyari puka'unarienixewitɨ mɨkaheiyehɨwakɨ.12Naitsarie makumawetsie yemurite mɨtiteitsiemekaniu'axɨani teyumemiwamete.Yawé 'ixiparaya 'ikɨ kwieyari kanika'unamɨkɨnaime 'etsiwatɨma yayeume pɨkahayewa,meta nixewitɨ kayuwatɨ pɨkahexeiyani.13Tɨriku mepuka'e hikɨ xuya mepuka'itsanaxɨ,yakɨ xeikɨa pɨratɨa wa'uxiya.Yawé waɨkawa mɨha'akɨmepuyutitetewiya tita memɨte'uka'itsanaxɨkɨ».14Yawé mɨpaɨ kanaineni: «Yunaitɨ teɨteri 'auriena kiekatari 'axamemɨte'u'iyari neteɨterima 'ixaheritsixi tita nemɨtiwarumi memɨte'umayɨa, nepuwarahuna wakwiepa, meta Kura xiɨyarimama watsata nekaniwaxɨnamɨkɨ.15'Arike newarahuname, nekaniwatinenimayatamɨkɨ, nekaniwa'atɨamɨkɨ yuxexuime wakwietsie nemɨwayetuiritsie.16Xɨka yemekɨ meheitimani neteɨterima wahuye, mɨpaɨ kememɨtewaru'ɨkitɨakai neteɨterima Wahari hetsiemieme kememɨteyɨhɨritɨakakɨ, mɨpaɨ xɨka metehetimani kenemɨtitewakɨ xɨka meyuhɨritɨatɨ mɨpaɨ me'utiyuani: “Yawé 'ake'uyeikani yemekɨ”, hikɨ 'ana neteɨterima watsata mekaniyuhayewakuni.17Peru kemɨ'ane nuiwari mɨkaheu'enani, yuheyemekɨ nepikumaweriya meta nepɨwaka'una», Yawé mɨpaɨ kanaineni.
expand_more
Search