Abanyasîriya barhemuka banashandabana
1Yuditi anacibabwîra, erhi: «Munyumvagye yâga bene wîrhu, muyanke eli irhwe, mulimanike aha irhwêrhwè ly’enkûta zinyu.2“Na hano izûba libasha bwamanaca, munayanke ngasi muguma eby’emirasano byâge, ngasi balume ba misî boshi banabunguluke, mubè nka bantu bayandagalira ebwa kabanda, era bali bene Asûru. Ci kwône murhabungulukaga”.3“Nabo, hano babà bamâyanka emirasano yâbo, bakanya bagend’imanyîsa abâli oku cihando, nabo banazûsa abarhambo b’engabo ya Asûru, kandi nabo banalibirhira emunda ihêma lya Holoferno liri. Barhamushimâne, na ntyo obôba bwabagwârha, banashandabane embere zinyu”.4“Na hano mukola mubaminisire, mw’oyo n’abandi banayûbaka omu Israheli boshi, mwâbalambika omu njira”.5“Ci kwône embere mujire ntyo, mumpamagalire Akioro olya muntu w’omunya-Amoni, yêne abone anamanye oku nêci anali olya wagayaguzagya enyumpa ya Israheli, n’olya wamurhumaga emwinyu nka muntu mufù”».6Banacihamagala Akioro ajà omu nyumpa ya Uziyahu. Erhi ajamwo anabona irhwe lya Holoferno omu maboko g’omuntu wali omwo ndêko y’olubaga; acîrhimba akamalanga okw’idaho, ahôla.7Ci erhi ahembûka, afukama aha magulu ga Yuditi, anaciderha, erhi: «Oli mugishe omu nyumpa za bene Israheli boshi n’omu mashanja goshi, ngasi boshi banayumve izîno lyâwe banarhangâlè.8“Na buno ombwîrage nâni kurhi wajizire mwa zino nsiku”». Aha karhi k’olubaga, Yuditi anacirhondêreza okumubwîra ebi ajizire byoshi kurhenga amango anagendaga kuhika ago mango akazâg’ibaganîrira.9Yuditi erhi abà amâyûsa okushambâla, olubaga loshi lwanacibanda akahababo n’olwo lubî lwashakanya omu cishagala coshi.10Ci erhi Akioro abà amâbona ebi Nyamuzinda wa Israheli anajizire, ayêmêra okunali oyo Nyamuzinda w’Israheli, bakembûla olushisha oku bulume bwâge, na kuhika buno acibà na bene Israheli.11Erhi bunaca ntya, bamanika irhwe lya Holoferno oku nkûta na ngasi muguma ayanka emirasano yâge. Banacibunguluka bikembe bikembe ebwa kafômeko k’entondo.12Erhi bene Asûru babalangira, banacigend’ibwîra abakulu bâbo, nabo banacikanya bagend’ibwîra abarhambo b’engabo, bakulikira na ngasi barhegeka ngabo ndebe.13Banacijà emunda ihêma lya Holoferno lyàli. Banacibwîra olya wakazâg’ilanga ebirugu byâge, mpu: «Ozûse Nnâhamwîrhu bulya balya bajà bamârhangula okuyandagalira emunda rhuli mpu barhulwîse, banagukumuke ntya boshi».14Bagoasi agend’ikomomba oku lumvi lw’ihêma lwàli emuhanda. Bulya ali ocîkebirwe mpu bagwîshîre na Yuditi.15Ci erhi acibà ntâye omushuzize, ahiga okujà omu nyumpa y’okulâla: amushimâna oku idaho gukola mufù, akola cirunda bamukabulire oku ntebe n’irhwe mîra baligendanaga.16Anaciyâma bwenêne, abanda endûlù, omu kufuduka, asharhula emyambalo yâge.17Anacijà omw’ihêma lyabâga cihando ca Yuditi, arhacimushangagamwo. Anacilibirhira emunda olubaga luli, erhi:18«Balya bajà bagomire! Omukazi w’Omuyahudi amabonêsa enyumpa ya Nabukondonozori enshonyi. Holoferno oyo okw’idaho, ci arhacigwêrhi irhwe oku mubiri gwâge».19Erhi banayumva ebyo binwa, abarhambo b’engabo y’Abanya-Sîriya banasharhangula emyambalo yâbo, bazunguluka obukengêre, banacibanda endûlù erya y’okujugumya abâli omu cihando boshi.