Abimeleke
1Gediyoona na7ay, Abimelekey Seekeman de7iya ba aaye dabbotako bidi, entanne ba aaye kochata haysada yaagis;2“Seekeman de7iya asaa, ‘Gediyoona laapun tammu nayti ubbay hintena haariko lo77oyee? Woyko issi asi haariko lo77o?’ yaagidi oychite. Taani hinte ashonne hinte meqethi gideysa dogopite” yaagis.3Iya aaye dabboti ha qaala ubbaa iya gisho Seekema asaas odin, Abimelekey entaw dabbo gidida gisho Seekema asay iya kaallanaw dosidosona.4Enti Ba7aal-Biriita eeqa keethaafe laapun tammu bira santime ekidi iyaw immidosona. Abimelekey he biran iita asatanne bonqeyisata shammidi bana kaallanaada oothis.5Ofran de7iya ba aawa soo bidi, laapun tammu ba ishata Gediyoona nayta, issi shucha bolla goyris. Shin Gediyoona na7ay, teshoy, Iyo7atami qosetidi hayqonna attis.6Hessafe guye, Seekema asaynne Beet-Milo asay issife shiiqidi, Seekeman eeqa tuussa matan de7iya goyinno wolaako bidi yan Abimeleke kawothidosona.7Iyo7atami hessa si7ida wode Garzaana deriya bolla keyidi ba qaala dhoqu oothidi, “Hinteno Seekema asaw, Xoossay hintena si7ana mela ta odeysa si7ite.8Issi gallas mithati ubbay shiiqidi, banta bolla kawo kawothanaw bidi shamaho, ‘Haaya, nu bolla kawota’ yaagidosona.9Shin shamahoy, ‘xoossatanne asata bonchisiya zayte immeysa aggada mithata bolla kawoto?’ yaagidi zaaris.10“Yaatin, mithati balase mithaa, ‘Haaya, nu bolla kawota’ yaagidosona.11Shin balasey, ‘Mal7onne lo77o gidida ayfe immeysa aggada mithata bolla kawotanaw boo?’ yaagidi zaaris.12“Yaatin, mithati woyneko, ‘Haaya, nu bolla kawota’ yaagidosona.13Shin woyney, ‘Xoossatanne asata ufaysiya ushsha immeysa aggada mithata bolla kawotanaw boo?’ yaagidi zaaris.14“Yaatin, wursethan mithati ubbay xunduqeko, ‘Haaya, nu bolla kawota’ yaagidosona.15Xunduqey, ‘Hinte tuma tana hinte bolla kawothanaw koyiko, haa yidi ta kuyan shempite. Hessa hinte ixiko, xunduqe tashiyape tami keyidi Libaanose zigaa mo’ yaagis.16“Hinte Abimeleke kawothiday tumatethaninne suuretethanee? Gediyooni hintew oothidaba akeekidi iya soo asaas lo77o kushe zaaridetii?17Ta aaway hintew oletidaysa akeekite; Midiyaame asaape hintena ashshana yaagidi, bana hayqos aathidi immis.18Shin hinte hachi ta aawa soo asaa bolla dendidi, iya laapun tammu nayta issi shucha bolla goyrideta. Gediyoona ayllefe yeletida Abimelekey hintew dabbo gidida gisho Seekeman kawothideta.19Ha77i simmidi Gediyoonasinne iya soo asaas hinte oothida oosoy tumatethaninne suuretethan gidiko Abimelekera ufaytite; ika hintera ufayto.20Shin hessi hanonna ixiko Abimelekepe tami keyidi Seekemanne Beet-Milo asaa mo. Qassi Seekema asaapenne Beet-Milo asaape tami keyidi Abimeleke mo” yaagis.21Iyo7atami ba ishaa Abimelekes yayyida gisho baqatidi Beera bidi yan de7is.22Abimelekey Isra7eele biittan heedzu laythi kawotis.23Hessafe guye, Xoossay Abimeleke giddoninne Seekema asaa giddon iita ayyaana kiittin Seekema asay Abimeleke bolla makallidosona.24Xoossay hessa oothiday, Abimelekey ba ishata wodhida gishonne enta wodhana mela Seekema asay iya minthethida gishosa.25Seekema asay guutha asi dooridi deriya huuphiyan uttidi Abimeleke bolla morketethan dendana mela oothidosona. Enti ogera aadhiya asa ubbaa bonqidosona; Abimelekey hessa si7is.26He wode Ebeeda na7ay Gaali ba ishatara Seekema yin, Seekema asay iyan ammanetidosona.27Ubbay banta gade bidi woyne maxidosona; woyniya aggidi gita gibira giigisidosona. Banta eeqa keethaa gelidi yan mishenne uyishe Abimeleke cayidosona.28Ebeeda na7ay Gaali, “Nuuni Seekema asay iyaw haaretanaw Abimelekey oonee? I Yeruba7aala na7aa gidennee? Zabuli ha katamaa haarana mela Abimelekey shuumidaysa gidennee? Hessafe Seekema sheeshi gidida Hamoore asaas haaretana.29Ha asaa kaalethey tana gidiyako Abimeleke digganashin. Abimeleke xeegada, ‘Ne olanchota darsa ekada oletanaw haaya’ yaaganashin” yaagis.30Ebeeda na7ay Gaali gidaysa katamaa haariya Zabuli si7ida wode daro yilotis.31Qosan Abimelekeko ase kiittidi, “Ebeeda na7ay Gaalinne iya ishati Seekema yidi yan de7iya asaa ne bolla denthethoosona.32Hessa gisho, neeninne neera de7iya asay qamma dendidi issi bessan zugidi naagite.33Wontetha gallas awi doliya wode enti qoponna katamaa olite. Gaalinne iyara de7iya asay hintena olanaw keyiya wode hinte koyida mela enta bolla oothite” yaagis.34Abimelekeynne iyara de7iya asa ubbay qamma dendidi Seekemape karera oyddu cugan shaaketidi zugidosona.35Abimelekeynne iyara de7iya asay Ebeeda na7ay Gaali keyidi katamaa pengiyan eqidaysa be7idi qosetida bessaafe keyidosona.36Gaali asaa be7ida wode Zabulako, “Heko, asay deriya huuphiyape wodhees” yaagis. Zabuli, “Haysi deriya eeshope attishin, ase gidenna” yaagidi zaaris.37Gaali zaaridi, “Heko, asay deriyas gidduwa oykidi wodhees; hara cugi qassi marota wolay de7iya ogiyara yees” yaagis.38Zabuli Gaalako, “ ‘Nuuni iyaw haaretanaw Abimelekey oonee?’ yaagida ne doonay ha77i aw bidee? Haysati neeni kadhida asaa gidokonaayee? Ha77i keyada entara oleta” yaagis.39Gaali Seekema asaa kaalethi keyidi Abimelekera oletis.40Abimelekey yedethin Gaali baqatis; katamaa pengiya gakanaw daroti deshetidi kundidosona.41Abimelekey Aruman de7in, Zabuli Gaalanne iya ishata Seekemape yedethidi kessis.42Wontetha gallas Seekema asay goshshas bidaysa Abimelekey si7is.43I ba asaa ekidi heedzu cugan shaakidi, issi bessan zugidi naaganaada oothis. Asay katamaape keyeysa be7ida wode enta wodhanaw qosetida bessaafe keyis.44Abimelekeynne iyara de7iya cugay sinthe woxi bidi, katamaa pengiyan eqidosona. Attida nam7u cugay goshshan de7iya asaa olidi wodhidosona.45Gallas kumethi Abimelekey asaara oletidi oykidaape guye kataman de7iya asa ubbaa wodhis; katamaa dhaysis; biitta bolla maxine laallis.46Seekema Adussa Gimbiya giddon de7iya asa ubbay hessa si7ida wode Ba7aal-Barta eeqa keethan de7iya gongoluwan qosetidosona.47Abimelekey enti yan shiiqidaysa,48si7idi inne iyara de7iya asa ubbay Salmoona deriya keyidosona. Abimelekey kalta ekidi mitha tashe qanxidi, ba hashiyan tookis. Baara de7iya asaako, “Taani oothishin be7idaysada hinte ellesidi oothite” yaagis.49Asa ubbay mitha tashe qanxi ekidi, Abimeleke kaallis. He tasheta sa7a keethaa bolla dooridi asay iya giddon de7ishin tama oythidosona. Iyan de7iya asa ubbay hayqidosona. Hayqida addeynne maccasa tayboy issi mukulu gidana.50Abimelekey Temeesa bidi katamaa teqidi oykis.51He katamaa giddon issi mino adussa gimbey de7ees. Katamaa asay macci, addey, kaaletheysatinne hara asa ubbay attonna woxidi adussa gimbiya giddo gelidosona. Pengiya gordidi gimbiya huuphe keyidosona.52Abimelekey olishe adussa gimbiya gakidi taman xuugganaw pengiyako shiiqis.53Shin issi maccasiya Abimeleke huuphen woxa mayde holada iya guuggiya phalqa yeggasu.54Iya ola miishiya tookiya na7atetha ellesi xeegidi, “Abimeleke maccasi wodhis goonnaada ne mashshaa shoddada tana wodha” yaagis. Yaagin na7atethay caddin I hayqis.55Isra7eele asa ubbay Abimelekey hayqidaysa be7idi ba soo soo bis.56Abimelekey laapun tammu ba ishata wodhidi, ba aawa bolla I oothida gomiya Xoossay iya bolla zaaris.57Xoossay Seekema asaa iitatetha ubbaa enta bolla zaaris. Hessada hanidi Gediyoona na7ay Iyo7atami baaddida baadethay enta gakis.