አብመለከ
1ገድዮና ናአይ፥ አብመለከይ ሴከማን ደእያ ባ አየ ዳቦታኮ ብድ፥ ኤንታነ ባ አየ ኮቻታ ሀይሳዳ ያግስ፤2“ሴከማን ደእያ አሳ፥ ‘ገድዮና ላፑን ታሙ ናይት ኡባይ ህንተና ሃርኮ ሎኦዬ? ዎይኮ እስ አስ ሃርኮ ሎኦ?’ ያግድ ኦይችተ። ታኒ ህንተ አሾነ ህንተ መቀ ግደይሳ ዶጎፕተ” ያግስ።3እያ አየ ዳቦት ሀ ቃላ ኡባ እያ ግሾ ሴከማ አሳስ ኦድን፥ አብመለከይ ኤንታዉ ዳቦ ግድዳ ግሾ ሴከማ አሳይ እያ ካላናዉ ዶስዶሶና።4ኤንቲ ባኣል-ብሪታ ኤቃ ኬፈ ላፑን ታሙ ብራ ሳንትመ ኤክድ እያዉ እምዶሶና። አብመለከይ ሄ ብራን ኢታ አሳታነ ቦንቀይሳታ ሻምድ ባና ካላናዳ ኦስ።5ኦፍራን ደእያ ባ አዋ ሶ ብድ፥ ላፑን ታሙ ባ እሻታ ገድዮና ናይታ፥ እስ ሹቻ ቦላ ጎይርስ። ሽን ገድዮና ናአይ፥ ተሾይ፥ እዮአታም ቆሰትድ ሀይቆና አትስ።6ሄሳፈ ጉየ፥ ሴከማ አሳይነ ቤት-ምሎ አሳይ እስፈ ሺቅድ፥ ሴከማን ኤቃ ቱሳ ማታን ደእያ ጎይኖ ዎላኮ ብድ ያን አብመለከ ካዎዶሶና።7እዮአታም ሄሳ ስእዳ ዎደ ጋርዛና ደርያ ቦላ ከይድ ባ ቃላ ቁ ኦድ፥ “ህንተኖ ሴከማ አሳዉ፥ ፆሳይ ህንተና ስአና መላ ታ ኦደይሳ ስእተ።8እስ ጋላስ ምት ኡባይ ሺቅድ፥ ባንታ ቦላ ካዎ ካዎናዉ ብድ ሻማሆ፥ ‘ሃያ፥ ኑ ቦላ ካዎታ’ ያግዶሶና።9ሽን ሻማሆይ፥ ‘ፆሳታነ አሳታ ቦንችስያ ዛይተ እመይሳ አጋዳ ምታ ቦላ ካዎቶ?’ ያግድ ዛርስ።10“ያትን፥ ምት ባላሰ ም፥ ‘ሃያ፥ ኑ ቦላ ካዎታ’ ያግዶሶና።11ሽን ባላሰይ፥ ‘ማልኦነ ሎኦ ግድዳ አይፈ እመይሳ አጋዳ ምታ ቦላ ካዎታናዉ ቦ?’ ያግድ ዛርስ።12“ያትን፥ ምት ዎይነኮ፥ ‘ሃያ፥ ኑ ቦላ ካዎታ’ ያግዶሶና።13ሽን ዎይነይ፥ ‘ፆሳታነ አሳታ ኡፋይስያ ኡሻ እመይሳ አጋዳ ምታ ቦላ ካዎታናዉ ቦ?’ ያግድ ዛርስ።14“ያትን፥ ዉርሰን ምት ኡባይ ፁንዱቀኮ፥ ‘ሃያ፥ ኑ ቦላ ካዎታ’ ያግዶሶና።15ፁንዱቀይ፥ ‘ህንተ ቱማ ታና ህንተ ቦላ ካዎናዉ ኮይኮ፥ ሃ ይድ ታ ኩያን ሸምፕተ። ሄሳ ህንተ እፅኮ፥ ፁንዱቀ ታሽያፐ ታም ከይድ ልባኖሰ ዝጋ ሞ’ ያግስ።16“ህንተ አብመለከ ካዎዳይ ቱማተንነ ሱረተኔ? ገድዮን ህንተዉ ኦዳባ አኬክድ እያ ሶ አሳስ ሎኦ ኩሸ ዛርደቲ?17ታ አዋይ ህንተዉ ኦለትዳይሳ አኬክተ፤ ምድያመ አሳፐ ህንተና አሻና ያግድ፥ ባና ሀይቆስ አድ እሚስ።18ሽን ህንተ ሀች ታ አዋ ሶ አሳ ቦላ ደንድድ፥ እያ ላፑን ታሙ ናይታ እስ ሹቻ ቦላ ጎይርደታ። ገድዮና አይለፈ የለትዳ አብመለከይ ህንተዉ ዳቦ ግድዳ ግሾ ሴከማን ካዎደታ።19ሀእ ስሚድ ገድዮናስነ እያ ሶ አሳስ ህንተ ኦዳ ኦሶይ ቱማተንነ ሱረተን ግድኮ አብመለከራ ኡፋይትተ፤ እካ ህንተራ ኡፋይቶ።20ሽን ሄስ ሀኖና እፅኮ አብመለከፐ ታም ከይድ ሴከማነ ቤት-ምሎ አሳ ሞ። ቃስ ሴከማ አሳፐነ ቤት-ምሎ አሳፐ ታም ከይድ አብመለከ ሞ” ያግስ።21እዮአታም ባ እሻ አብመለከስ ያይዳ ግሾ ባቃትድ ቤራ ብድ ያን ደእስ።22አብመለከይ እስራኤለ ቢታን ሄ ላይ ካዎትስ።23ሄሳፈ ጉየ፥ ፆሳይ አብመለከ ግዶንነ ሴከማ አሳ ግዶን ኢታ አያና ኪትን ሴከማ አሳይ አብመለከ ቦላ ማካልዶሶና።24ፆሳይ ሄሳ ኦዳይ፥ አብመለከይ ባ እሻታ ዎዳ ግሾነ ኤንታ ዎና መላ ሴከማ አሳይ እያ ምንዳ ግሾሳ።25ሴከማ አሳይ ጉ አስ ዶርድ ደርያ ሁጵያን ኡትድ አብመለከ ቦላ ሞርከተን ደንዳና መላ ኦዶሶና። ኤንቲ ኦገራ አያ አሳ ኡባ ቦንቅዶሶና፤ አብመለከይ ሄሳ ስእስ።26ሄ ዎደ ኤቤዳ ናአይ ጋል ባ እሻታራ ሴከማ ይን፥ ሴከማ አሳይ እያን አማነትዶሶና።27ኡባይ ባንታ ጋደ ብድ ዎይነ ማፅዶሶና፤ ዎይንያ አግድ ግታ ግብራ ጊግስዶሶና። ባንታ ኤቃ ኬ ገልድ ያን ምሸነ ኡይሸ አብመለከ ጫይዶሶና።28ኤቤዳ ናአይ ጋል፥ “ኑኒ ሴከማ አሳይ እያዉ ሃረታናዉ አብመለከይ ኦኔ? እ የሩባኣላ ናኣ ግደኔ? ዛቡል ሀ ካታማ ሃራና መላ አብመለከይ ሹምዳይሳ ግደኔ? ሄሳፈ ሴከማ ሼሽ ግድዳ ሀሞረ አሳስ ሃረታና።29ሀ አሳ ካለይ ታና ግድያኮ አብመለከ ድጋናሽን። አብመለከ ፄጋዳ፥ ‘ነ ኦላንቾታ ዳርሳ ኤካዳ ኦለታናዉ ሃያ’ ያጋናሽን” ያግስ።30ኤቤዳ ናአይ ጋል ግዳይሳ ካታማ ሃርያ ዛቡል ስእዳ ዎደ ዳሮ ይሎትስ።31ቆሳን አብመለከኮ አሰ ኪትድ፥ “ኤቤዳ ናአይ ጋልነ እያ እሻት ሴከማ ይድ ያን ደእያ አሳ ነ ቦላ ደንሶና።32ሄሳ ግሾ፥ ኔንነ ኔራ ደእያ አሳይ ቃማ ደንድድ እስ በሳን ዙግድ ናግተ።33ዎንተ ጋላስ አው ዶልያ ዎደ ኤንቲ ቆፖና ካታማ ኦልተ። ጋልነ እያራ ደእያ አሳይ ህንተና ኦላናዉ ከይያ ዎደ ህንተ ኮይዳ መላ ኤንታ ቦላ ኦተ” ያግስ።34አብመለከይነ እያራ ደእያ አሳ ኡባይ ቃማ ደንድድ ሴከማፐ ካረራ ኦይዱ ጩጋን ሻከትድ ዙግዶሶና።35አብመለከይነ እያራ ደእያ አሳይ ኤቤዳ ናአይ ጋል ከይድ ካታማ ፐንግያን ኤቅዳይሳ በእድ ቆሰትዳ በሳፈ ከይዶሶና።36ጋል አሳ በእዳ ዎደ ዛቡላኮ፥ “ሄኮ፥ አሳይ ደርያ ሁጵያፐ ዎስ” ያግስ። ዛቡል፥ “ሀይስ ደርያ ኤሾፐ አትሽን፥ አሰ ግደና” ያግድ ዛርስ።37ጋል ዛሪድ፥ “ሄኮ፥ አሳይ ደርያስ ግዱዋ ኦይክድ ዎስ፤ ሀራ ጩግ ቃስ ማሮታ ዎላይ ደእያ ኦግያራ ዬስ” ያግስ።38ዛቡል ጋላኮ፥ “ ‘ኑኒ እያዉ ሃረታናዉ አብመለከይ ኦኔ?’ ያግዳ ነ ዶናይ ሀእ አዉ ብዴ? ሀይሳቲ ኔኒ ካዳ አሳ ግዶኮናዬ? ሀእ ከያዳ ኤንታራ ኦለታ” ያግስ።39ጋል ሴከማ አሳ ካለ ከይድ አብመለከራ ኦለትስ።40አብመለከይ የደን ጋል ባቃትስ፤ ካታማ ፐንግያ ጋካናዉ ዳሮት ደሸትድ ኩንድዶሶና።41አብመለከይ አሩማን ደእን፥ ዛቡል ጋላነ እያ እሻታ ሴከማፐ የደድ ከስስ።42ዎንተ ጋላስ ሴከማ አሳይ ጎሻስ ብዳይሳ አብመለከይ ስእስ።43እ ባ አሳ ኤክድ ሄ ጩጋን ሻክድ፥ እስ በሳን ዙግድ ናጋናዳ ኦስ። አሳይ ካታማፐ ከየይሳ በእዳ ዎደ ኤንታ ዎናዉ ቆሰትዳ በሳፈ ከይስ።44አብመለከይነ እያራ ደእያ ጩጋይ ስን ዎፅ ብድ፥ ካታማ ፐንግያን ኤቅዶሶና። አትዳ ናምኡ ጩጋይ ጎሻን ደእያ አሳ ኦልድ ዎዶሶና።45ጋላስ ኩመ አብመለከይ አሳራ ኦለትድ ኦይክዳፐ ጉየ ካታማን ደእያ አሳ ኡባ ዎስ፤ ካታማ ይስስ፤ ቢታ ቦላ ማፅነ ላልስ።46ሴከማ አዱሳ ግምብያ ግዶን ደእያ አሳ ኡባይ ሄሳ ስእዳ ዎደ ባኣል-ባርታ ኤቃ ኬን ደእያ ጎንጎሉዋን ቆሰትዶሶና።47አብመለከይ ኤንቲ ያን ሺቅዳይሳ፥48ስእድ እነ እያራ ደእያ አሳ ኡባይ ሳልሞና ደርያ ከይዶሶና። አብመለከይ ካልታ ኤክድ ም ታሸ ቃንፅድ፥ ባ ሀሽያን ቶክስ። ባራ ደእያ አሳኮ፥ “ታኒ ኦሽን በእዳይሳዳ ህንተ ኤለስድ ኦተ” ያግስ።49አሳ ኡባይ ም ታሸ ቃንፅ ኤክድ፥ አብመለከ ካልስ። ሄ ታሸታ ሳአ ኬ ቦላ ዶርድ አሳይ እያ ግዶን ደእሽን ታማ ኦይዶሶና። እያን ደእያ አሳ ኡባይ ሀይቅዶሶና። ሀይቅዳ አደይነ ማጫሳ ታይቦይ እስ ሙኩሉ ግዳና።50አብመለከይ ተሜሳ ብድ ካታማ ተቅድ ኦይክስ።51ሄ ካታማ ግዶን እስ ምኖ አዱሳ ግምበይ ደኤስ። ካታማ አሳይ ማጭ፥ አደይ፥ ካለይሳትነ ሀራ አሳ ኡባይ አቶና ዎፅድ አዱሳ ግምብያ ግዶ ገልዶሶና። ፐንግያ ጎርድድ ግምብያ ሁጰ ከይዶሶና።52አብመለከይ ኦልሸ አዱሳ ግምብያ ጋክድ ታማን ፁጋናዉ ፐንግያኮ ሺቅስ።53ሽን እስ ማጫስያ አብመለከ ሁጰን ዎፃ ማይደ ሆላዳ እያ ጉግያ ጳልቃ የጋሱ።54እያ ኦላ ሚሽያ ቶክያ ናአተ ኤለስ ፄግድ፥ “አብመለከ ማጫስ ዎስ ጎናዳ ነ ማሻ ሾዳዳ ታና ዎ” ያግስ። ያግን ናአተይ ጫድን እ ሀይቅስ።55እስራኤለ አሳ ኡባይ አብመለከይ ሀይቅዳይሳ በእድ ባ ሶ ሶ ብስ።56አብመለከይ ላፑን ታሙ ባ እሻታ ዎድ፥ ባ አዋ ቦላ እ ኦዳ ጎምያ ፆሳይ እያ ቦላ ዛርስ።57ፆሳይ ሴከማ አሳ ኢታተ ኡባ ኤንታ ቦላ ዛርስ። ሄሳዳ ሀንድ ገድዮና ናአይ እዮአታም ባድዳ ባደይ ኤንታ ጋክስ።