Gedeón Madián aentsun apuji aidaun achija yajuakbau
1Gedeón Madián aents aidaujai maaniatatus, tikich Israel aents aidaunak chichama akuptuk ujayatak, Efraín wegantu aidaunak ujakchauwai. Dutikayatak imapam ujakui shiwajan pataetuktinme tusa. Nuadui kajekag Gedeógjai jiyaniku ainawai.2Tusa tiagtai Gedeón ditan ayaak: “¿Atum dekas mina nagkaetasu dutikaujum duka dekatsjumek? Atum aidautijum ujumak dutikaujum duka ii aidauti kuashat dutikamua nuna nagkaesauwai.3Apajuí atumnak Madián aents aidaun apuji aidau Orepan, Zeebjai achiktinme tujabiu asamtai achikugme. Tuja wika atum dutikaujum imannakesh dutikachjai”, tiuwai Gedeón. Aatus timatai nuna Efraín wegantu aidau antukag kajekbaujin tsagkujajui.4Nunikagmatai Gedeógkak niina suntaji trescientos aidaujai shiwajan aintuinak pimpikiaju ainayatak, namak Jordágnum jegawag atú amain katiaju ainawai.5Nunikag yaakat Sucot tutainum jegawag, Gedeón nuwiya aents aidaun chichajak: “Wait aneasjum aents wijai yuja nunú yutai ajamjuttsatajum, ditak pimpiki yawekag mininawai. Iik Madiágnumia apu aidau Zébah Salmunájai achiktasa ainku yujaji”, tiuwai.6Tutai Sucotnumia apu aidau chichajuinak: “Amina aentsjum aina duka yujumkak ajamsashtatji, wagki eke Zébah Salmunájaig achikchaugme”, tuidau.7Tusa tiagtai Gedeón ditan ayaak: “¡Apajuí yaintsamtai Zébah Salmunájai achika waketkun, numi jagkigtin aidaun zarza aidaujai uwegshunum ayá nuna yajuakan atumnak asutkattajime!” tiuwai.8Aatus tusa nuwiya juwakiag jegawajui yaakat Penuelnum. Nunikag nuwishkam yaakat Sucotnum sumakbaunak dutiksag yutain sumakui. Tujash Penuelnumia aidaushkam Sucotnumiajai betek tiajui.9Nuadui Gedeón ditan chichajak: “¡Juju yaaktanum kumpin jiikbau waja junak wi depetmaka waketkun ajaka ajuattajai!” tiuwai.10Zébah Salmunájai yaakat Carcornum atú amain etsa minitaiya nuni quince mil suntag aidaujai batsatu, wagki ciento veinte mil suntag maaniamunum jinawaju asamtai.11Nunik batsatai Gedeógkak niina suntaji aidaujai jinta uwegshunmanini wegaunum yaakat Nóvah nuigtu Jogbehá aatus aajakua nuna yantamen etsa akaetaiya nuni shimutkauwai. Nunik jegajuawag anenjas batsatun jetekajui.12Dutika jeteam Zébah Salmunájai jiinki tupikakiajui. Nunikmatai Gedeón pataetuk amayag mai achikui. Nuna dutikamtai shiwag aidauk shiig senchi ishamkajui.13Nunik Gedeón maania depetmak nugka yaijuch Heres tutai aajakua nuni wakitkiuwai.14Nunik wenak nunú nugkanum makichik datsauch yaakat Sucotnumia pujaun achika juki kuashat iniasui. Tusa iniam Sucotnumia apu setenta y siete aajaku aina nuna daajin ashí adaitujui.15Tusa ujakam Gedeón nuna dekaa Sucotnum weuwai. Nunik jegaa nuwiya aents aidaun chichajak: “¿Atumesh aneakjumek Zébah Salmunájai achikchaugme tusajum dushiktibiujum dusha? Tuja ¿atumesh aneakjumek Zébah Salmunájai achikchaugme tusajum mina aentsug aidau yaweja pimpiki minidau dekayaitkujum yutai ajamsachbaijum dusha? ¡Pai yamaik achikan juwi itaajai!” tiuwai.16Nuna tusa Gedeón apu Sucotnumia aidaun suwimka suwak jagki aidau, zarza aidaujai uwegshunmaya yajuakbauwai asutkauwai.17Tuja nuigtushkam kumpin jiikbau yaakat Penuelnum wajattaman ajak ajuauwai. Nuwiya aents aidaunashkam kajegkui.18Dutika Zéban Salmunájai iniak: “¿Atum muja Tabornumia aents aidau amukuitjum dusha wajuku aajabi?” tau. Tusa tama dita aimainak: “Amejai betek agmayi. Maki makichik aents aidauk apu tumain agmayi”, tuidau.19Tusa tiagtai Gedeón senchi untsumak: “¡Mina yatsug emkau aidau! ¡Dekas mina yatsug emkau aidau kajegkuitjume! Nuadui Tuke Pujuu daajin tajime, atum dita maachuitkugminig, wisha atumnak yamaik maubaitsujime”, tiuwai.20Nuna tusa inagnamuik niina uchiji emkau Jéter aajakua nuna ame maata tusa inajui. Tujash Jéterak eke tsakatuch asa ishamak maumainchau dekapjauwai.21Nunitai Zébah Salmunájai Gedeógkan chichajak: “¡Amek dekas mai mantuata! ¡Aentsuk niina wajiujin dekatia!” tuidau. Tiagtai Gedeón jegantun mauwai. Dutika Zébah camelloji Salmuná camellojijai kuntujen waji pegkeg apeekamu aidaun yajutkauwai.22Dutikamtai Israel aents aidau Gedeógkan chichajuinak: “Madián aents aidau waitkagmaidau ame ayamkagtukam agkanmitkagtuau asam ame, tuja ame wegantu aidaujai iina apuji atajum”, tiajui.23Tusa tama Gedeón ditan ayaak: “Wika atumi apujig achattajai. Tuja mina uchigkesh atumi apujig achattawai. Atumin apujig Tuke Pujuu atatui.24“Untsu atum shiwag aidau maakjum ditá patakumtaiji aidau yajutkaujum nuna segajime mina sujustinme tusan”, tiuwai. Tuja nunú suntag aidauk uwegshunum batsamin asag patakumtai oro najanamun tuke patakumajaku ainawai.25Tusa timatai Israel aents aidauk jáanchin nugká ainak nuwi patakumtai yajuakbaun batsasajui. Dutikawag Gedeógkan chichajuinak: “Pai, juju jukita”, tiajui.26Nunú patakumtai oro najanamu aidauk diecinueve kilo tumain aajakui. Untsu apu aidaun iwagmamtaiji, nugkutaiji nuigtu jáanch yamakaitkau aidau aatus duka dekapachbau aajakui. Tuja camello anujamu aidaushkam dekapachbau aajakui.27Nunú oro yajuakbauwai Gedeón sacerdote nugkutain dakumak najanauwai. Dutika niina yaaktajin Ofrá ejegauwai. Nuna Israel aents aidau ashí emematuinak Tuke Pujuu ememattan idaisau ainawai. Tuja Gedeógkak pegkegnap dutikaja tukama, nuna niina patayi aidaushkam emematuidau asamtai, niinishkam pegkegchau aajakui.28Dutika depetkamu asag Madián aents aidauk Israel aents aidaunum yunumag batsamajaku ainawai. Nuadui yaunchuk aajakbaunak betekchau tiki wainkauch juwakajui. Tuja Gedeón iwaku pujusmataig, nunú nugkanmak cuarenta mijan maanitsuk batsamsau ainawai.Gedeón jakamu
29Gedeón Jerubaal tuuta awagmatai aajakua duka niina jeen wakitki pujusui. Nuwi pujus setenta uchin akigkui, tuja niina nuweshkam kuashat aajakui.31Tuja niina ikaa nuwe Siquem pujujakua dushakam makichik uchin uchigmakui. Dutikamtai Gedeón nunú uchi daajin Abimelec adaikauwai.32Gedeógkak shiig muumpaki jakauwai. Nunik jakamtai, niina apaji Joása ukumataiji Abiesel wegantu aidau batsamtai yaakat Ofrá aajakua nuwi ukusajui.33Gedeón jakamtai batsamas Israel aents aidauk Baal dakumka najanamu aidaun emematuinak Apajuí ememattanak ataktu idaisajui. Tuja dita apajuímawagtinnak Baal-berit aajakua nuna etegkawag nuna emematujaku ainawai.34Nunidau asag ditan shiwag waitkagtai Tuke Pujuu Apajuí ayamjukua nunak kajimatki idaisajui.35Gedeón tikich daaji Jerubaal aajakua nunú ditan ayamjak kuashat takasu aig, niina patayi aidaunash wait anenjachu ainawai.