Gediyoona
1Isra7eele asay Godaa sinthan zaaridi iitabaa oothidosona. Hessa gisho, Goday enta Midiyaame asaas aathidi immin laapun laythi enta haaridosona.2Midiyaame asay Isra7eele asaa un7ethin, entafe attanaw dere bolla, gongoloninne hom7on banta katha qosidosona.3Isra7eele asay kathi zeriya wode ubban, Midiyaame asay Amaaleqa asaaranne doloha bagga asaara yidi enta oloosona.4Enti he biittan dunkaanidi, Gaaza gakanaw, biitta bolla dolidaba ubbaa dhaysoosona. Dorse, mehenne hare laaggidi efiya gisho, Isra7eele asaas aybaka ashshokona.5Banta mehiyanne banta dunkaaniya ekidi, booley yada daridi yoosona. Entanne enta gimaleta taybanaw danda7etenna; enti yishe biitta dhaysoosona.6Isra7eele asay Midiyaameta gaason daro metootidosona; maade demmanaw Godaako waassidosona.7Midiyaameta gaason Isra7eele asay Godaako waassida wode,8Goday entaw issi nabe Kiittin, nabey entako, “Goday Isra7eele Xoossay haysada yaagees; Gibxefe, aylletetha biittafe ta hintena kessas.9Taani hintena Gibxe asaa kushepenne un7ethiya asa ubbaa kushepe ashshas. Hinte sinthafe un7ethiya asaa gooddada enta biitta hintew immas.10Taani hintena, ‘Taani Godaa hinte Xoossaa; hinte enta biitta laattida Amooreta xoossata goyinnofite’ yaagas. Shin hinte ta qaala si7onna ixideta” yaagis.11Hessafe guye, Godaa kiitanchoy Ofira geetetiya bessan de7iya Abezeera addiya Iyo7aasa wolaa garsan uttis. He wode Iyo7aasa na7ay Gediyooni Midiyaame asaape qosetedi woyne gum7iya bessan giste bukees.12Yan Godaa kiitanchoy iyaw qoncidi, “La neno, mino olanchaw, Goday neera de7ees” yaagis.13Gediyooni, “Ta godaw, Goday nuura de7iyaba gidiko ha meto ubbay nuna ayis gakidee? Nu aawati, ‘Goday nuna Gibxe biittafe kessis’ yaagidi nuus odida malaalsiya iya oosoti ubbay awun de7ii? Shin ha77i Goday nuna kumethi aggis; Midiyaame asaas aathidi immis” yaagis.14Hessafe guye, Goday iyako simmidi, “New de7iya ha wolqan bada Isra7eele asaa Midiyaame kushepe ashsha. Nena kiittey tana” yaagis.15Gediyooni zaaridi, “Abeeti Godaw, taani Isra7eele asaa waatada asho? Ta yaray Minaase kocha ubbaafe aadhida laafa; taani ta aawa soo asa ubbaafe guutha” yaagis.16Goday, “Taani neera gidana; issi asi shociya mela neeni Midiyaame asaa shocada xoonana” yaagis.17Gediyooni, “Neeni tanan ufaytiyaba gidiko, tuma taara odetey neeni Godaa gidiko, nena erisiya malla tana bessa.18Taani guye simma bada ta yarshuwa ehana gakanaw hayyana haysafe boopa” yaagis. Goday, “Neeni simmana gakanaw taani haysan naagana” yaagis.19Gediyooni soo gelidi, urge deeshi shukidi kathis; tammu kilo giraame gidiya dhiille ekidi uythi uukis. Ashuwa gaytan wothidi, cambaa shaaten tigidi, wolaa garsan uttida Godaa kiitanchuwas shiishis.20Xoossaa kiitanchoy, “Ashuwanne uythaa ha shuchaa bolla wotha; cambaa iya bolla tiga” yaagis. Gediyooni kiitetidaysada oothis.21Godaa kiitanchoy ba kushen oykida xam7aa xeeran ashuwanne uythaa bochin tami shuchaa giddofe keyidi, ashuwanne uythaa mis. Hessafe guye, Godaa kiitanchoy iya sinthafe geemmis.22Gediyooni be7iday Godaa kiitanchuwa gideysa akeekida wode, “Godaa Xoossaw, tana ayye! taani Godaa kiitanchuwa ta ayfen be7as” yaagis.23Shin Goday, “Saroy new gido; Yayyofa! Ne hayqaka” yaagis.24Gediyooni Godaas yarsho bessi yan giigisidi, “Goday Saro Xoossi” yaagidi xeegis. He yarsho bessay Abi7ezeera kochaaba gidida Ofiran hachi gakanaw eqidi de7ees.25He qamma Goday Gediyoonako, “Ne aawa kormatape laapun laythi gidida lo77o korma eka. Ne aaway Ba7aale eeqas yarshiya bessaa laalla; iya matan de7iya Asheera eeqa misiliya mentheretha yegga.26Ha zumaa huuphen Godaas ne Xoossaas, shuchan yarsho bessi loythada giigisa. Hessafe guye, neeni mentherethida Asheera eeqa misiliya qeretha eethada, he kormaa xuussa yarsho oothada yarsha” yaagis.27Gediyooni ba oosanchotape tammata ekidi, Goday iyaw odidaysada oothis. Shin I ba aawa soo asaasinne kataman de7iya asaas yayyida gisho gallas oothanaysa aggidi qamma oothis.28Wonta guura katamaa asay dendiya wode Ba7aale eeqa yarsho bessay laaletin, iya matan de7iya Asheera misiley meqidi wodhidaysa be7idosona. Qassi he bessan yarsho bessi giigidaysanne iya bolla korma yarshidaysa be7idosona.29Enti issoy issuwa, “La haysa oothiday oonee?” yaagidi oychidosona. Enti hessa pilgidi be7ida wode hessa oothiday Iyo7aasa na7aa Gediyoona gideysa eridosona.30Hessafe guye, katamaa asay Iyo7aasako, “Ba7aale yarsho bessa laallida gishonne iya matan de7iya Asheera misiliya mentherethidi yeggida gisho ne na7aa haa kessa; nu iya wodhana” yaagidosona.31Shin Iyo7aasi ba bolla dendida asaako, “Hinte Ba7aales mootetetii? Woyko hinte iya ashshanaw koyeetii? Hinte giddofe iyaw mootetiya asi de7iko, sa7i wontanaw I hayqo. Ba7aaley xoosse gidiko ba yarsho bessa laallidaysara I baw mooteto” yaagis.32He gallas Iyo7aasi, “Laaletiday iya yarsho bessa gidiya gisho iyara Ba7aaley mooteto” yaagidi Gediyoona Yeruba7aala gidi sunthis.33Hessafe guye, Midiyaame, Amaaleqanne doloha bagga biitta asay issife shiiqidi, Yordaanose shaafa pinnidi Izra7eela zangaaran dunkaanidosona.34Godaa Ayyaanay Gediyoona bolla wodhin Abi7ezera kochi gidida asa ubbay bana kaallana mela enta xeeganaw moyze punnis.35Minaase kocha ubbaas kiita yeddidi, bana kaallana mela enta xeegisis. Qassi Aseera, Zabloonanne Niftaaleme kochatas kiita yeddin, enti iyara olas baanaw keyidosona.36Gediyooni Xoossaako, “Ne taw qaala gelidaysada Isra7eele asaa ashshanaw tana dooridaba gidiko,37Heko, taani giste bukiya wudumman paadetida dorse ikise wothana. Hara biitta ubbay mela gididi he ikisiya bolla xalaala aki wodhiko ne odidaysada Isra7eele asaa ta kushen ashshanaysa ta erana” yaagis.38I gidaysada hanis. Wontetha gallas wonta guura dendidi, dorsa ikisiya gum7ida wode issi xaaro gidiya haathi iyape keyis.39Qassi Gediyooni, “Hayyana hanqetofa; taani nena gujadaka hara oysho oychana. Dorsa ikisiya bolla hara malla bessaana mela oychayis. Ha77i dorsa ikisey mela gidin yuushuwan de7iya biittay akatidi laakanada ootha” yaagis.40He qamma Xoossay he malla oothis. Wontetha gallas dorsa ikisey mela gidin biitta ubbay akatidi laakis.