Řquḍat5rif_lti
Izři n uɣelleb n Dabura d Baraq
1Deg wass nni ɣennjen Dabura d Baraq, mmis n Abinuɛam, nnan:2“Barkem SIDI i ijeṭṭayen n ucuwwaf ittwafessyen di Israil, s uṭewweɛ n řgens s řxaḍar!3Sřem, kenniw, ijeǧiden, sḥessem, kenniw, ayt n jjehd! Necc ad ɣennjeɣ izřan i SIDI, necc ad zehhdeɣ i SIDI, AREBBI n Israil.4A SIDI, umi Cek dd-teffɣed zi Saɛir, umi Cek tuɣa teggured zeg iyyar n Idum, tenhezz temmurt, yarjij ujenna, wah, uřa d iseynuten farrɣen-dd s waman.5Idurar fesyen zzat i wudem n SIDI, adrar nni n Sina, ifsi zzat i wudem n SIDI, AREBBI n Israil.6Deg wussan n Camjar, mmis n Ɛanat, deg wussan n Yaɛil, qqimen ibriden xřan, u inni tuɣa igguren x tebridin, ttekken imesraq iɛarrqen.7Imjaheden war qqimen, war qqimen di Israil, ařami kkareɣ necc, Dabura, ařami kkareɣ necc, yemmas n Israil.8Umi ifarz řgens irebbiten nneɣni, xenni tuɣa din ijj n umenɣi ineqqen ɣar tewwura. Taseddart n uɛeskar d uḥric, war ittwaẓri ɛad jar arebɛa-ařaf di Israil!9Uř inu ak-d imgewwaden n Israil, inni iṭewwɛen ixef nsen jar řgens s řxaḍar, lbaraka i SIDI!10A kenniw, inni innayen x teɣyař d ticemřařin, kenniw inni ittɣiman x tzarbiyyin d kenniw inni igguren deg webrid, siwřem x man aya!11S tmijja n imjebbaden n řqews i din jar wanuten, aqa ittwaseř wawař x tmegga iseggden n SIDI, timegga iseggden n umjahad n Israil. Xenni ihwa-dd řgens n SIDI ɣar tewwura n tendint.12Ḥḍat, ḥḍat, Dabura, ḥḍat, ḥḍat, siweř s yijj n izři! Kkar, Baraq, awi imeḥbas nnec, a cek, mmis n Abinuɛam!13Xenni ihwa kuř wi yarewřen ɣar ayt n jjehd n řgens, SIDI ihwa-dd ɣari ak-d ayt n bu-teɣruḍt.14Zeg Ifrayim usin-dd inni aẓwar nsen di Ɛamaliq u awarni ac yuyur Binyamin jar řɛeskarat n yewdan nnec. Zi Maxir hwan imgewwaden, u zi Zabulun inni iṭṭfen aɛekkaz n wenni iḥessben.15Řḥukkam n Issakar hwan-dd ak-d Dabura, uca am mammec ittwassekk Issaxar, ammu i ittwassekk uřa d Baraq di řewḍa n teɣzurt. Di řeṣfuf n Rubin tuɣa ixarriṣen n wuř d aṭṭas.16Mayemmi teqqimed jar iɣendifen, tessḥessed ɣar wesbuɛriy n tḥimriwin? Di řeṣfuf n Rubin ggin ad beqqcendeg wuř aṭṭas.17Jilɛad iqqim izeddeɣ x ujemmaḍ n L’Urdun u mayemmi iqqim Dan ɣar tɣarruba? Acir iqqim ɣar tma n řebḥar uca iqqim izdeɣ ɣar iftasen nnes.18Zabulun d ijj n řgens isebbeř tudart nnes ař řmewt, am t igga uřa d Naftali x řegɛudi n wazzay n umenɣi.19Ijeǧiden usin-dd, mmenɣen. Řexdenni mmenɣen ijeǧiden n Kenɛan di Taɛnak ɣar waman n Majiddu, maca war ksin takeccaḍt n nnuqart.20Minzi itran mmenɣen zeg ujenna, mmenɣen ak-d Sisara zi tebridin nsen.21Iɣzar n Qicun iwyi i-ten, tiɣzart n mecḥař uya, tiɣzart n Qicun! Uyur s jjehd, a řeɛmar inu.22Řexdenni nnxuxřent ticeḍyin n iysan zeg urabeɛ břa uqeṭṭu zeg ayt n bu-ṣṣulṭa nnes.23Neɛřem Miruz, inna lmalak n SIDI, neɛřem imezdaɣ nnes s ict n nneɛřet, minzi war dd-usin ḥima ad wcen afus i SIDI, ḥima ad wcen afus i SIDI s ayt n bu-teɣruḍt nsen.24Tettwabarek Yaɛil, tamɣart n Ḥabir, Aqini, sennej i marra timɣarin. Tettwabarek nettat sennej i marra timɣarin izeddɣen deg iqiḍan.25Netta ittar aman, nettat tewca as aɣi, tiwi as-dd trussi deg ict n ṭṭebṣi d ameqqran aṭṭas.26S ufus nnes tesswiẓẓeḍ ɣar řewted, afus afusi nnes ɣar wefḍis n ixeddamen. Nettat tewta Sisara, texbeḍ as x uzeǧif nnes, teřbez uca tessnuqqeb as aɣezdis n uzeǧif nnes.27Ikmummec jar iḍaren nnes, ibbuzzeř, aqa izzeř din. Aqa ikmummec jar iḍaren nnes, ibbuzzeř. Umi tuɣa ittekmummuc, iwḍa din, uca iwḍa-dd iřeqqef!28Zi řkazi nnes texzar-dd yemmas n Sisara uca tesɣuy jar iqḍiben n wuzzař ‘Mayemmi iɛeṭṭař ukarru nnes n umenɣi ammu aṭṭas? Mayemmi iɛeṭṭař ddriz n ikarruten nnes’29Inni d tiɣmisin aṭṭas jar tjeǧidin nnes arrint-i-dd, uca uřa d nettat simant nnes tarra-dd x min tenna:30‘Ma xenni nitni war ufin walu uca aqa aten war beṭṭin takeccaḍt? I kuř aryaz ijehden ict n teɛzarect niɣ tnayen n teɛzariyyin? Takeccaḍt n ikettanen ittwassqareqcen i Sisara, takeccaḍt n ikettanen ittwassqareqcen, aburḍa, řxedmet n umudi ɣar tnayen n iɣezdisen zeg ukettan ittwassqareqcen i irawen, am tkeccaḍt?’31Ammu i ɣa hellken řɛedyan nnec, a SIDI, maca inni Cek ittexsen ad iřin am tfuct i dd-ineqqaren di jjehd nnes.”Awarni aya tareyyeḥ temmurt arebɛin n iseggʷusa.