'Itsɨkate5hch_wb2

Rewura kwikarieya

1Mɨkɨ tukaritsie Rewura meta Waraki 'Awinuhani nu'aya mɨpaɨ mekateniukwika:2«Kepauka te'aitamete 'ixaheritsixi memɨte'aita,kepauka teɨteri yɨkɨmana memɨyuwaɨriya,Yawé 'aixɨa ke'itɨarieka.
3»Xekeneu'enana, te'aitamete. Xekene'enanaka xemɨte'aita.Ne nepɨtakwika, Yawé nepɨtanɨawa,nepɨtikayuitɨani Yawé hetsiemieme, 'ixaheritsixi wakakaɨyari.
4»Yawé, kepauka Tsehixi hetsie pemɨyetɨa,kepauka 'Erumi kwieyaritsie pemuyemiekai,kwie putayua,muyuawitsie mepɨwatayua,haiwitɨri haa putayeuri.5Hɨrite putiyɨyɨakaxɨYawé mexeiyatɨ, Kakaɨyari Tsinahi kiekame,Yawé mexeiyatɨ, 'ixaheritsixi wakakaɨyari.
6»Kepauka Tsamɨkaxi muyeikakaitsie 'Anati nu'aya,kepauka Kaheri muyeikakaitsie,kɨkamete huye mekaniuku'eirieni'axamɨtiu'anetsie mekaneukuyune.7Memeuyutakwiwawekai 'Ixaheri hetsɨa miemete mekaniukumaware,mepumawekai, kepaukake ne nemanukuke,Ne, Rewura, nepanukuke'ixaheritsixi wamaama hepaɨ.8Kepauka kakaɨyarixi hipame memɨwaranayexei,kuyaxa ninuani kiekari kitenie,huta tewiyari miriyari (40.000) 'ixaheritsixi nepɨwaruxeipitsika mepɨkahexeiyakai meta kɨmana memɨyukunarɨma tepɨa.9'Ixaheritsixi memanuyetei wahamatɨa ne'iyari puyeika,memɨyuwaɨriya wahamatɨa.Yawé 'aixɨa ke'itɨarieka.
10»Xeme puxuri memeutuxatsie xemanutiyaxike'ixuriki xe'anayeweratɨ xemayaxike,xemeta, huyeta xemuhu,mɨpaɨ xeketeku'eriwani.11Kwikari mayuane tewaxi mematiharewetsie,Yawé heitserie kemɨtiuyuri pɨtikuxata,kuyaximama 'ixaheritsixi ke'aixɨa memɨteyurie.Hikɨ Yawé kuyaximamamekaniu'axɨani kiekari kitenie.
12»Rewura, kenanutanieri, kenanutanieri.Kenanutanieri, kenanutanieri, kwikari keneutakwika.Kenanukukexi, Waraki 'Awinuhani nu'aya,'apɨretsutsixi keniwaranuhapani.
13»Memutawikwei wa'ukiyarimate'aitamete wahetsɨa mekanekɨne,Yawé kuyaximamanehetsɨa mepu'axɨa kwinimieme memɨteyɨwawe.14Hipatɨ 'Epɨrahini hetsie mekanayenexɨanimeta 'Amareki nuiwarieyatsie,Wenikamini xiɨyarimama mepɨwanɨkai 'iya memɨxe'uweiyakai.Makixi memakanexɨa kuyaxi memanuyetei,Tsawuruni memayenexɨa, 'itsɨ ti'aitame memu'ɨ.15Rewura hamatɨa matɨari te'aitamete mepuhukai 'Itsakaxi xiɨyarimama.'Itsakaxi Waraki hamatɨa kaniuyeikakaitɨni,mɨkɨ 'utɨa kaneyani mayeweritsie paitɨ.Xuweni kuyaximama mariwemekɨ mete'utaxatakayamepɨkatekakɨ.16Matsi pɨta yukie mekanitiyaxe me'atinaitɨmuxatsi wahɨwemete wahiwari wawikɨari meta'enietɨ.Xuweni nuiwarimamaniuki mekanixɨatɨakaitɨni.17Karaha Kurutani manuyeka matsi humapaitɨ kaniukateitɨni.Rani, ¿titayari nawiyatsixi wahamatɨa tiuyuhayewaxɨ?'Atsexi, haramara tetsita kaniuyuhayewa,haramara meutawetɨkatsie kaniuyuhayewa.18Tsawuruni teɨterimama yutukari mepɨyetuakepauka memukwi,Nepɨtahari kemuyɨhɨritsie meheyukukwika.
19»Te'aitamete me'u'axɨaka mekaniuyutakwini haa mayema Mekiru 'aurie,Te'aitamete Kanani miemete Tanaki mekaniuyutakwini,peru pɨrata mepɨkahetɨ meta kakuni kwinieraye'atɨ mɨrayepine.20Muyuawitsie xurawetsixi mekaniuyutakwini,memanuyeteitsie paitɨ me'uyetetɨ Tsitsara mekaniutamieni.21Haa kwinimieme mɨtitɨrɨkaɨye Kitsuni kaniwarehautsitɨani,haa xeiya muhane meripaimieme, Kitsuni kwinimieme mɨtitɨrɨkaɨye.Keneumieni, ne'iyari, 'atɨrɨkarima.22Muratsixi wakeya payuane,muwa mepanautsaxɨaxime, muwa mepanautsaxɨaxime kawayutsixi memɨtɨrɨkawi.23Yawé niuki tuayameya mɨpaɨ kaniutayɨni: “Merutsi 'axakeneuyuri 'iya.'Axakeniwaruyuri teuterimama waɨkawamekɨ,Yawé memɨkahekuparewikɨ,Yawé memɨka'uparewikɨ meta hetsɨana miemete memɨkawaruparewikɨ”.
24»Kaheri kehɨkɨtɨni, Hewexi Keni tewiyari 'ɨyaya,waɨkawa 'aixɨa mɨ'itɨarie,waɨkawa 'aixɨa mɨ'itɨarie xamaruta memeutei.25Tsitsara haa 'uta'iwauku, Kaheri retsi kani'itɨani,'aixɨa memɨte'u'iyari wawatsuta retsi kwamariekame kani'itɨani.26Yu'utakɨ kɨye kaniutikweni,yu'aixɨakɨ tepɨa titsuname tiutikwei.Tsitsara mu'uyatsie kaneitsuna,kanatana kananeni.27'Ɨkatɨana kaniukaweni,mana 'ukaweka mana kaniuhuni.Manuwekai kaniukaweni,mana kaniukaweni mɨkitɨ.
28»Tsitsara maamaya kii 'etsimayewatsie kananiere,waɨkawa 'iyarixietɨ mɨpaɨ katiniuhiwa:“¿Titayari kaxetaya hawaikɨ karamie?¿Titayari kaxetate wayuariya kara'eniɨriɨkɨ?”29'Ukarawetsixi kwinimieme memɨtemaiwawe mɨpaɨ mekaniutiyuani,mɨkɨta yaxeikɨa kanaineni:30“Mekateneyutapitɨwani piinite, tita memɨtewarenawairi:yuxexuime yatɨ yuhuhutame 'ukari yuxexuitɨ kuyaxi,'ixuriki witsimɨ'anene Tsitsara hetsiemieme,xeime 'ixuriki, yatɨ hutame, witsimɨ'anene muxutɨka nekɨipitɨamieme.Naitɨ 'ikɨ 'iya tiwapiinite”.
31»Mɨpaɨ mekete'ukwini yunaitɨ Yawé, memɨmatsi'aye'unie.Peru kemɨ'ane mɨmatsinaki'erie, tau hepaɨ ke'aneni kepauka maneika xawatɨtɨ».Hikɨ 'ixaheritsixi kayuwatɨ mekanexeiyakaitɨni huta tewiyari wiyari.
expand_more
Search