ድቦራነ ባራቃ
1ናኦድ ሀይቅዳፐ ጉየ እስራኤለ አሳይ ጎዳ ስንን ዛሪድ ኢታባ ኦዶሶና።2ሄሳ ግሾ፥ ጎዳይ ሀፆራ ካታማን ደእያ ካናነ ካዋ እያብሳስ ኤንታ አድ እሚስ። እያ ቶራ ሞጮናይ ሀሮሴት ሀጎይማ ካታማን ደእያ ስሳራ።3እያብሳስ ኡዱፉን ፄቱ ብራታ ፓራ ጋረት ደእያ ግሾነ እ እስራኤለ አሳ ቃይ ባይና ላታሙ ላይ ኡንኤዳ ግሾ ኤንቲ ማዶ ደማናዉ ጎዳኮ ዋስዶሶና።4ሄ ዎደ ላፍዶታ ማችያ፥ ናብያ ድቦራ እስራኤለ አሳ ካለዉስ።5ድቦራ ደረይ ዳርያ ኤፍሬማ ቢታን፥ ራማፐነ ቤተለፐ ግዶን ደእያ ድቦራ ዛምባ ጋርሳን ኡታዳ ፕርዳዉሱ። እስራኤለ አሳይ ፕርዳ ደማናዉ ኢኮ ዮሶና።6እስ ጋላስ ድቦራ አብኖማ ናኣ ባራቃ ንፍታለመ ቢታን ደእያ ቃደሳፐ ፄግሳዳ፥ “ጎዳይ እስራኤለ ፆሳይ ነና ሀይሳዳ ያግድ ኪትስ፤ ‘ንፍታለመነ ዛብሎና ዛርያፐ ታሙ ሙኩሉ አሳ ኤካዳ ታቦረ ዙማ ቦላ ከያ።7ታኒ ያብና ቶራ ሞጮናታ ስሳር ፓራ ጋረታነ ኦላንቾታ ኤክድ፥ ቅሶና ሻፋን ነና ኦላናዉ ያና መላ ኦና። ያን ታኒ ነዉ እያ አዳ እማና’ ያጌስ” ያጋሱ።8ባራቅ፥ “ኔኒ ታራ ቢኮ ታኒ ባና፤ ሽን ኔኒ ታራ ቦና እፅኮ ታኒ ቢከ” ያግስ።9እያ ዛራዳ፥ “ኤሮ፥ ታኒ ኔራ ባና፤ ሽን ጎዳይ ስሳራ ማጫሳ ኩሸን አድ እማና ግሾ ታ ቡሳይ ነዉ ቦንቾ ግደና” ያጋሱ። ሄሳ ግሾ ድቦራ ደንዳዳ፥ ባራቃራ ቃደሳ ባሱ።10ባራቅ ንፍታለመነ ዛብሎና ኮቻታ ቃደሳ ፄግን፥ ታሙ ሙኩሉ አስ እያ ካልድ ከይስ፤ ድቦራካ እያራ ባሱ።11ሄ ዎደ ቄና አስ ግድዳ ሄቤር፥ ሙሰ ቦሎይ፥ ሆባባ ያራይ ሀራ ቄናታፐ ሻከትድ ቃደሳ ማታን ዘናንመን ደእያ ዎላ ማታን ባ ዱንካንያ ቶክስ።12አብኖማ ናአይ ባራቅ ታቦረ ዙማ ብዳይሳ ስሳር ስእዳ ዎደ፥13ኡዱፉን ፄቱ ብራታ ፓራ ጋረታነ ባራ ደእያ አሳ ኡባ ፄግስድ፥ ሀሮሴት-ሀጎይማፐ ቅሶና ሻፋ ሺሽስ።14ያትን ድቦር ባራቃኮ፥ “ሀች ጎዳይ ስሳራ ነ ኩሸን አድ እምያ ጋላስ ግድያ ግሾ ደንዳ። ሄኮ፥ ጎዳይ ነዉ ስን አስ” ያጋሱ። ባራቅ ታሙ ሙኩሉ ኦላንቾታ ካለድ፥ ታቦረ ዙማፐ ዎስ።15ጎዳይ ስሳራ፥ እያ ፓራ ጋረታነ እያ ኦላንቾታ ኡባ ባራቃ ማሻስ አድ እሚስ። ያትን፥ ስሳር ባ ፓራ ጋርያፐ ዎድ ቶሆን ባቃትስ።16ባራቅ ፓራ ጋረታነ ኦላንቾታ ሀሮሴት-ሀጎይማ ጋካናዉ የደስ። ስሳራ ኦላንቾት ኡባይ ማሻን ሀይቅዶሶና፤ እስ አስካ አትቤና።17ሄ ዎደ ሀፆራ ካዎይ ያብን ሄቤራ ኬ አሳራ ሳሮ ደኤስ። ሄሳ ግሾ፥ ስሳር ቶሆን ባቃትድ፥ ቄና አስ ግድዳ ሄቤራ ማቸ ያኤል ዱንካንያ ጋክስ።18ያኤላ ስሳራ ሞካናዉ ከያዳ፥ “ታ ጎዳዉ፥ ገላ፤ ሃ ገላ፤ ያዮፋ” ያጋሱ። እ ዱንካንያ ግዶ ኢኮ ገልን እያ አፍላራ ካማስ።19ስሳር፥ “ታና ሳሜስ፤ ሃ ታና ኡሻርክ” ያግስ። እያ ማ ኦጎሮ ዶያዳ ኡሻሱ፤ ያታዳ ዛራዳ ካማሱ።20ሄሳፈ ጉየ፥ እ፥ “ዱንካንያ ፐንገን ኤቃ። አይ አስካ ይድ፥ ‘ሀይሳን አስ ደኢ?’ ያግድ ኦይችኮ፥ ‘ባዋ’ ያጋ” ያግስ።21ስሳር ዳሮ ዳቡርዳ ግሾ ስኮ ሀይቅ አግስ። ሄቤራ ማችያ ያኤላ ናርቃነ ዱንካነ ሸ ኤካዳ፥ ሎዳራ እያኮ ሺቃዳ ሽያ ሀይ ካረን ሻዳ፥ ሳአራ ኦይን ስሳር ሀይቅስ።22ባራቅ ስሳራ ኮይሸ ይን፥ ያኤላ እያ ሞካናዉ ካረ ከያዳ፥ “ሃያ፤ ነ ኮይያ አድያ ታኒ ነና በሳና” ያጋሱ። ሄሳ ግሾ፥ ኢራ ዱንካንያ ግዶ ገልድ፥ ስሳራ ሀይ ካረን ሸይ ገልን እያ አሀይ ሳአን ዝንእዳይሳ በእስ።23ሄ ጋላስ ፆሳይ እስራኤለ አሳይ ካናነ ካዋ ያብና ፆናና መላ ኦስ።24ያብና ካዋ ይሳና ጋካናዉ እስራኤለ አሳይ እያ ቦላ ምን ምን ብስ።