1Ɗiski wa nik sikɗukaat to, ɗu ɓi heɗ raak-raak ci ! Fuɗaat ! Wililkaat sagu moɗaaɗiici rahsan ɗu !2Raak-raakiŋ ɗu nopiɗ ! Kulɓaaciŋ ɗu cangndiɗ !3Ursiŋ ɗu na haalsiŋ ɗu hoyiɗ, te hoyi ca hoy weɗ teeɓohan ɗu ! Hoyeem hey ambe faan ciŋ ɗu po wa ñam ca findi yongkaah. Ɗu ɓii nangɗoh raak-raak te ɓoo ɓeɗɗi ngaŋ reehiŋ Adina.4Ɗu sangiɗ wirind pangkoh ci na nguɗɗee ɗu yohon ciŋ ɗu. Sikɗukaat wirndeem ! Wa leehkiɗ, te leehuk ciŋ nguɗoh ceem reyiɗ ŋ nof ciŋ Kooh, Heɗ malaakaaci.5Ŋ kehƴi, ɗu na pesohe neɓiɗ na moɗiɗ, ɗu na yafalke yafaluk haa ɗoopti na sekɗohse mbehi a hoosohsan.6Ɗu na ambe amb ɓoyi yurah, ɗu ap ɗe, te a na ndengsiɗkoheeɗi na ɗu.
Min muñ
7Ɓaah ciŋ ngo, muñaat, ɗu sekee po Heɗi hayis. Markaat ŋ guurohi findi a na muñohe, a sekee nguɗ ci a oolkoh, ŋ toɓ ci koc po ŋ ci mirndoh.8Namaat min sek te ɗu ndengɗuk ; hayisiŋ Heɗi mand na reyiɗ.9Ɓaah ciŋ ngo, ali ɓo' kanaat lahtuk ŋ morom ce wala ɗu hey atte'se ; atte'ohi a yi ŋ yahndeeri.10Ini kaɗ ŋ miskiɗ ci na min muñ, markaat ŋ woosuuɗ ci woyee ŋ tiikiŋ Heɗi.11Ɓi genee ndengɗuk, ɓeɗ ɓoo amb ne ɓa neɓɗiɗ. Ɗu kerhiɗ findi Ayooɓagenohee ndengɗuk, na ini Heɗi on ɗe ŋ mirndaani. Heɗi riifiɗ na baah na yirmoh.
Ini nik ŋ kiim Kooh
12Ɓaah ciŋ ngo, kanaat giñ muk ngaŋ Eel ci wala ngaŋ kehƴi wala ngaŋ in wiiriis nu wa min nikoh ɗah. Ɗu woo "ee" ɗah, wa nikaat "ee" te ɗu woo "a'aa" ɗah, wa nikaat "a'aa" ; ne Kooh atte'uu ɗu.13Ɓo' nga ɗu nik ŋ miskiɗ ɗah, a kiimaat Kooh. Ɓo' sum ɗah, a ƴeekaat Kooh.14Ɓo' nga ɗu kosaay ɗah, a ɓeeɗkaat yakak ci adgoh ɗu, ɓa kiimiɗ ɗe Kooh, ɓa ambsoha na reefiɗ ɗe diw ŋ tiikiŋ Heɗi.15Kiimi ɓa kiiman na kos hey ɗe mucɗe. Heɗi hey ɗe kurkiɗe. Wa raak ɗe raakiɗ bakaaɗ ɗah, Heɗi hey ɗe ɗaase.16Mbaa, woytiɗohaat bakaaɗ ciŋ ɗu ŋ harmban ɗu, te yaa nu nga kiimɗee morom ce Kooh ne ɗu min wir. Kiim ɓo' yurhiɗ raakiɗ hatil lool.17Ilyas nikee ɓo' findi ɓoo, a kiimmba na hatil ne wa kanaat toɓ. Masuɓ keenɗi ŋ kehƴi ini ree kiis kaahay na camban.18Ƴutta a kiimissa ne wa toɓ. Wa toɓpa, kehƴi eɗohha in.19Ɓaah ciŋ ngo, ɓo' nga ɗu muuƴ, a us keeh ki ; ɓo' wiiriis dokin ɗe nga ɗah,20inhaat ne a mucɗiɗ kiñin kiŋ ɓoyeem te bakaaɗ laayiɗ hey ulse saguuce.