Icaɛya9rif_lti
Axřaq n Lmasiḥ
1“Řgens i iddaren di taǧest, ad iẓar tafawt tameqqrant. Tiwa nni izeddɣen di temmurt n tiři n řmewt ad tareɣ tfawt.2Cek ad temmarnid di řgens u ad tessemɣared řefraḥet. Nitni ad farḥen zzat i wudem nnec am mammec farḥen ɣar tmeyra, am mammec arecgen xmi beṭṭan takeccaḍt ...3maɣar azayřu n ddqeř nnes d weɛmud x teɣruḍt nnes d uzeǧaḍ n uweqqaf nnes, aqa tarẓid ten am deg wass n Midyan,4maɣar kuř řbuṭa nni yudfen deg uzehhar n umenɣi u kuř apartessu nni marɣen deg idammen, ad ittwassarɣ, ad yiři d macca i tmessi,5maɣar ittwaru aneɣ-dd Uḥenjir, immewc aneɣ Mmis uca řeḥkamet tᵉttwassars x teɣruḍt nnes u ttřaɣan as Isem nnes: Řeɛjeb, Amcawar, Arebbi Ijehden, Babas n Řebda, Řḥakem n Řehna.6I řemɣaret n řeḥkamet nnes u i řehna nnes war ittiři qeṭṭu x řɛarc n Dawud u x tgeldit nnes, ḥima ad tᵉttwaḍmen u ad tᵉttwassejhed s řḥeqq d tsegda, zi řexxu ař i řebda. Acḍar n SIDI n řɛeskarat ad igg aya.”Afus n SIDI ḍidd i Ifrayim7“Sidi inu issekk awař ḍidd i Yaɛqub uca iwḍa di Israil.8Marra řgens ad t issen, Ifrayim d imezdaɣ n Samarya nni iqqaren s nnfaxet u s wuř iccuren s ukebbar:9‘Reḥyuḍ n llajur wḍan, maca ad ten nebna ɛawed s tṣuḍar ittwassuydan. Urtan n řexřa ttwazedmen, maca ad neẓẓu ticejjura n tengelt deg wemcan nsen!’10Ad xas issekkar SIDI iɣrimen n Raṣin u Netta ad issehweř řɛedyan nnes xas.11Aram zi ccarq u Ifilisṭiniyyen zi ḍeffar, ařami nitni ad ṣarḍen Israil qaɛ. S marra aya war yarexxu weɣḍab nnes, maca afus nnes iqqim isarreḥ,12maɣar řgens war dd-idikkwiř ɣar wenni t iwtin u nitni war arezzun SIDI n řɛeskarat.”13“Ad iqess SIDI zi Israil azeǧif d ukennas, taseṭṭa n tini d uɣanim, deg ijj n wass.14Awessar d wenni umi ɣa yiři ccan, aqa aten d azeǧif, uca anabi nni isseřmaden ixarriqen, netta d akennas.15Maɣar imgewwaden n řgens-a d imɣekkʷayen u inni zzaysen ittwanedhen ad ttwaṣarḍen.16X uya war ifarreḥ Sidi inu x iḥudriyyen nsen, u war yareḥḥem x iyujiřen d tejjař nsen, maɣar marra nitni d imnafqen d iɛeffanen u kuř aqemmum issawař tubbuheřya. S marra aya war yarexxu weɣḍab nnes, maca afus nnes iqqim isarreḥ.”17“Maɣar tuɛeffna tareqq am tmessi, tᵉttett isennanen d tzeggʷart, tessreqqa ixeccaben n wezɣar, ařami ttgeɛɛaden di ddexxan.18S uduqqez n ufugem n SIDI n řɛeskarat ad issqusbar tammurt uca řgens ad yiři d macca n tmessi. Uřa d ijjen war ittḥiwiř x wenneɣni.19Waxxa bnadem inehhec ɣar yefus, ad iqqim iǧuz. Waxxa ittett ɣar uzeřmaḍ, war ttyiwinen nitni. Kuř ijj ad isarḍ aysum n uɣiř nnes.20Manassa ad isarḍ Ifrayim u Ifrayim ad isarḍ Manassa uca tnayen idsen munen ad iřin ḍidd i Yahuda. S marra aya war yarexxu weɣḍab nnes, maca afus nnes iqqim isarreḥ.”