Kitsariyaxi9hch_wb2

Nunutsi tahetsɨa mutinuiwaxɨ

1Mɨyatɨtɨ, tawarita 'etɨriya pɨkatixuawere kemɨ'ane mu'uximatɨariekai hetsiemieme. Meripaitɨ Kakaɨyari Tsawuruni kwieyari tixaɨtɨ pɨkarayeitɨa meta Nepɨtahari kwieyari, matsi 'uxa'atɨni Karereya hetsiemieme 'aixɨa katinaniuwamɨkɨ, memɨkahuriyutsixi wakwieyaritsie, haramara huyeyaritsie, Kurutani 'anutaɨye hetsie.2Teɨteri yuwipa memu'uwakaihekɨariya mariweme mekaniuxeiya,kemɨ'ane yɨriya 'a'ayetsuime hetsie memu'uwakaihekɨariya kaniwaruhekɨariwiya.3'Ekɨ nuiwari muwerenikɨ yapepɨtiuyuri,waɨkawa temawierika pepɨwarupitɨa.Mɨkɨ 'ahɨxie mepuyutemamawiekepauka memuka'itsana hepaɨ,kepauka mete'a'iwaka piinitɨarika memɨteyutapitɨwa hepaɨ.4Yemekɨ 'ekɨ pepitamuraxɨ,Mariyani kemɨra'iwarie hepaɨ,wayuku kemɨtiwa'aitɨakai waɨriyarika,tepɨa kemɨrahete memanakatekakai,'itsɨ ti'aitame waɨkawamekɨ kemɨtiwara'ikatɨakai.5Naitɨ kakai kuyaxamieme'imieritsata manɨkɨ,meta kamixate naitɨ xuriya mɨwetɨkataipa katineuwiwiyamɨkɨ,nerɨkwari kanitixɨtsitɨamɨkɨ.6Matsi nunutsi tahetsɨa mutinuiwaxɨkɨ,'uki xeime tekaniutuitɨarieni,tɨrɨkariya naiparieyatsie kanika'uxipimɨkɨ,meta 'ipaɨ katiniterɨwariemɨkɨ:'Ɨxatsitame, mɨmariwe, Kakaɨyari mɨtɨrɨkaɨye,Yuheyemekɨ mɨtapaapa, Ti'aitame kayuwatɨ tiyupitɨwame.7Kemɨti'aitanikɨ kanitamɨirimɨkɨ meta kayuwatɨ kemɨtiyupitɨwakɨ,meta mɨkɨ pɨka'uye'atɨyani.Rawiri 'uwenieyatsie 'akaitɨ katinita'aitamɨkɨmeta hakewa mɨre'aitakaitsie,'amuwenikɨ meta mituikanikɨheitseriemekɨ meta kemɨreuyewetsehikɨ meta yuheyemekɨ.'Ikɨ yakatinaye'atɨamɨkɨYawé Naimekɨmɨtɨrɨkaɨye 'ɨtetsarikaya.

Yawé kemɨtiuyeha'a 'ixaheritsixi wahepaɨtsita

8Yawé yuniuki kaneyenɨ'ani,Kakuwu hepaɨtsita kaneiyenɨ'ani,'Ixaheri hetsie kaniukaweni.9'Ikɨ hepaɨtsita yunaitɨ teɨteri mepɨtehetimamateke―'Epɨrahini meta Tsamariya kiekatari―,yunaitɨ meyuti'ɨretɨ mɨpaɨ memutiyuanemeta yu'iyaritsie meyɨwaweme meyu'erietɨ:10«Xɨka xɨnariya 'uka'une,tetexi xitekietɨkaimekɨ tekanitawewiekuni,xɨka piní pikaxiyari 'anuyexɨrieni,kariuxa pikaxiyarikɨ tekanenukahekwatɨakuni».
11Peru Yawé matsi kaniwatɨrɨkariyamɨkɨXetsini memaye'unie,memeye'unie kaniwarukuyuitɨani.12Tsiriyutsixi tau makayuyuipike hepatsie kiekatari,meta piritsiteutsixi tau manatineika hepatsie kiekatari'Ixaheri mekaniutakwani xeikwaiyarikɨ.Tsepanetɨ 'ikɨ naitɨ mɨyamɨtiɨyɨ,Kakaɨyari haxɨaya pukaheunuawe,matsi 'akuxi yumamá kanitatseratɨkani.
13Peru teɨteri mɨpaɨ mepɨkatehetimaiwawekemɨ'ane mɨyɨane mɨtiwakwinitɨa,Yawé Naimekɨmɨtɨrɨkaɨye mepɨkatiwauwawe.14'Ayumieme xeitukaritsieYawé 'Ixaheri mu'uyakananutixitemɨkɨ meta kwaxieya,takɨ meta haka.15'Ukirawetsixi mu'u mekanihɨkɨtɨnimeta teɨteri waɨkawa memauka'u mepɨhɨkɨ.Kakaɨyari niukametemama kwaxi mekanihɨkɨtɨni,te'ɨkitamete memɨte'itawa.16Kemɨ'ane 'ikɨ kiekari memuwitɨxime mepeiyehɨa,kemɨ'ane memuwitɨkiexime mepɨ'iyɨrie.17'Ayumieme Ti'aitame temari 'aixɨari pɨkatiwaxeiya,nutuite meta wiuraxi pɨkawatinenimayata,mɨkɨ yunaitɨ 'axamemɨteyuruwametekɨ,wateni 'axamɨti'anene pɨtikuxata.Tsepanetɨ 'ikɨ naitɨ mɨyamɨtiɨyɨ,Kakaɨyari haxɨaya pukaheunuawe,matsi 'akuxi yumamá kanitatseratɨkani.
18'Axamɨti'ane tai hepaɨ panutitetere'ɨtsi meta xuya mɨtixɨxɨtsitɨwa,meta kɨyexi 'amayetsuye mɨtaiyawehikɨ panutiyeika teɨka hepaɨ,kɨtsi 'a'utewime hetsie.19Yawé Naimekɨmɨtɨrɨkaɨye haxɨayakɨkwie taikɨ kananutataimɨkɨ.Teɨteri mɨtitaiwawe mepakɨne:'Ana nixewitɨ yu'iwa pɨkatinenimayata.20Hipatɨ tita watserieta mɨtitipika mepɨtetikwani,matsi yaxeikɨa mepɨteheuhaakakwikuni,hipatɨta tita wa'utata mɨtitipika mepɨtetikwani,peru yaxeikɨa mepɨkatihuxani.Yuniwema mekaniwatikwaikuni.21Manatsexi 'Epɨrahini kanitakwaimɨkɨ,meta 'Epɨrahini Manatsexi kanitakwaimɨkɨ,mɨkɨ meyunɨtɨ yuhutatɨ Kura mekanitamiekuni.Tsepanetɨ 'ikɨ naitɨ mɨyamɨtiɨyɨ,Kakaɨyari haxɨaya pukaheunuawe,matsi 'akuxi yumamá kanitatseratɨkani.
expand_more
Search