Kitsariyaxi8hch_wb2

'Atsiriya, Yawé kemɨtikuyuitɨa

1Yawé mɨpaɨ kanetiniutahɨawe: «Xeime mexa 'a'atayeume keneuti'ɨka, ti'utɨwamekɨ mana ketinaka'utɨa: “Mahexi-Tsarari-Katsiwatsihetsie timieme”.2Ne nekaniwata'inimɨkɨ hipame 'aixɨa nemɨtiwamate memɨnenierekɨ, mawari wewiwame 'Uriyaxi meta Tsakariyaxi Kewerekiyaxi nu'aya».3Hikɨ 'uka tixaxatame hamatɨa nekaniukahuni, mɨkɨ kaniutihukata, xeime nunutsi kaniutiniweni. Hikɨ Yawé mɨpaɨ kanetiniutahɨawe: «Mahexi-Tsarari-Katsiwatsi ketineuterɨwa.4Mɨkɨ nunutsi “nepaapa” “nemaama” 'akuxi mɨtayɨni kayɨwekaku, Ramatsiku waɨkawa kemɨrexeiyakai meta Tsamariya piinitɨarika mɨra'iwakai 'Atsiriyatsie ti'aitame hetsɨa katinanɨtɨkiemɨkɨ».5Yawé tawarita mɨpaɨ kanetiniutahɨawe:6«'Ikɨ teɨteri memiku'eirikɨTsiruhe hayari kayuwatɨ muhaneXetsini hetsie pɨta memuyutemamawiemeta Xemariyaxi nu'ayatsie,7Ti'aitame 'ari haa 'Eupɨrate hatɨayari wahetsie kaniwayenetɨamɨkɨhaa waɨkawa mɨtɨrɨkaɨye:ti'aitame 'Atsiriya kiekame kaniyɨanemɨkɨ kemɨtimariwe.Naime haa manuyehapanekai tihɨniyame kanenatiyeuriexɨamɨkɨ,hakewa meta'atɨkatsie panakayeurieni.8Kura kwieyaritsie paitɨ kaniye'amɨkɨ, kanikayunitɨamɨkɨ,kɨipitɨana paitɨ kaniuku'atɨyeimɨkɨ.Neuxei 'Emanuheri , yu'anate taweratɨkaitɨ,'akwie kemɨyewa kananukanamɨkɨ».
9'Ikɨ xekeneu'eni, nuiwarite,yunaitɨ nuiwarite 'ateewa kietari:Xekeneutihiwa kuyaxa miemekɨ,xekanakawitekiexɨakuni.Xekeneuyukuha'aritɨa kuyaxa xemuhukɨ,xekanititsanariexɨakuni.Xekeneuyukuha'aritɨa kuyaxa xemuhukɨ,temɨxiki xepayeitɨarieni.10Yaxeketeneu'utɨa kexemɨteyurieni,matsi kanitayeitɨariemɨkɨ,Yaxeketeneuxata,matsi mɨkɨ yapɨkatiyɨni,Kakaɨyari tahamatɨa muyeikakɨ.

Kakaɨyari teke'ayemakaka

11Yawé karima kaneniutahɨawe mɨpaɨ kanetinayehɨtɨani kename 'ikɨ teɨteri wahuye neka'uweiyani. Mɨpaɨ kanetiniutahɨawe:12«Xeme 'ikɨ teɨteri 'iya memaye'unie memɨte'uterɨwaxemeta mɨpaɨ mɨkɨ xepɨkate'uterɨwani,tita mɨkɨ memɨtemakaxe xeme mɨkɨ xepɨkatemakaxeni,meta xemɨmariutsiekakɨ xepɨkayupitɨaka.13Yawé Naimekɨmɨtɨrɨkaɨye xeikɨaxeme patsiekame xekanayeitɨakakuni,mɨkɨ xeikɨa xekanayexeiyakakuni,mɨkɨ xeikɨa xekanayemakaxekakuni.14Yawé tuki kanihɨkɨtɨkamɨkɨ.Matsi tete kanihɨkɨtɨkamɨkɨ hetsiena memɨtiketamɨrike'Ixaheritsie nuiwarite memuyuhuta wahetsiemieme,mɨkɨ tete puwarekaxɨrieni.Kerutsareme kiekatari wahetsiemiemeKaunari kanayeimɨkɨ meta winiyari.15Yuwaɨkawatɨ mekanitiketamɨrixɨakuni,mekanekaxɨrikuni meta mekanitimurixɨakuni.Winiyari mekaniwɨtɨiyariekuni,mɨkɨtsie mekaniwɨrikuni».
16Kepemɨtiwatahekɨatɨanikɨ mɨ'ayumieme 'aixɨa ketineu'uta,keneutseyuma 'inɨari niukiyari memɨnetsi'aweiya watsata.17Yawé katiniuhayewaKakuwu kiekarieya xeiyatɨ,peru ne hetsiena netiwiyatɨ nepɨta'ikwewani,mɨkɨtsie kenemɨtita'ikwewa nekanexeiyani.18'Ena xepɨnetsixeiya, neniwemama Yawé mɨnetsiyetuiri wahamatɨa. 'Ixaheritsie 'uxa'atɨni kemɨtiyɨni 'inɨari tepɨhɨkɨ Yawé Naimekɨmɨtɨrɨkaɨye hetsiemieme, Tsiyuni hɨriyaritsie 'amuka.19Xɨka xewitɨ mɨpaɨ xerahɨaweni: «Mɨkite wahamatɨa memɨtekuxata meta memɨtehetimamateke wikixi wahepaɨ me'utiyuatɨ wahetsɨa tepɨta'iwauni, ¿tamɨ kareuyewetse teɨteri yukakaɨyarixi memɨwarahɨawenikɨ meta mɨkite, memu'uwa wahetsiemieme?»,20ne mɨpaɨ nekatinixehahɨaweni: «'Inɨari niukiyari meta kepemɨtiwatahekɨatɨanikɨ mɨ'ayumiemetsie xeketenewiyani». Kemɨ'ane mɨkɨtsie tiwiyatɨ mɨtihayewa, 'uxa'atɨni pɨkakahekɨariwiyarieni.21Xeme xekaniyeha'akuni kepauka xemu'uximatɨarieka meta xeyehakakwitɨwetɨ kwiepa naitsarie xeku'uwatɨ. 'Ana teikɨ xehenenieretɨ, ti'aitame meta Kakaɨyari wahepaɨtsita 'axaxekanitiyuakuni,22meta kwiepa mekanenieretɨ, 'uximatɨarika xeikɨa mepɨxeiya, yɨriya meta marika 'etɨriya tsata, mewatiyɨwitsie yuheyemekɨ mekaneukaxɨriyakuni.
expand_more
Search