Icaɛya63rif_lti
Řḥukm x Idum, řeɛdu amezwaru n Israyil
1“Min iɛna wenni dd-yusin zi Idum, zi Buṣra, deg warruḍ s uzzeggwaɣ yuǧřen, iɛuǧen deg warruḍ nnes, wenni igguren di jjehd nnes ameqqran?” “D Necc, wenni issawařen di tsegda, d wenni izemmaren ad issenjem!”2“Mayemmi arruḍ nnec d azeggwaɣ u mayemmi arruḍ nnec am werruḍ n wenni iɛeffsen x tsirt n uḍiř?”3“Necc weḥḥdi d wenni iɛefsen tasirt n binu u war din tuɣi uřa d ijj akidi zi řegnus. Ɛefseɣ xasen deg weɣḍab inu, řebzeɣ ten deg wesɛar inu. Idammen nsen ruccen x warruḍ inu, uca ssarṣuḍen marra arruḍ inu.4Maɣar ass n wexřaf aqa-t ɣari deg wuř, u yusa-dd useggʷas i yinni ittwafekken s ufus inu.”5“Necc xzareɣ ammu d wammu, maca war din tuɣi uřa d ijj i d ayi iwcin afus. Necc tuɣa ttbehteɣ, minzi uřa d ijjen war kidi ibedd. Ufiɣ mɣir aɣiř inu i d ayi issnejmen uca asɛar inu tuɣa d aɛemmed inu.6Necc ɛefseɣ x řegnus deg weɣḍab inu, Necc ssᵉscareɣ ten deg wesɛar inu uca ggiɣ idammen nsen ttazzřen ɣar temmurt.”Asemɣar d tkessit s řmeɛruf zzat i Arebbi7“Necc xseɣ ad idareɣ timegga n tmexsiwt n SIDI, timegga iṣebḥen n SIDI, marra min i d aneɣ igga SIDI, uřa d řxir ameqqran i isscen i taddart n Israil ɛlaḥsab arreḥmet nnes d řemɣaret n tmexsiwt nnes icewwaren.8Netta inna: ‘Nitni d řgens inu, iḥenjiren nni war issxarriqen!” Uca Netta idweř d Amsenjem i nitni.9Di marra řeḥṣaret nsen tuɣa uřa d Netta ittwaḥṣar, uca lmalak n wudem nnes issenjem i-ten. Di tayri nnes d arḍa nnes ifekk i-ten. Netta issgeɛɛed i-ten uca yarbu ten di marra ussan n wecḥař uya.”10“Nitni maca ɣewwɣen uca ssceḍnen Arruḥ Iqeddsen nnes. Xas uca idweř asen d řeɛdu i nitni, immneɣ akidsen.11Waxxa amenni iɛqeř x wussan n zzmanat n wecḥař uya, x Musa d řgens nnes. Mani iǧa wenni d asen dd-issgeɛɛden zi řebḥar ak-d imeksawen n wuǧi nnes? Mani iǧa wenni iggin Arruḥ nnes Iqeddsen di řwesṭ nsen,12wenni iggin afus nnes ittseqsiqen aṭṭas ad yuyur ak-d Musa, wenni ibḍan aman zzat i tiṭṭawin nsen ḥima ad dd-yawi i Yixef nnes Isem i řebda,13wenni ten inedhen deg waman innhewřen? Am uyis di řexřa war nnqarḍen ca,14am řmař nni dd-ihekkwan di teɣzurt, ammu i issareyyeḥ i-ten Arruḥ n SIDI, ammu tnedhed řgens nnec maḥend ad dd-tawyed i Yixef nnec ijj n Isem ittseqsiqen aṭṭas.”15“Sijj zeg ujenna, u wařa zi Tzeddiɣt nnec teccur s tamqeddast nnec d tessiqt nnec! Mani teǧa tusmi nnec iqeddsen u mani ǧant tmegga nnec ijehden? Tessiggʷejed xafi řehnunect nnec d arreḥmet nnec.16Aqa Cek d Babatneɣ, maɣar Ibrahim war d aneɣ issin uca uřa d Israil war d aneɣ issin. Cek, a SIDI, d Babatneɣ, Amefdi nneɣ, Isem nnec aqa-t zi řebda.17A SIDI, mayemmi i d aneɣ tejjid nᵉtteffeɣ zeg ibriden nnec, mayemmi tesseqseḥed uř nneɣ ařami war Cek neggʷed? Dweř-dd di ṭṭweɛ n imsexxaren nnec, di ṭṭweɛ n tqebbař n tesɣart nnec.18Řgens nnec iṭṭef i-tt d řwart mɣir cwayt n řweqt. Iɣrimen nneɣ ɛefsen x Zzawect nnec Iqeddsen.19Aqa nedweř am yinni i war x tḥekmed zi zzmanat n wecḥař uya u i x war ittwařaɣa Isem nnec. Mři tcarrged ijenwan, ḥima ad dd-tehwid, ad arjijen idurar zzat i wudem nnec.”