Read Isaia 55

Isaia55bqc_sim

Dii kĩ́i wɛɛlɛa a gↄↄwa

¹Hee! Á gbɛ̃́ pↄ́ imi lɛ́ á dɛↄ,à mↄ í kĩ́i ápii!Baa tó á ↄ̃a vĩo, à mↄ pↄble.À mↄ vɛ̃ɛ ń vĩo mi ↄ̃asai, fĩabosai.²Àkɛa álɛ ↄ̃a dɛ pↄ́ pↄ́ dɛ blɛ ũo musui?Bↄ́yãi álɛ zĩ ài dɛ pↄ́ pↄ́li ń kã́o yã́ii?À ma yãma sa à pↄmaa ble,á pↄ i kɛ na a nísiwa.³À swã́kpa ma!À mↄ ma kĩ́i kɛ́ à e àↄ ku.Ma bàa aↄ kúánↄ gↄↄpii,ma gbɛ̃kɛ seasai pↄ́ má kɛ̀ Davidiɛ yã́pi.⁴Gwa! Ma aà dìlɛ seelade ũ buiↄnɛ,ma aà kɛ̀ gbɛ̃́ↄ dↄaana ũ, an kía ũ.⁵Ńyↄ̃ bui pↄ́ ń dↄ̃oↄ sísi,bui pↄ́ ń dↄ̃opiↄ bàalɛ mↄ n kĩ́ima Dii Isailiↄ Lua pↄ́ a kua adoa yã́i,asa ma gawi pìsima.

⁶À Dii kĩ́i wɛɛlɛ aà egↄↄ,à aà sísi gↄↄ pↄ́ a kãiánↄ.⁷Vãikɛna a zɛ́ tó,gbɛ̃vãi ↄkpa a làasooi.Aà zɛ ń Diio, i aà wɛ̃nagwa,wá Luapi i sùuukɛaànↄ maamaa.⁸Asa ma Dii ma mɛ̀,á làasoo muaa ń ma làasoooo,á yãkɛa muaa ń ma yãkɛaoo.⁹Lá musu ń zĩ́lɛo lɛsĩ dɛ ń kↄ̃o,màa ma yãkɛa lɛsĩ dɛ á yãkɛaa,màa ma làasoo dɛ á làasooa.¹⁰Lá lou ń mↄ̀sɛo ì bↄ za musu,mɛ́ ìli ɛa we tↄↄlɛninisaio,ì to pↄ́ bↄlɛwà à nɛ'i,ↄ̃ ì buikɛ pↄtↄ̃naɛ,ì blɛkɛ pↄblenaɛ,¹¹màa yã́ pↄ́ bↄ̀ ma lɛ́u dɛ.A lɛ́lɛ pã ma pↄeã kɛsaio,ma yã'o kpã́sãa tá aↄ na.¹²Asa á bↄlɛ ń pↄnao,wa dↄaaɛ́ ń aafiao,gbɛ̀sĩsĩↄ ń sĩ̀sĩↄ koo pũna ń gulao á aɛ,sɛ̃̀ali píi a ↄtaalɛ.¹³Pɛ̃liↄ bↄlɛ lɛaaↄ gbɛu,gbɛ́liↄ bↄlɛ lɛsikaoↄ gbɛu.Bee aↄ ma tↄbↄseela láasai pↄ́ a súuli kpálɛo ũ.

Isaia 55 / bqc_sim

Dii kĩ́i wɛɛlɛa a gↄↄwa

Isaia55bqc_sim