Read Izaya 51

Izaya51shr_buk

Israheli acîkubagira Nyakasane

¹Muyumvîrhize, mwe mushimba obushinganyanya, mwe mulongereza Nyakasane. Lolêrezi ibuye mwarhengagamwo n’enyenga mwakulagwâmwo.²Lolêrezi Abrahamu, sho winyu, na Sara wammuburhaga. Ali yêne erhi mmuhamagala, ci namugisha, najira ayôloloka.³Nêci, Nyakasane ababalîre Siyoni, ababalîre ebigûkà byâge byoshi. Irungu lyâge alijira aka Edeni, n’idaho lyûmu alihindula ishwa lya Nyakasane. Bâbonamwo obushagaluke n’amasîma; bâkaz’ivugiramwo omunkwa n’okuzihiramwo ennanga.

Obushinganyanya bwa Nyamuzinda bwâgandâza

⁴Onyumve bwinjà, we lubaga lwâni, we ishanja lyâni, ontege okurhwiri. Bulya irhegeko likola lyarhenga emunda ndi, n’obushinganyanya bwâni bwâbà kamole k’amashanja.⁵Obucîranuzi bwâni buli hôfi. obucire bwâni buyîruka n’amaboko gâni gakola gatwa emmanja z’amashanja. Ebirhwa byampebakwo obulangâlire bwâbo, na ntyo bicîkubagire okuboko kwâni.⁶Galamiri emalunga, mulole igulu bwandagala, bulya amalunga gâyishicîberamwo nka mugî, igulu lyâyôrha mirendwè nka mwambalo, n’abayûbaka muli lyo, nabo bagukumuka nka nzi. Ci obucire bwâni bwayôrha buli ho ensiku n’amango, n’obushinganyanya bwâni burhakayûrha.⁷Munyumve bwinjà, mwe muyishi obushinganyanya, wâni lubaga lubîkirira irhegeko lyâni emurhima. Murhayôbohaga ebijâci by’abantu, murharhemukaga ebwa kubà bamammulogorhera.⁸Bulya kwo babà nka mushangi gwalîrwe n’enshwa, na nka môya gamalîrwe n’ecibungu. Ci obushinganyanya bwâni bwayôrha bubâho ensiku n’amango, n’obucire bwâni kurhenga iburha kuhika oku lindi.

Butulûko bwa Nyakasane

⁹Zûka, zûka, cihundikire emisî yâwe, wâni kuboko kwa Nyakasane!Zûka nka omu nsiku za mîra, nka omu myâka yageraga!¹⁰K’arhali w’olya watumirhaga Rahabu wanarhulungula Wankuba-joka?K’arhali w’olya waganyagya enyanja n’amîshi g’ekuzimu?K’arhali w’olya watwâga enjira emuhengere mpu lyo balya wacungulaga bayîkira?¹¹Abalîkûzibagwa na Nyakasane bâyish’igaluka,bâyish’ijà omu Siyoni erhi banayisha babanda orhuhababo rhw’obushagaluke,n’obusîme bw’ensiku n’amango bwamoleka amalanga gâbo;obushagaluke n’omwîshingo byâbayunjula,amalibuko n’endûlù byâhirigirha.

Nyamuzinda ye Murhûliriza

¹²Niene, niene nie ndwîrhe nammurhûliriza!Oligi ndi wayôboha omuntu wânafè,omuntu oburhwa n’owundi, oli nka hyâsi?

¹³Wayibagîre Nyakasane wakulemaga,owabungulaga amalunga anasimika igulu;wakayôrha wa juguma omulegerege gwoshierhi bukali bw’okakurhindibuza burhuma,bulya ko ali nk’odwîrhe wacirheganya okukuherêrekeza.Ci ngahigi buli obukunizi bw’olya odwîrhe akulibuza?¹⁴Omushwêkwa ali hôfi ashwêkûlwe,arhâcifire omu mpamikwa, arhanacibule eci alya,

¹⁵Nie ono nie Nyakasane, Nyamuzinda wâwe,ovanganya enyanja n’empimbi z’amîshi gâyo.Izîno lyâni, nie Nyakasane, Nyamuzinda w’Emirhwe,

¹⁶Mpizire ebinwa byâni omu kanwa kâwe,nnankubwîkire n’ecîhôho c’okuboko kwâni, omu kugwîka amalunga,omu kusinga igulu n’omu kubwîra Siyoni, nti: «We lubaga lwâni!»

Yeruzalemu ayimanzibwa na Nyakasane

¹⁷Zilka, zûka, yimanga, wâni Yeruzalemu,we wanyweraga omu maboko ga Nyakasane akahe k’obukunizi bwâge,we wanywaga wanashongôza akabehe k’okudandabaganya!

¹⁸Ciru ntà muguma wamuhabwîre muli balya bagala aburhaga,ntâye ciru n’omuguma wamugwârhîre oku kubokomuli balya bâna boshi aleraga!

¹⁹Alaga mahanya abiri gacihondire kuli we: ndi wakulakira?Okuhagulwa n’okushâbirwa, ishali n’engôrho: ndi wakurhûliriza?²⁰Abâna bâwe babengîre, bakola balambûkîre omu ngasi marhambi g’enjira zoshi,bakola bali nka kula akashafu kagwârhwa omu murhego,bamâzigânwa n’obukunizi bwa Nyakasane,n’omuhigo gwa Nyamuzinda wâwe.²¹Co cirhumire, yumvagya okûla, oyu muhanya,oyu mulalwè, ci arhali ndalwè ya mamvu!

²²Kwo adesire ntyâla, Nyakasane Nyamubâho,Nyamuzinda wâwe, ofungira olubaga lwâge:Alà oku nkola narhenza akabehe k’okudandabaganya omu nfune zâwe,akabehe k’obukunizi bwâni; orhakacikanywakwo bundi,