Read እሳያሳ ማፃፋ 49

እሳያሳ ማፃፋ49gof_etw

ጎዳ አይለ

¹ህንተኖ፥ ዩሾይ አባን ተቀትዳ ቢታቶ፥ታኒ ኦደይሳ ስእተ።ህንተኖ፥ ሃሆሶን ደእያ ካዎተቶ አኬክተ፤ታኒ የለታናፐ ካሰ ጎዳይ ታና ፄግስ፤ታ አየ ኡሎን ደእሽን፥ ታ ሱን ሱንስ።²ታ እንፃርሳ ቃራ ማሽ ኦስ፤ባ ኩሽያ ኩያን ታና ገንስ።እ ታና ፖሸትዳ ዶንገ ዪሽ ኦድባ ሾሁዋን ታና ቆትስ።³እ ታኮ፥ “እስራኤለ፥ ኔኒ ታ አይለ፤ታኒ ታ ቦንቹዋ ነናን ቆንጭሳና” ያግስ።⁴ሽን ታኒ፥ “ታኒ ጮ ዳቡራስ፤ታ ዎልቃ ጎእ ባይናባንነ ሀዳባን ዉርሳስ።ግዶሽን፥ ታ ፕርዳይ ጎዳ ማታና፤ታ ጋተይ ታ ፆሳ ማታና” ያጋስ።

⁵ታኒ ጎዳ አይፈ ስንን ቦንቸትዳ ግሾ፥ታ ፆሳይ ታዉ ዎልቃ ግድዳ ግሾ፥ያይቆባ እያኮ ዛራናዉእስራኤለ እያኮ ሺሻናዉ፥ታኒ እያ አይለ ግዳና መላታና ታ አየ ኡሎን ዶርዳ⁶ጎዳይ ታኮ ሀይሳዳ ያጌስ፤ኔኒ ያይቆባ ኮቻ ደንናዉእስራኤለፐ አትዳ ጉታ ዛራዳ ኤሀናዉኔኒ ታዉ አይለ ግደይስ ዳሮ ጉባ።ሄሳፈ አዳ፥ ታ አቶተይ ቢታ ጋፃ ጋካና መላታኒ ነና ካዎተታስ ፖኦ ኦና።

⁷ካትዳይሳስነ እፀትዳይሳስቃስ ካዎተታ ሃርያ አይልያስ፥እስራኤለ ዎዝያ ጎዳይ፥እስራኤለ ጌሻይ ሀይሳዳ ያጌስ፤አማንያ ጎዳ ግሾ፥ነና ዶርዳ እስራኤለ ጌሻ ግሾካዎት በእድ ደንድ ኤቃና፤ደርያ ሃረይሳት በእድ ጎይናና።

የሩሳላመይ ኦራፃና

⁸ጎዳይ ያጌስ፤“ታኒ ዶርዳ ዎደን ነ ኦይሻ ዛራና፤አቶተ ጋላስ ታኒ ነና ማዳና።ታኒ ነና ናጋና፤ኔኒ ቢታ ዛራዳ ኤሳና መላ፤አስ ዶና ቢታ ኔኒ ላትሳና መላታኒ ነና አሳስ ጫቆ ኦዳ እማስ።⁹ድኤትዳይሳታ፥ ‘ከይተ!’ማ ቃሾን ደኤይሳታ፥ ‘ብርሸትተ!’ጋና መላ ታኒ ነና ኦና።ኤንቲ ኦገ ማታን ሄመታና፤መላ ደረ ቦላ ሄመትያ በሲ ደማና።¹⁰ኤንቲ ኮሻቶኮና ዎይኮ ሳሞቶኮና፤ኤንታ መላ ቢታ ምሻይ ፁገና፤አዋይ ኤንታ ሜና።ኤንታዉ ቃተይስ ኤንታ ካለና፤ፑልቶ ሃኮ ኤንታ ላጋና።¹¹ታኒ ታ ደረታ ኡባ ኦገ ከሳና፤ታ ዎጋ ኦገታ ቁ ኦና።¹²ሄኮ፥ ታ አሳይ ሃሆሶፐ ያና፦ፑደሀ ባጋፈነ ዉሎሀ ባጋፈ፥ቃስ አስዋና ቢታፈ ያና” ያጌስ።

¹³ህንተኖ ሳሎቶ፥ ኡፋይሳን የፅተ፤ነኖ ቢታዉ ኡፋይታ።ህንተኖ ደረቶ፥ እልልተ!ጎዳይ ባ አሳ ምንስ፤ባ መቶተትዳ ባ አሳስ ቃትስ።¹⁴ሽን ፅዮነይ፥ “ጎዳይ ታና አግስ፤ፆሳይ ታና ዶግስ” ያጋሱ።

¹⁵አይያ ባ ንያ ናኣ ዶጋናዉ ዳንዳአይ?ባ ኡሎፐ ከይዳ ናአስ ቃተኬ?እያ ዶግኮካ፥ ታኒ ነና ዶግከ!¹⁶ሄኮ፥ ታኒ ነና ታ ኩሸ ቃቃን ፃፋ ዎስ፤ነ ድርሳ ግምበት ኡባ ዎደ ታ ስንን ደኦሶና።¹⁷ነና ዛሪድ ኬፀይሳት ኤለስድ ያና፤ነና ላልዳይሳት ኔፐ ሃካና።¹⁸አነ ቁ ጋዳ ነ ዩሹዋ ፄላ፤ነ ናይት ኡባይ እስፈ ሺቅድ ኔኮ ያና።ታኒ ጎዳይ፥ ታናን ጫቃስ፦ኔኒ ኤንታ ኡባ አሌቆዳ ማአና፤ገላናዉ ሀንያ ማጫስ አሌቀተይሳዳኔኒ ኤንታን አሌቀታና።¹⁹ኔኒ ላለታዳ ባይሳ ግድኮካ፥ነ ቢታይ ይኮካ፥ሀእ ነናን ደእያ አሳስ ዳሮ ፁማና፤ነና ላልዳይሳት ኔፐ ሃካና።²⁰ኔኒ ካዮትያ ላይንነዉ የለትዳ ናይት ነ ሀይን፥“ሀይስ በሳይ ኑስ ዳሮ ፁን ግድያ ግሾ፥ኑ ዳና ዳልጋ በሲ እማ” ያጋና።²¹ኔኒ ነ ዎዛናን፥ “ሀ ናይታ ኡባ ታዉ ኦነ የልዳይ?ታኒ የላዳ ን ግዳስ፤ ታኒ ድኤታስ፥ እፀታስ።ያትን፥ ሀይሳታ ኦነ ድችዳይ?ታኒ ታርካ አታስ፤ያትን ሀ ናይት ኡባይ አዉፐ ይዶና? ያጋና።”²²ኡባ ሃርያ ጎዳይ ሀይሳዳ ያጌስ፦“ሄኮ፥ ታኒ ካዎተታ ማላታ በሳና፤አሳስ ታ ባንድራ ኤሳና።ኤንቲ ነ አደ ናይታ እድምድ፥ነ ማጫ ናይታ ባንታ ሀሽያን ቶክድ ኤሀና።²³ካዎት ነና ድችያ አዋታ ግዳና፤ኤንታ ማጫ ካዎት ነና ንያ አዮ ግዳና።ኤንቲ ጉፋንድ ነዉ ጎይናና፤ነ ቶሆ ባና ላጫና።ታኒ ጎዳ ግደይሳ ኔኒ ሄሳን ኤራና፤ታናን አማነትድ ናገይሳት ዬላቶኮና” ያጌስ።

²⁴ኦላንቹዋፈ ድኦ የግሳናዉ፥ዎዛን ኢታ አሳ ኩሸፐ ድኤትዳ አስከስ ኤካናዉ ዳንዳኤትዬ?

²⁵ሽን ጎዳይ ያጌስ፦ኦላንቾ ኩሸፐ ድኤትዳ አስ ከስ ኤካናዉ፥ዎዛና ምኖ አሳፐ ድኦ የግሳናዉ ዳንዳኤቴስ።ኔራ ኦለተይሳታራ ታኒ ኦለታና፤ነ ናይታካ አሻና።²⁶ነና ኡንኤይሳት ባንታ አሹዋ ማና መላ ኦና፤ዎይነ ኡይድ ማተይሳዳኤንቲ ባንታ ሱ ኡይድ ማታና።ሄ ዎደ አሳ ኡባይ ታኒ ጎዳ፥ነና አሽያ፥ ዎዝያነ ያይቆባ ዎልቃማግደይሳ ኤራና።

እሳያሳ ማፃፋ 49 / gof_etw

ጎዳ አይለ

የሩሳላመይ ኦራፃና

እሳያሳ ማፃፋ49gof_etw