Kitsariyaxi
48
/
hch_wb2
'Ixaheri kemɨtitse'i
1
»'Ikɨ xeme xeketeneu'eni,
Kakuwu tɨɨriyamama,
Kura nuiwarimama,
'ixaheritsixi xemɨte'uterɨwarɨwa,
Yawé hetsiemieme xemɨyuhɨritɨa,
meta 'Ixaheri Kakaɨyarieya memahɨawe,
peru yu'iyarikɨ xemɨkayɨa meta kemɨtiheitseriekɨ.
2
Xeme mɨpaɨ xemɨteyuterɨwa “kiekari mɨpatsietsie kiekatari,”
'Ixaheri Kakaɨyarieyatsie yuri xemɨte'erie,
Yawé Naimekɨmɨtɨrɨkaɨye mɨtitewa hetsie:
3
Mɨixa panuyemie
nepɨtiutaxa meripaitɨ kemɨtiɨyɨ.
Ne nepitahekɨataxɨ,
netɨtɨ nepɨxe'utaxatɨa.
Yapauka mɨpaɨ nepɨtiuyuri,
hikɨ yapɨraye'atɨarie mɨkɨ.
4
Ne nemɨtimaikaikɨ 'ekɨ pemɨ'iyari tse'i,
'akɨipi tepɨa mɨhɨkɨkɨ,
meta 'anierika wurunitse mɨhɨkɨkɨ.
5
'Ayumieme ne meripaitɨ mɨkɨ nepɨmatiutaxatɨa,
nepɨmatiuhekɨatɨa mɨpaɨ 'akuxi katiyɨwekaku,
mɨpaɨ pemɨkahainenikɨ:
“Mɨkɨ nekakaɨyari mamakɨ muwewiya katiniuyurieni.
Mɨkɨ nekakaɨyarixi memɨxixiyatɨka meta memɨtaiyarietɨka mɨyamekateniuyurieni”.
6
Naime 'ikɨ hepaɨtsita pepɨtimate,
¿kamɨtsɨ pekatitaxata?
»Hikɨ mɨtiyehane tihehekwame nepɨmatixeitsitɨani,
tita mɨti'awietɨ meta tita pemɨkatimate.
7
Hikɨke mɨtiutawewiya katinihɨkɨtɨni, meripaitɨ kapɨtimieme,
meripaitɨ mɨkɨ pepɨkati'eniwekai,
mɨpaɨ pemɨkahainenikɨ:
“'Ari ne mɨpaɨ nepɨtimaikai”.
8
Hatsuaku mɨpaɨ pepɨkati'enawekai, meta mɨpaɨ pepɨkatimaikai,
meripaitɨ pepɨkaheu'enakai.
Ne nekatinakumaika pemɨtiyukananaima,
nunutsiyari paitɨtɨ “mɨrayuye'unie” pekatiniuterɨwarɨwani.
9
Kenemɨtitewa nemɨnaki'eriekɨ nehaxɨa nepɨnewie,
nenɨawarikɨ nepuyupirenutɨa,
nemɨkametsikumaweriyakɨ.
10
Neuxei. Nekameniu'itieni peru hawaikɨ pɨrata hepaɨ,
nekameniuta'inɨata 'uximatɨarika huxunuyarita.
11
Nehetsiemieme nekameniuyurieni.
Yanepɨkatinaki'erie nekapatsiekame xemɨnetsi'ayeitɨwanikɨ kenemɨtitewakɨ.
Tawarita xeime nepɨkapitɨani witsikenemɨ'anekɨ.
'Ixaheri kemɨtiɨxɨnarie
12
»Kakuwu keneneu'eni,
'Ixaheri, nemɨmatsi'anayexei:
Ne Kakaɨyari nepɨhɨkɨ,
ne mexɨakame nepɨhɨkɨ, meta 'imatɨrieka mieme.
13
Ne'utakɨ kwie 'aixɨa nepuyuri,
netseriekɨ muyuawi neputaweraxɨ.
Ne nepuwarutaterɨwaxɨ,
hikɨ mɨkɨ yunaitɨ mepuhekɨarixɨa.
14
»Xekeneuyukuxeɨri xeme yunaitɨ xekeneu'enana:
¿Kemɨ'ane mɨkɨ xewitɨ pɨtiutaxa 'ikɨ?
Yawé minaki'erie
yapɨtiyurieni Wawiruniya hetsie,
tɨrɨkariyaya karireutsixi wahetsie pɨtinakeni.
15
Ne xeikɨa mɨpaɨ nekaniutayɨni,
ne nekanita'inieni.
Ne nekani'atɨamɨkɨ,
katinayu'iwamɨkɨ kenemɨtita'aitɨani.
16
»Hurawa ne'aurie xekeniwakɨni, 'ikɨ xeketeneu'eni:
»Tsutɨa paitɨtɨ, hawaikɨ 'awie nepɨkaretaxa,
kepaukata mɨpaɨ mɨtiyɨni, ne mana nepuyeikani».
Hikɨta Yawé naimekɨmɨyɨwe
pɨnetsiheyenɨ'a 'Iyari yuhetsɨa miemekɨ.
17
Yawé mɨpaɨ kanaineni,
Matsiwikweitsitɨwame, Mɨpatsie 'Ixaheri hetsiemieme:
«Ne Yawé Kakaɨyari nepɨhɨkɨ,
mɨmati'ɨkitɨa tita 'ahetsiemieme 'aixɨa mɨti'ane,
mɨmatsi'uwitɨxime kemɨ'ane huye pemuweiyanitsie.
18
Xɨka ne'aitsika pe'u'enienike,
kayuwatɨ pemexeiyakɨ hatɨa hepaɨ pɨ'anenike,
heitseriekamekɨ kepemɨtiuyeika haramara hamewariyari muwakɨka hepaɨ pɨ'anenike.
19
Xiekari hepaɨ 'anuiwarima mepɨyupaɨmenike,
'aniwema, xiekari 'uriyari hepaɨ,
kememɨtetewa hatsuaku mepɨka'akuyeitɨarienikekai,
metatsiere nehɨxie mepɨkahayeitɨarienikekai».
20
Wawiruniya kiekariyaritsie xekenayekɨni.
Karireutsixi watsata xekenayekɨni xemuyuta'unakɨ.
Mɨpaɨ xeketeneutaxata xe'utihiwatɨ temawierikakɨ,
meta yunaitɨ meketehetimani.
'Ikɨ niuki xekeneuta hekɨata kwie manu'axe paitɨ,
mɨpaɨ xekeneutiyua: «Yawé Kakuwu kaniutawikweitsitɨani tiyu'uximayatsiriwame».
21
Kepauka makumawetsie muwaruwitɨtɨya,
mepɨka'uharikwi,
yapɨtiuyuri 'aitsie manenikɨ haa wahetsiemieme,
tete kaneutara, haixa mana kananexɨani.
22
«'Axamɨtiuka'iyari kayuwatɨ pɨkahexeiya»,
Yawé mɨpaɨ kanaineni.
Powered by Seed Bible API
expand_more
Search
All books
Old Testament
New Testament
chevron_left
Previous Chapter
Books
search
Search
explore
Discover
share
Share
chevron_right
Next Chapter