Read ዒሲያሴ ማፃኣፖ 40

ዒሲያሴ ማፃኣፖ40mdy_twf

ፆኦሲኮ ዴሮ ዶዲሻ ቃኣላ

¹ኑ ፆኦዛሢ ሂዚ ጋዓኔ፦«ዴሮ ታኣኮ ዶዲሹዋቴ! ዶዲሹዋቴ!²ዓይሌ ማዒ ዒዞኮ ማዾ ዎዳ ጋፔኔ፤ ዒዞኮ ጎሞ ዛሎሮ ቢያ ፆኦሲዳፓ ጳንጬ ሜቶ ዒዛ ዔኬሢንታ ጎማኣ ዒዞኮ ዓቶም ጌይንቴሢ ዬሩሳላሜም ሌፔ ዑኡሲና ኬኤዙዋቴ።»

³ሂዚ ጋዓ ዑኡሲ ዋይዚንታኔ፦«ዓሲ ናንጉዋ ዳውሎይዳ ናንጊና ናንጋ ጎዳኮ ጎይፆ ጊኢጊሹዋቴ!ዳውሎይዳ ኑ ፆኦዛሢም ጎይፆ ጲሺ ኮሹዋቴ!⁴ዔታዻ ቤዞና ዶኦጫዻ ቤዛ ኩሚ ጊኢጎንጎ፤ዹኮንታ ጌሜሮንታ ቢያ ሂርኪዲ ባኣሲንቶንጎ፤ጌሜሮንታ ጌሊ ኬስኪ ጌዔ ሳዓኣ ቢያ ጊኢጎንጎ።⁵ዬኖ ዎዶና ናንጊና ናንጋ ጎዳኮ ቦንቻ ፔጋዺ ጴዻንዳኔ፤ናንጊና ናንጋ ጎዳ ዬያ ኬኤዜያ ማዔሢሮዓሳ ቢያ ዬያ ፔቱሞና ዛጋንዳኔ።»

⁶ፔቴ ዑኡሲ ታና «ዒላቴ!» ጌዔኔ፤ታኣኒያ ማሃዖ፦ «ዎዚ ጌዒ ታ ዒላቶንዶይ!» ጌዒ ዖኦጬኔ፤ዬና ዑኡዜላ «ዓሲ ቢያ ማኣቲጉዲኬ፤ቦንቻኣ ቢያ ካይዚ ቡኒጉዲኬ፤⁷ናንጊና ናንጋ ጎዳኮ ዢባራ ዢባርሻ ዎዶናማኣታ ሜላሢና ቡና ዲኢናሢጉዲዓሲያ ዬያጉዴያኬ።⁸ጎኔና ማኣታ ሜላኔ፥ ቡናኣ ዲኢናኔ፤ናንጊና ናንጋ ጎዳሢኮ ቃኣላ ጋዓንቴ ናንጊና ዶዲ ናንጋኔ።»

⁹ዒንሢ ፂዮኔም ኮዦ ባኮ ኬኤዛ ዓሳ!ሌካ ዼጌ ዹኮ ኬስኩዋቴ!ዒንሢ ዬሩሳላሜም ኮዦ ሃይሶ ኬኤዛ ዓሳ!ዑኡዞ ዒንሢኮ ዼጊዲ ዒላቱዋቴ!ዒላቱዋቴ ዒጊጪፖቴ!ዪሁዳ ካታሞም፦ «ፆኦዛሢ ዒንሢኮ ሃይሾ!» ጎዑዋቴ።

¹⁰ናንጊና ናንጋ ጎዳ ፔኤኮ ዼኤፖ ዎልቆና ዎይሣኒ ሙካንዳኔ፤ዒዚ ሙካሢ ዒንጋኒ ማሌ ባኮንታ ማዼሢ ዛሎ ጪጎንዶሢያ ዔኪኬ።¹¹ቆልሞ ሄንቃ ዓሲጉዲ ዒዚ ሄንቃንዳኔ፤ላኣቆ ማራናኣቶ ፔቴይዳ ዒ ቡኩሳንዳኔ፤ፔኤኮ ቃሶይዳ ኮንቂ ዔያቶ ዔካንዳኔ፤ናኣቶ ዻንሢሣዞንሢያ ጉኡዱዋዖ ታሢ ዒሻንዳኔ።

ዒስራዔኤሌ ፆኦሲና ዖ ቤቃይ?

¹²ዼኤፖ ባዞ ዋኣፆ ፔኤኮ ቃኣቆ ጋራጫሪንጮዋ ፔ ኬኤላናሳዖ ዓጮ ማኪ ዔራኒ ዳንዳዓሢ ዖናዳይ?ዹኮንታ ጌሜሮንታ ዴኤሡሞ ዔሮ ባኮና ዛጊ ዔራንዳሢ ዖናዳይ?¹³ናንጊና ናንጋ ጎዳ፦ «ሂዲ ማዼ» ጌዒ ዓይሣሢ ዖናዳይ?ዒዛ ዔርዛኒና ዞራኒያ ዳንዳዓያ ዖናዳይ?¹⁴ዒዛም ኬኤዛንዳጉዲ ፆኦሲ ዖኦና ዞርቴይ?ፒዜ ዎጎ ዔርዜሢ ዒዛ ዖናዳይ?ዔራቶ ዒዛ ዔርዜሢንታማሊ ጶቂሦ ጎይፆዋ ዖ ዒዛ ዻዌይ?

¹⁵ናንጊና ናንጋ ጎዳኮ ቤርታ ዴራ ፔቴ ዖቲ ጋርካ ፆዼ ዋኣሢጉዲኬ፤ዴኤሡሞ ዔሮ ባኮይዳ ዓኣ ሲላሊጉዲ ፓይዲንታኔ፤ዋኣፆ ሳዛ ዓኣ ሳዓኣ ዒዛ ቤርታ ዓዳ ሲላሊ ሊኢቃጉዲ ሼሌዓያኬ።¹⁶ሊባኖኦሴይዳ ዓኣ ሚፃ ሚቺ ዒንጎ ዒንጊፆ ታሞ ዔኤሣኒቆልማኣ ዒዞኮ ሚቺ ዒንጎ ዒንጊፆም ጊዳያቱዋሴ።¹⁷ፆኦሲ ቤርታ ዴሮኮ ፓይዳ ባኣያኬ፤ላኣፒፃፓ ዔቄያና ፓይዲዳ ጌሉዋያኬ።

¹⁸ፆኦሲ ዒንሢ ዖኦና ዎላ ቤኤዛይ?ዖኦና ዎላ ዒንሢ ዒዛ ሄካሳይ?¹⁹ሜሌ ፆኦዞ ሃኣሚ ቆኦቂ ኮሻኔ፤ዎርቆ ኮሻሢያ ጳርቂ ጊኢጊሻኔ፤ቢሮ ዓንጎዋ ካኒ ቢራታ ኮሺ ማይሳኔ።²⁰ዔኤቢባኣ ማንቃሢ ኮሳዹዋ ሚሢ ዶኦራኔ፤ዶዑዋ ማላታ ዒዛም ኮሺንታንዳጉዲዔርቴ ሃኣሚ ዓሲ ዒ ኮዓኔ።

²¹ፔቴታዖ ዬያ ዔሩዋዓዳ? ዒንሢ ዋይዚባኣዓዳ?ሚናኣፓ ዓርቃዖ ዒንሢም ኬኤዚንቲባኣዳ?ሳዓ ማዢንቴማኣፓ ዓርቃዖ ማሊ ዒንሢ ጶቂሡዋዓዳ?²²ሳዓ ማዔ ካሮይዳ ፆኦሲ ፔ ሻኣሎ ጌሢ ዴዔሢጫሪንጮ ዓዳ ጎኦቦ ዓፒላጉዲ ዳሬሢዓፒላፓ ኮሾ ናንጎ ማኣሮጉዲ ዾቄሢዓጮ ዴራ ፃቆጉዲ ዻካ ማዔሢያ ዔሩዋዓዳ ዒንሢ?

²³ዒዚ ዼኤፖ ዓሶ ዻውሲሳኔ፤ሃያ ዓጮ ሱኡጎ ባኣያ ማሃኔ።²⁴ዔያታ ሃጊ ባቃሌያና ፃጲ ዳኪባኣ ባቃሊጉዲኬ፤ናንጊና ናንጋ ጎዳ ዢባሮ ፔኤኮ ዳካዛ ቤዞና ዔያታ ሜላኔ፤ዲልባጉዲ ላኣሊንቲያ ዔያታ ባይቃኔ።

²⁵«ሂዳዖ ታና ዒንሢ ዖኦና ዎላ ቤኤዛይ?ዖኦና ዎላ ዒንሢ ታና ሄካሳይ?» ጋዓኔ ዱማዼ ፆኦዛሢ።²⁶ዼጊ ጌዒ ጫሪንጮ ሌካ ዛጉዋቴ፤ዒንሢ ዛጋ ዦኦጋሢ ማዤሢ ዖናዳይ?ዒዚ ዖልዚ ዖላ ዓሲጉዲ ዔያቶ ዔኪ ዓኣዻኔ፤ዎማዼታቴያ ፓይዶ ዔያቶኮ ዒዚ ዔራኔ፤ፔቴ ፔቴሢ ፔ ሱንሢና ዔያቶ ዔኤላኔ፤ዒዛኮ ቢታንቶንታ ዎልቆንታ ሚርጌና ዼኤፒኬ፤ዬያሮ ዔያቶይዳፓ ፔቴታዖ ባይቃዓኬ።

²⁷ያይቆኦቤ፥ ዓይጋ ኔ ሃያ ጋዓይ?ዒስራዔኤሌ፥ ዓይጋ ኔ ሂዚ ጌዒ ጌስታይ?«ጎይፃ ታኣሲ ፆኦሲ ዓኣፓፓ ዓኣሺንቴኔ፤ናንጊና ናንጋ ጎዳ ታኣም ዎጋንዳሢያ ሃሼኔ» ዓይጋ ኔ ጋዓይ?²⁸ፔቴታዖ ኔኤኒ ዔሩዋዓዳ?ዋይዚያ ኔኤኒ ዋይዚባኣዓዳ?ፆኦሲ ናንጊና ናንጋ ጎዳኬ፤ዓጮ ቢያ ማዤሢ ዒዛኬ፤ዒዚ ፔቴታዖ ላቢንቱዋሴ፥ ማሊፆዋ ፔኤኮ ሺርሹዋሴ።²⁹ላቤዞንሢም ዒዚ ዶዱሞ ዒንጋኔ፤ዎልቃ ኬዴዞንሢማኣ ዎልቄ ቃሳኔ።³⁰ጶሾራ ላላባኔ፥ ዎልቄባኣያ ማማዓኔ፤ዼጌሢያ ባሺንቲ ሎሎኦማኔ።³¹ናንጊና ናንጋ ጎዳ ጉሙርቂ ናንጋዞንሢኮ ጋዓንቴዎልቃ ጊንሣ ዶዳንዳኔ፤ዓዳ ኮኦኬጉዲ ጋኣሲና ባራናንዳኔ፤ጳሽኪያ ጳሽካንዳኔ፥ ላቢንዱዋሴ፤ሃንታንዳኔ፥ ላቢንቲ ዔያታ ሎኦማዓኬ።

ዒሲያሴ ማፃኣፖ 40 / mdy_twf

ፆኦሲኮ ዴሮ ዶዲሻ ቃኣላ

ዒስራዔኤሌ ፆኦሲና ዖ ቤቃይ?

ዒሲያሴ ማፃኣፖ40mdy_twf