Isaías40cuk_nvs

Bab-Jehová, Israel-dulemarga gwage-armaked

1Anmar-Bab-Dummad soged:“An-dulamar-e-gwage ogannomar,baisur-ito be imakmar.2Jerusalén-dulemarga nue-sabedgi be sunmakmar,ega be sogmar:‘Be maiga-arbadigusmalad-ibagan wese bergunoniye,be-isgusmalad bato bega bennuklesye.Bemar isgusad-nukad unniguar bato ilabo-wilub sabsur-odurdaklesye.Bab-Jehová bemarga isgued elisye.’ ”
3Gayaburba binnasuli goled, weyob soged:“Bab-Jehováʼga nega-dulesulidganba igar mayemar,anmar-Bab-Dummadga nega-dinnaganba igar swilidik mesmar.4Bela nebagan swilidik imakmarsun,yalamar, degi, neg-mullugana omatolesun.Degine, napa-muru-muru-mamaid innikii imakmarsun,igar-bire-bire-mamaid innikii imakmarsun.5Agine geb Bab-Jehová-e-gandikid-yeerdakleged bela dulemarga oyolegoed.”Ar Bab-Jehová-sunnagwad deyob sogsad.6Gayaburba weyob soged:“Binnasuli be soge.”An ega weyob soged:“¿Ibu an binnasuli sogosunna?”Geb anga soged:“Bela dulemarga be soge: ‘Dulemar gaganyobi gued.E-yeerdaklegedi, nainugi-dutu-achunneyobi gued.7Bab-Jehová-e-buu-imaked egi nasale, gagan baisur-dinguddaed,dutumala, baisur-dinguddamogad.Ar dulemar gagan-ara-aramaladyobi gued.8Gaganmala baisur-dinguddaed,dutumala, baisur-dinguddamogad.Ar anmar-Bab-Dummad-Gayaburbadi, degisadegu maiguad, berguosulid.’ ”9Bab-Dummad sogded:“Sión-yalagi be nakwenae,gayaburba-nuegangi be sunmaknae.Yala-matusulidse be nakwenae,Jerusalén-neggweburga, gayaburba-nuegangi be sunmaknae.Ise-gandikidba be sunmaknae,binnasuli be sunmako,melle be dobe itogo.Judá-neggweburmarga be soge: ‘Be nue-dakmar.Wegi anmar-Bab-Dummad-danikid be dakmar.’
10”Bab-Jehová-gandikidba-danikid, be dakmar.Bab-Jehová e na negsemaid.E-dulamar-ollor-imaksadi, ebali nidanikid.Ibidar-nued-amisadi eba sedanikid.11Bab-Jehová e-dulamar-bendakdanikid.Igi sibad-wawaad-edarbedi, e-sibad-wawaad-mimmi nakwaa imakdae, geb e-binasgargi semaidae,degi, sibad-wawaad-milesmalad nue nimaidae.Deyobi, Bab-Jehová e-dulamar bendakdanikid.”

Dule, Israel-e-Bab-Dummadyobid sulid

12¿Doa dii-naid e-argangi wilubsasa?¿Doa mogir-naid e-goomargi wilub-imaksa?¿Doa ibmar-wilubsaedgi ukub-naid urbisa?¿Doa ibmar-wilubsaedgi yar-dummagan wilubsasa?¿Doa ibmar-wilubsaedgi yar-mullugana wilub-imaksa?13¿Doa Bab-Jehová-E-Burba bela balamioe?¿Doa ega binsaed-ukedga guoe?14¿Ar doase Bab-Jehová ibmar-magar-itogega binsaed-amissunna?¿Ar doa igar-inniki-imaked-igarba Bab-Jehová-odurdaksasunna?¿Doa ega ibmar-nue-wisigued uksasunna?¿Doa binsaed-nikaa-daed-igarba Bab-Jehová-odurdaksasunna?Suli, dule bipisaale wegiid-igarba Bab-Jehová-odurdaksasulid.
15Ar dulemar-yar-baid-baidgi-bukmaladi, Bab-Jehová-asabinni unnila bormoyagi dii-gwagwen-argwachayobi gumalad.Degi, ibmar-wilubsalegedgi ukub-ichesaar wilubsalegedyob gumalad.Ar Bab-Jehová dupgan-nanaidi, ukub-buru-aidikueyobi daked.16Líbano-yargi-sapanmar-nikadi, Babga-ibmar-ogumaklegedgi-ebulegega unnisulid.Líbano-e-ibmar-durgan-nikadi, Bab-Dummadga-ogumaklegega, unnisurbalid.17Bab-Jehová-asabinni, bela dulemar-yar-baid-baidgi-bukmaladi, ibigwensuli gumalad.Egala, gwen ibmar-nuedga gusulid.
18¿Doa-ebo be Bab-Dummad-wilubdakoe?¿Ibu-ibmar-sobaledbo be wilub-imakoe?19Dule-ibmar-sobmaladi, esgorogi ibmar-bab-dummadyob-imakleged sobmalad.A-sorba, dule-or-sobedi, a-ibmar-birgi or-nasikmalad,geb ega manidubmar sobbalid.20Ar dule-wilegeddi, e-bab-dummad-sobega suar-gege-nunguedi amied.A-sorbali, dule-wileged, dule-ibmar-nued-sobed amied.Adi, ega nuekwaa suar-bab-dummadyob sobega, melle ege-ege gwisguegar.
21¿Ar ade, bemar wissurmarsi?¿Bemar itossurmarsi?¿Bato gebesailagine bemarga soglessursi?¿Napneg-nagusad-akar bemar odurdaklessurmarsi?22Ar Bab-Jehováʼdi napneg-dirbir-naidbirgi negdaksiid,dulemar-bukwadi sesmaryobi ega gued, bai daksulid.Bab-Jehová mor-dummad-nallaa-imaklegedyobi mogir-imaked.Bab-Jehová mor-neg-egalegedyobi, mogir-billi egadaed,adi, egi megegar.23Bab-Jehová, dule-gandikmalad obelodaed.Dule napneggi-dummadga-negsemamaidi, ibmar-isganayobi obeloged.24A-dummagan sapiwar-nue-diglessuliyobi gumalad,ibmar-gwag-nue-diglessuliyobi gumalad,sapi-saila napa-yaba e-malimar-nue-ainissulidyobi gumalad.Ar Bab-Jehová egi buu-imakdele, dingudmaloed,ar gagan-dinnaganayobi burwa-dummadba seledoed.25Bab-Jehová-Isligwaled weyob soged:“Degite, ¿doabo bemar an-wilubdakmalosunna?¿Doa anyobi-daklege gusunna?”
26Niba be nue atakmar,¿doa bela we-ibmarmar obinnisa?Bab-Jehová e na niisgwamar-onied,sog-soggwen ilemaked,e-nugbali ese goled.Bab-Jehová-e-ganguedi, ibiyobi dummarba gue.E-garganguedi, ibiyobi gandiki negsemai.
27Jacob-wagan, ¿ibiga be Bab-Jehová-dikarba sunmake?Israel-dulemar, ¿ibiga be urwakwaa Bab-Jehová-dakmala?Be sogmalad: “An-igarmar Bab-Jehováʼgi dukumaiye.An-Bab-Dummad an-ibmar-imaked baisurdakye.”28¿Ar ade, be wissursi?¿Be wisgussursi?Ar Bab-Jehová Bab-Dummad-degisadeguadid,napneg-bipirmaknaid bela obinnisadid,budar-itoged nikasulid, gege geggubalid,e-nue-ibmar-wisidi, gege balamileged.29Bab-Jehová dule-yegusmaladga gangued uked,E na dule-nollo-itomaladga gandikidba gangued uked.30Sapingana dutusur-inigwele, geggusdamalad, budar-itogusdamalad.Masmala yoleddamalad, aimukuddamalad.31Degi-inigwele, dule-Bab-Jehováʼgi-bensurmaladdi, gannarse gangued nikumaloed,sulubagi-gukueyobi gumaloed:Abarmakdii gumaloed,gwen gegguosurmalad,igala-suid-nanadii gumaloed,gwen gegguosurmalad.
expand_more
Search