Kitsariyaxi38hch_wb2

'Etsekiyaxi kwiniyaya

1Mɨkɨ tukaritsie 'Etsekiyaxi katiniutakwine waɨkawamekɨ, 'ari kanimɨximekaitɨni. Hikɨ Kakaɨyari niukameya Kitsariyaxi 'Amuxi nu'aya kaneikuxeiya, mɨpaɨ katineitahɨawe: «Yawé mɨpaɨ kanaineni: “'Akie 'aixɨa ketineukuyuri, 'ari pekanimɨmɨkɨ, 'aixɨa pepɨkatika'erieniri”».2'Etsekiyaxi 'ixumeritsie heunieritaka Yawé mɨpaɨ katiniutawawirieni:3«Yawé, kena'eriwani ne 'ahɨxie 'aixɨa nepɨtikatɨa meta ne'iyarikɨ 'aixɨa netinekɨhɨawetɨ, kemɨmatinake yanepɨtiuyuri». Hikɨ 'Etsekiyaxi karima kaniutatsuani.4Hikɨ Yawé niukieya Kitsariyaxi hetsie kaninuani mɨpaɨ katinitahɨawe:5«'Etsekiyaxi hetsɨa kenemie mɨpaɨ ketinetahɨawi Yawé mɨpaɨ kanaineni, 'atutsi Rawiri Kakaɨyarieya: “Nekani'enieni 'anenewieri meta 'a'ukai nekaniuxeiya, tawarita 'akuxi tamamata heimana 'auxɨwi wiyari nekamanipitɨaka pemuyeikanikɨ.6'Ekɨ meta 'ikɨ kiekari nepɨxetawikweitsitɨani ti'aitame 'Atsiriya kiekame mɨkaxeka'unanikɨ. Ne 'ikɨ kiekaritsie nekanitanuamɨkɨ.7'Ikɨ kani'inɨaritɨni nemɨmatsiyetuirieni kenemɨmarahɨawe:8Yanepɨtiyurieni 'Akatsi 'inɨarieyatsie tau 'etɨriyaya tamamata 'inɨariyari pɨkayani yu'utɨma”». Hikɨ mɨpaɨ katiniɨyɨni tamamata 'inɨariyari kanikayani tau 'etɨrieya.

'Etsekiyaxi kemɨraka'utɨa

9'Arike 'Etsekiyaxi Kura kwieyaritsie ti'aitame tikuyetɨ 'aixɨa tiuka'erieka mɨpaɨ katinaka'utɨani:10«Ne mɨpaɨ neputainekai:“'Ari kauka mɨki teukiyata nenikayune,kaukari tukari nekahexeiyatɨ nenayani”.11Ne mɨpaɨ neputainekai: “Tawariri Yawé nepɨkaxeiyamemayeneniere memanu'uwatsie,tawariri teɨteri nepɨkawaxeiya,'ena kwiepa memɨte'u'uwa”.12Nekii nekaniuka'uniyarieni, nekaniunawaiyarieni,muxatsi wahɨweme 'ixuriki xamaruya hepaɨ.'Itsame hepaɨ, netukari nekatiniutakwikwieni,maye'itse mɨkɨ kananuyeteke.Yapauka xeitɨkariyaritsie kaneniukumaweriya.13Netinewietɨ nepikwewi kepaukake tau 'ɨrɨya manatine,mɨkɨ peru, maye hepaɨ naime ne'umeyarite putimuraxɨ.Yapauka xeitɨkariyaritsie kaneniukumaweriya.14Wiki 'itsitame kuyeikame hepaɨ nekatiniutsuani, meta waurai hepaɨ,kukuru hepaɨ neputainekai.Muyuawitsie nieriyakɨ nehɨxite puti'uxixɨa.Nepu'uximatɨarie, Yawé.Kwerietɨ keneneuparewi.
15»Neuxei ¿kenehaineni?Mɨkɨ mɨpaɨ kanetiniutaxatɨani, meta mɨpaɨ katiniuyurieni.Ne'iyaritsie kukuiniyakɨnepɨkakutsu.16Yawé, teɨteri 'aniukitsie xeikɨa mepɨtewiya,yaxeikɨata ne'iyari mana 'aixɨa ti'aneme pɨtiukaxexeiya.'Ekɨ 'aixɨa pepɨnetiuka'eritɨatukari pepɨnetsi'upitɨa.17Mɨpaɨ nepɨtimate, 'aixɨa mɨti'anenikɨ'uximatɨarikatsata nepuyetɨa.Penetsinaki'erietɨ pepɨkanetsi'upitɨamɨki teukiyata nemɨkayunekɨ,'axakenemɨtiuyuri pepuwarixiwiyaxɨ.18Mɨki teukiya 'aixɨa pɨkamarahɨawe,mɨki pɨkamatsinɨawa.Mɨki teukiyata memeukakɨkatixaɨtɨ mepɨkatetakwewie wahetsie kepemɨtiwiyanikɨ.19Kemɨ'ane memu'uwa, peru kemɨ'ane xeikɨa memu'uwa,mɨkɨ mepɨhɨkɨ memɨmatsinɨawa,hikɨ ne kenemɨmatinɨawa.Wapaapama yunaitɨ yuniwema mekateniwataxatɨakuniwahetsie kepemɨtiwiyanikɨ.
20»Yawé pɨnetsitawikweitsitɨani,Yawé tukitateye'uwatɨ kanaritekɨ tepinɨawaninaimekɨ ketemɨteheutere».21Kitsariyaxi mɨpaɨ painekai: «xapa 'ikwaxiyari witsɨanime xekenekawewi, haiyayatsie xekeneuwiri, mɨkɨkɨ 'aixɨa katinika'erimɨkɨ».22'Etsekiyaxi meta mɨpaɨ katiniuta'iwaukaitɨni: «¿Ke'aneme 'inɨari nepɨyetuiriyarieni Yawé tukita nemanutiyanikɨ?»
expand_more
Search