Kitsariyaxi
35
/
hch_wb2
Memutawikwetsitɨarie watemawierika
1
Makumawe puyukatemawieni meta 'ɨtsi mɨtiwawaki,
makumawe puyutemawieka
meta tuturi hepaɨ pɨtaxutuni.
2
Pɨkaxutuni puyutemawieka:
putahiwani temawierikakɨ.
Riwanu tsimɨtiyuxexeiya mɨpaɨ pɨtipitɨarieni,
meta Kaximeru metatsiere Tsaruni 'aixɨa kememɨte'utixuawitɨwakai.
Mɨkɨ Yawé mariweme mepɨxeiya,
Kakaɨyari witsi'anetɨ kemɨtimariwe.
3
Xekenetseiriyani mamate mɨwerarani,
tuunute xekenetseiriyani muyɨyɨakatɨka,
4
mɨpaɨ xeketeniwarutahɨawi yu'iyaritsie memɨmama:
«Xekenetɨrɨkawini, xepɨkamamaka
Xekakaɨyari kaninuamɨkɨ,
punuani mɨtiwarakapitɨanikɨ,
tiwapitɨanike kahekɨakamekɨ
kanixetawikweitsitɨamɨkɨ».
5
Hikɨ 'ana memɨkaheuneniere wahɨxite heunenieretɨ kanayeimɨkɨ,
meta memɨkaheu'enana meheu'enanatɨ mekanakɨnikuni,
6
mɨka'uyeiwe kanititsunamɨkɨ maxa hepaɨ,
meta mɨkaniuwe temawierikakɨ kanitahiwamɨkɨ.
Makumawetsietsɨ haa kanitinexɨamɨkɨ,
waɨkawa haa kanetinexɨamɨkɨ makuwakitsie.
7
Xiekari mɨxɨka haa kwekwewiwame kanayeimɨkɨ,
kwie waɨkawa meuharimɨkɨ hetsiena haixa kanetinexɨamɨkɨ meta hapurarai.
Hakewa yawixi memayu'eririya memetikukutsukai
mana haka kɨyexi hatamete kanitinexɨamɨkɨ.
8
Mana huye puyehaneni
“Huye mɨpatsie” katiniterɨwariemɨkɨ.
Mɨkɨ 'utɨma memɨka'itiyatɨka mepɨka'uyekɨne,
meta memɨka'u'iyari mana memuyekɨne mepɨkayɨwaweni,
huye memuweiya wahetsiemieme xeikɨa kanayeimɨkɨ.
9
Mana maye pɨka'uyeikani,
meta tiyukwa'ame mɨkɨ 'utɨma pɨkayemie,
Mɨkɨ 'utɨma nitixaɨtɨ pɨkatitaxeiyarieni.
Mana mekaniuyekɨnikuni xeikɨa memutawikweitsitɨarie.
10
Yawé hetsɨa mekani'axɨakuni memutawikweitsitɨarie,
Tsiyuni mekaneutahaxɨakuni temawierika kwikariyari mekwikatɨ,
yuheyeme temawierikakɨ mekurunatɨarietɨkaitɨ.
Temawierika pɨta kaniwaranuku'aximɨkɨ,
nutuixiya meta hiwerika kaniyemieni.
Powered by Seed Bible API
expand_more
Search
All books
Old Testament
New Testament
chevron_left
Previous Chapter
Books
search
Search
explore
Discover
share
Share
chevron_right
Next Chapter