Kitsariyaxi33hch_wb2

Hiwerika meta parewiya

1Xɨa'ui 'ekɨ, pemɨtiyuka'uname, 'akuxi pemɨkaka'unariewe.Xɨa'ui 'ekɨ, pemɨtiyukananaima, 'akuxi pemɨkananaimariewe.Kepauka 'ari pemɨtiyuka'una, 'ekɨta pepɨka'unarieni,kepauka pemɨtiyunanaimani, 'ekɨta pepɨnanaimarieni.
2Yawé, tame ketanenenimayaka,'ahetsiemieme temɨta'ikwewakɨ.Tsiepɨre ximeri tahetsie nunuwame kenehɨkɨtɨni,meta tawikweitsitɨwame kepauka temu'uximatɨarie.3'Aniuki mutarɨrɨrɨka me'enietɨ, teɨteri mekanitakɨkani,kepauka pemanukukiekatsie, nuiwarite kwiepa memɨtama mekanitananautsani.4Xepiinite xepɨtenawaiyarietɨwewa'atɨ 'utsikari waxa mepɨtekwa'a mepɨteyurie,wahetsɨa mepɨ'axe memɨwaraye'unie'utsikari kwinie memɨyenexime wahepaɨ.
5'Aixɨa pɨrahɨawarɨwa Yawé meutitewatsie muyeikaTsiyunitsie 'aixɨa pɨtiyuriene kemɨtiheitserie.6Mɨkɨ pɨhɨkɨtɨni 'aixɨa 'iyari pemuyeikanikɨ,waɨkawa wikweitsitɨarika pɨmatsimini, meta pemɨtimaiwenikɨ meta pemɨtimaikakɨ,xɨka Yawé pemakaka mɨkɨ waɨkawa mɨraye'axe pɨhɨkɨtɨni 'ahetsiemieme.
7Xekeniwaruxeiya kememɨte'uhiwa kuyaxi memɨka'ukamama kaye 'utɨma,nɨ'ariekate kayuwatɨ mumakakɨ memɨtekuxata meputitsuana kwi meyuhiwerietɨ.8Huye yuxaɨtame puyehapane,nixewitɨ huyeta pukaheyeika.Tɨratu peutitsanariexɨa,memunenierixɨ 'aixɨa 'iyari mepɨkaxeiyarie,nixewitɨ 'aixɨa pɨkatixeiyarie.9Kwie kaniyuheiwerieka meta kaniuwakini,Riwanu kaniyutewiyani meta kanitiyɨnareni,mayeweri Tsaruni makumawetsie hepaɨ 'anetɨ kanayani,Watsani meta Kaximeru kemɨtiutsiɨraɨyekai mɨpaɨri pɨkatiu'ane.
10Yawé mɨpaɨ kanaineni:«Hikɨ nekananukukemɨkɨ.Hikɨ 'aixɨa nekatinitahɨawariemɨkɨ,nehetsiemieme 'aixɨa katinitaniukiemɨkɨ.11Xeme kuxarikɨ xepɨtihukatameta xatsi xepɨtiniweni,peru ne'iiya tai mɨhɨkɨ kanitixɨtsitɨamɨkɨ.12Teɨteri naxi mekanayeitɨariekuni,xuya mawitekietɨka hepaɨ mekatenitaiyariekuni».
13Xeme, 'ateewa xemu'uwa,kenemɨtiuyuri xekeneu'enana,meta xeme, hurawa xemutetɨka,netɨrɨkariya xekenetimati.14'Axateyuruwamete Tsiyuni hetsie mekanimamaka,kwie mutayuane 'axateyuruwamete kaniwaranuku'axikeni:«¿Kemɨ'ane tame pɨyɨwetaipa mɨkiekametɨnikɨ mɨtiyɨxɨtsitɨwatsie?¿Kemɨ'ane tame pɨyɨweyuheyemekɨ mukuma nerɨkwari tsata mukiekametɨnikɨ?»15Kemɨ'ane xeikɨa heitserie yamɨtikamiemeta heitseriekamekɨ mɨtikuxata,'axa'anemekɨ tumini mɨkaha'i'iwa,meta tumini mɨtanaki'erienikɨ 'aixɨa mɨtiuka'iyari mɨnanaimanikɨ yuhetsie mɨkapitɨa,mɨkayuwaɨriya teyumemiwamete muwa'enienikɨ,mayukɨpiriya 'axamɨti'ane mɨkatixeiyanikɨ.16Mɨkɨ meutitewatsie pɨkiekametɨni,yu'awiwietame pexeiyani 'aitsie mɨtɨrɨkaɨyetsie,paa pemikieka,haa waɨkawa pexeiyani.
17'Ahɨxite ti'aitame witsi'anemekɨ pɨxeiya,meta kwie xekanixeiyakuni 'ayeukame.18'Ataɨta mɨpaɨ pepɨti'erieni pematɨ, meta mɨpaɨ pepɨtayɨni:«¿Hakewari peyeika wa'inɨnɨatame?¿Hakewari peyeika tumini mɨtatsiwawiriekai?¿Hakewari peyeika tuxiyutsie timieme mɨraka'utɨwa?»19Tawari mɨkɨ teɨteri memuyuti'ɨre pepɨkawaxeiya,mɨkɨ teɨteri waniuki mɨkayu'eniɨriɨkɨ,niuki kayumainɨakame memexeiya.
20Tsiyuni keneuxeiya, ta'ixɨarari kiekariyari,'ahɨxite Kerutsareme kanixeiyamɨkɨ,kii 'aixɨa mɨrewe, 'ixuriki kiiyari 'aixɨa mɨrekuwe,kɨyeyarite mukatsutsuni pɨkahatihunixɨani,kaunariteya pɨkahatekixɨani.21Mana Yawé matsiɨkɨme payeitɨani yutɨrɨkariya.Haa 'a'atayeyeutɨ maxuawe payani meta 'etsihatayeyeutɨ manuyehapane.Kanuwa 'etsimupe muwekiexime mana pɨka'uyeyani,meta kanuwa 'amupapa mɨtɨrɨkawi.22Yawé mɨtatsi'uwitɨxime mɨhɨkɨkɨ,Yawé manuyeka kanihɨkɨtɨni.Yawé tati'aitɨwame mɨhɨkɨkɨ:Mɨkɨ katanitawikweitsitɨamɨkɨ.
23'Akaunarite kaniuweranaxɨani:Patera manuwie pɨkakuhana'ixuriki heitserie pɨka'anuyewɨ.Waɨkawa piinitɨarika memɨte'a'iwaxɨ mekatenetapixɨakuni,meta memɨka'ɨkɨniwawe 'ɨaritɨ mekateninawakuni.24Nixewitɨ mɨpaɨ pɨkatayɨni: «Nepɨtikuye»,mana kiekatari 'axakememɨte'uyurikɨ mepɨteheuyehɨwiyarieni.
expand_more
Search