Kitsariyaxi27hch_wb2

'Ixaheri kemɨtiuxɨnarie

1'Iya tukaritsie Yawé kuu Rewiyatahini mɨtitewa katinikwinitɨamɨkɨ,kwinimieme mɨrayu'unawe,kwinimieme mɨrakwinɨriwawe.Yu'ixiparakɨ mɨtiyumemiwakɨ, mɨmariwekɨ meta mɨtɨrɨkaɨyekɨ,kuu mɨmariwe kanimiemɨkɨ haramaratsie mɨyeyeika.2«'Iya tukaritsie kaxie nanari haraweriyarimanayexeiyarie xekenenɨawani:3Ne, Yawé, 'ihɨweme nekanihɨkɨtɨni,tukarikɨ nekaxie nanayari yanekatinihatuiyani.Tukarikɨ tɨkarikɨ yanekatini'ɨwiyaninitixaɨtɨ 'axamɨkatiyurienikɨ.4Nepɨkaha'a.Xɨka 'ɨtsi meta xuya hexeiyani,ne nekanitamiewenimeta naime nekaniutitaiyaweni,5xɨka mɨkɨ nemi'awietanikɨ yara'eriwanikenehamatɨa kayuwatɨ hexeiyatɨ 'ayuyeitɨani,huu, nehamatɨa kayuwatɨ hexeiyame ke'ayuyeitɨaka».
6Tukari kanaye'amɨkɨ kepauka Kakuwu nanarieya manexɨani,kepauka 'Ixaheri mɨtayɨra meta mɨkaxutuni,kwiepa yu'ikwaxikɨ kanakɨnɨmɨkɨ.7Yawé pɨka'ikuwaxɨakemɨ'ane memikuwayakai muwarukuwaxɨa hepaɨ.Pɨkawarukwi memɨteyumemiwamutiwarukwi hepaɨ.8Kaniyuritɨni hetsiena kuyaxa kaniutixuawitɨani,kaneyeweiya yu'iiyakɨ'eka 'iiyayari tau manatineika miemekɨ.9Mɨpaɨ Kakuwu 'axakemɨtiuyurikɨ pɨti'itiyarieni,mɨpaɨ xeikɨa katiniyɨmɨkɨ'axakemɨtiuyuri mɨreuyehɨwiyarienikɨ:tetexi kakaɨyarixi memɨte'atimawiyarɨwa naitɨ tumuanari kehayani,tetexi mu'uniwe mɨtɨxieka hepaɨ,meta 'Atserá 'ɨkiyaya 'a'uwetɨ pɨkakuhayeikarɨwanimeta mawari taiyame 'ɨkwa witsimu'ɨa nixewitɨ tɨma.
10Kiekari 'aixɨa mɨreukukurarutɨarie panuka'unarie,mɨka'akukiepaya pɨhɨkɨ,makumawe muku'eiriwaxɨ hepaɨ.Muwa tsikeru kaneuta'ariwani,mana katiniutikwa'ani meta tupiriyate katinikwaka.11Kepauka mɨtiwauke, kɨyexiyari kanitimurikeni,hikɨ 'ukarawetsixi mekani'axeni kɨmana me'atinainike.'Ikɨ teɨteri memɨkayɨkɨhɨawe mekanihɨkɨtɨni,'ayumieme muwarutawewi pɨkawanenimaya,nitɨma pɨkawanenimaya kemɨ'ane mɨwarutawewi.12'Iya tukaritsie Yawé tɨriku pɨtiketsini 'Eupɨrate hayari manuye'anetsie paitɨ 'itsutɨame 'Ekipitu hayari manuyekatsie paitɨ ye'atɨkaime, xeme 'ixaheritsixi yuxexuitɨ xepeu'itsanariexɨani xemukuxeɨriyanikɨ.13'Iya tukaritsie kuxineta mariwetɨ kanitahɨtsieriemɨkɨ. Kemɨ'ane 'Atsiriya memehapanie meta kemɨ'ane 'Ekipitu memanutaxɨriya mekani'axɨakuni Yawé memayexeiyanikɨ hɨri mɨpatsietsie Kerutsareme.
expand_more
Search