1Horo mbira tagira ibulebirago ogoningi wali agali Yuda dindiha holebirarume iba gana ogo lolebira.Inanaga tano hongoheore ngama.Ngode Datagaliwabe ibunime tano ogoninaga wai pabe mo hongo haga kagoni.2Wali agali mana bayale tigabi biaga karu anda ibilotanonaga pabe panga timbuni payatagi hene karu dugua hadaba.Wali agali uruni ti mini bilinahe howaAnduane Homogo andaneha haabo hayaru anda ibilo.3Anduane Homogo-o í̠ andaneha haabo haga karutinaga mini í̠ha hongohe pagaho haga ka.Ani kagola í̠na tinaga miniha mo palia holene miaga ke.4Anduane Homogo ibu inanaga ha do hagane anda kagoni.Ibu ani haabobo holebira.Ani kagonaga iname ibuhondo mini mbiraore wu haabo holene nga.5Anduane Homogohanda wali agali mine haga heneru ti mo dindiho heledagoni.Tinaga tano hongohe ngago ibugua gialo hole bialudindini haealabaga bu ngelai haga ka.6Wali agali maru bu hearume yagibano hearu mo ko hayagola darabi uruni ti mbirale mbira nawiore hene.Yagibano uruni tigua tano bo gialapaya bini bu wiaru áyu hengedalu pialu ka.7Wali agali bayale karume hariga pialu heloAnduane Homogo-o í̠nioreme hariga ogoni mo tigabu wiaga ke.8Anduane Homogo-o ina bibahende í̠naga mana lo ngedagua talialu ibule eberemagoni.Iname í̠ handaya howa dunubia ho kamagoni.Í̠ni mini lene timbuniore kego hame lalu kama.9Mbiragabi i̱naga gubalinioreme í̠ hangu mitangi biaabo haruli.Í̠na wali agali dindini karu ti godini dabaki beregolatigua í̠naga mana tigabi ngegome dabaganego ogo aleda lalu manda bulebira.10Í̠na wali agali ko biaga karu ti dara hariligoyutigua í̠naga mana tigabi bulene ngaru moya nabi holebira.Ti wali agali tigabiwi karu baba mandagi howa degetigua mana ko ngaru bialu haabo haga ka.Tigua í̠naga mana bayale tigabi ngegobi hongo timbunihe kegobi mitangi nabi howaí̠ni andaneha holenegobi mangaore haga ka.11Anduane Homogo í̠na wali agali ko bu karu pani mule í̠naga gi dogola amu ho kegoni.Í̠ ani bu kegoni tigua de handa nabi ka.Anduane Homogo-o í̠naga wali agali bu karuni í̠nime biamogo biaga kegoni ti hendelo mo walia habe.Anidagua beregola mana ko biaga karu ti taga timbuni holebira.Í̠naga waitigiru bo delole ira timbuni dela manda manda bu wirigomeí̠na wali agali ko biaga uruni dai helo.12Anduane Homogo-o í̠naga wali agali bayale hangu holoma̱ya bayale holene í̠na ibilaga kegoni.Iname mbirale bibahende bayale bigi birimaruí̠na biamogo birigola birimagoni.13Anduane Homogo inanaga Ngode Datagaliwabe-oagali haguane tara henerume ina handaya ho henegoyuí̠ni hangu inanaga Anduane Homogo timbuniore kegoni.14Áyu agali haguane uruni tini mbira ha nabi homai hayagonimanibi ti lone heya nabulebira.Í̠na tinaga hongo heago bope haluti mo ko howa bo ereba hai helarigoni.Wali agalime abogo hene lalu mani tinaga mini manda nabulebira.15Anduane Homogo-o í̠nime inanaga dindi tubari mo yanga lalu mo timbu harigoni.Anidagua birigome í̠ninaga mini timbuni mini leneore helarigoni.16Anduane Homogo-o í̠naga wali agali bu hearu pani mialu barigolatigua í̠ni heria dara holene heba ibalu í̠nihondo bi layagoni.17Walime gali taba honole tandaga nalu pedere biagadaguainame genda tandagala timbuniore nalu howa pedere bialu harimagoni.18Tandaga ogoni narimagoyu iname mbirale bayale mbira tagira naibiya.Waitigi hearu tinaga hongome ina bope hayagoinanaga dindi ogo iname mo bayale habe nahe harima.19Inanaga damene homayaru ti mani lone heyu holebira.Tinaga tingini heba heyu holebira.Áyu homaliha padaruni tigua dengalalu heyuwamani turu halu kulo holenenaga iba gana lalu holebira.Dindi ko yobi ngagoni mbiraga dadimba ibiragome datani mo gomba haragola anda hagadaguaAnduane Homogohanda homene uruni tinaga holene lone miadai bialu mo heya hai holebira,lalu iba gana ogoni lolebira, lene.
Anduane Homogohanda ibunaga wali agali pani mialu lone mo bayale holebero lenego ogo
20I̱naga wali agali bu kamiru tí tíni andaga anda puwa panga payatagi ho biralimu. Anduane Homogonaga lembo holene ngago ereba helotagi tí ani bira do halimu.21Anduane Homogohanda wali agalime ko biyarunaga pani mule ibuni dalu dahuliya andaga wahalu dindini dalialu ibiragoni. Ani ibiragola wali agali bo wahenerunaga darama dindime mo do habe naheore wulebira. Wali agali ohowa homelo bo wahaga biyaru mo pana hai holebira.