Kitsariyaxi26hch_wb2

Mɨrayu'iwaxɨ kwikarieya

1'Iya tukaritsie 'ikɨ kwikari pɨtakwikarieni Kura kwieyaritsie:«Kiekari tepexeiya tɨrɨkaɨyeme.Kuraru 'amatayewa hepaɨ, tahetsie nunuwame hepaɨ,Kakaɨyari yuwikweitsitɨarika pɨyetua.2'Itupari xekeneuyepi, meutahanikɨnuiwari 'aixɨa mɨtiuka'iyari heitseriemekɨ yamɨtikamie.3'Aixɨa 'anemekɨ 'amuyeikapepipitɨani kayuwatɨ hexeiyatɨ 'amuyeikanikɨ,'ahetsie yuri mɨti'eriekɨ.4Yawé hetsie yuri xeketene'erieka yuheyemekɨ,Yawé 'ai mɨhɨkɨkɨ yuheyemekɨ.5Mɨkɨ memeuka'u pɨwaratixɨrɨwameta puwaka'una kiekari muyuta'ɨre:pika'una kwiepa petihɨpa,kanetihɨpani tumuanaripa heutenime kanayeitɨwani.6Memɨkatɨrɨkawi meta memɨnanaimariemekaniwatiketsinani yuketakɨ».
7Heitserie mexeiya huyeya makuweri kanihɨkɨtɨni.'Ekɨ, heitseriemekɨ 'apemuyeika, huyeya 'akuwerime kenayeitɨirieka.8Yawé, huu, 'ahetsie tepɨta'ikwewa,petati'ɨkitɨakaku yatepɨtehetimamateke mɨpaɨ temɨte'u'uwanikɨ,kepemɨtitewa meta pemɨkahatɨtɨmaiyarɨwamɨkɨ pɨhɨkɨ temeiyehɨwa tatukaritsie.9Tɨkarikɨ naime ne'iyarikɨ nepɨmatsi heuyehɨwa,ximeri ne'iyari pɨmatsi'utiwawa.Kepauka 'aixɨa pemɨtiyuriene kwiepa,kwiepa memɨtama mepɨtehetimamateke tita mɨtiheitserie.10Tsepa 'axamɨtiuka'iyari mɨnenimayatsie,pɨkaretimamateke tita mɨtiheitserie,'aixɨa mɨti'ane mɨraxuawetsie 'axapɨtiyuriene pɨta,Yawé kemɨtimariwe pɨka'imate.
11Yawé, 'amamá pepanukuhana,peru mɨkɨ mepɨka'ixeiya.'Ateɨterima wahetsiemieme kepemɨti'ɨtetsa meke'ixeiya, 'ana meke'uyutitetewiya,taikɨ meke'utixɨtsitɨarienimemɨmetsi'aye'unie muwahetsiemieme.
12Yawé, 'ekɨ kayuwatɨ pepɨxuawitɨa tahetsiemieme,'ekɨtsɨ pekanihɨkɨtɨni yapemɨtiyuriene naime ta'uximayatsikakɨ.13Yawé, takakaɨyari,hipatɨ te'aitamete meripaitɨ mepɨtate'uta'aitɨa,peru 'ahetsiemieme xeikɨa 'aixɨa tepaitɨka.14'Ari mepukwi, tawariri mepɨka'anutaneniere,'etɨri mepɨhɨkɨri, tawarita mepɨka'anuku'uni.'Ekɨ 'uximatɨarika pepɨwarupitɨa meta pepɨwaruka'unaxɨ,yapepɨtiuyuri memɨkaha'eriwanikɨri.15Yawé, 'ekɨ nuiwari mariweme pepayeitɨa,mariweme pepa'ayeitɨa meta witsipe'anetɨ pepe'ayeitɨa,kwie hakewa meuye'atɨkatei tawarita 'apepitayeuritaxɨ.16Yawé, 'uximatɨarikatsata mepɨmatsi'utiwau,nenewierikɨ 'etsiwa xeikɨa me'eniɨriɨkɨtɨkepauka 'ekɨ pemɨtiwaruka'enitsitɨatsie.17Yawé, tame 'ahɨxie tepu'axɨakepauka 'uka mayehuka hepaɨ te'utiyuatɨmutahiwa yu'ɨimɨranetɨ kukuiniyakɨkepauka mɨtiniwerɨmenitsie.18Tekaneyexeiya, tekaniyuti'ɨimɨra,peru 'eka xeikɨa tekanayexeiya.Kwiepa wikweitsitɨarika tepɨka'atɨa,meta kwiepa memɨtama mepɨka'utinunuiwaxɨa.
19Peru 'ahetsie metewiyatɨ memukwi mepanutaneniere,wa'umete tukari hexeiyatɨ payani.Xekenanutanenieri xekeneutihiwani temawierikakɨ,tumuanaripa xemɨkiekatari.Haɨtsi 'ahetsɨa mieme, haɨtsi ximeri mieme hepaɨ kani'aneni,kwie meta yumɨkite puwayetuani.
20Neteɨterima nehetsɨa miemete, yukiita xekeneutahaxɨaxeheutahaxɨame xeketeneunama,yaxeketeneuteri xeyu'awietatɨ,haxɨa hanuyeyayuke.21Xekenayeneniereni,Yawé yukiita kaniwayeyeimɨkɨ'axamemɨteyurie tiwakwinitɨanikekwiepa memɨtama.Kwie xuriya mutayeuriya kanihekɨatamɨkɨ,xuriya mana memutayeuri pɨkawa'awietaniri.
expand_more
Search