Kitsariyaxi23hch_wb2

Niuki Tiru hepaɨtsita mieme

1Niuki Tiru hepaɨtsita mieme:Xekeneutitsuanani, kanuwate Taritsi miemete,xekii meti'unariekɨ meta haramara tetsita xemuwa'axetsie.Tsipɨre kwieyaritsie paitɨmana paitɨ me'u'uwatɨ mekateniutamarieni.
2Kayuwatɨ xekeneumaka, haramara tetsita kiekatari,Tsiruni kiekatari tetuayamete,kanuwa nɨ'awamete waɨkawa metehexeiyame xemɨwarayeitɨa.3Haa mɨmamariwawetsieTsikuxi hatsiyari kananetɨarieni,Tiru kiekariyari waɨkawa mɨratuiya patɨa nuiwarite wahetsiemieme,Niru hatetsitayaritsie mutiuka'etsiwakai mɨkɨkɨ waɨkawa mepɨte'ana'iwakai.4Tsiruni, keneyutewiyani, haramaratsie pemɨtiwiya,haramara mɨpaɨ kaniutayɨni:«Kemɨtiyukukuine niwenetɨ nepɨkatimate meta nepɨkaheyeniweya,tɨɨri nepɨkawareyewaweriya meta 'ukari nepɨkawareuta'ɨxatsitɨawe».5Kepauka 'Ekipitu niuki mɨye'ani,Tiru hepaɨtsita metemarietɨ mekaniyutihiwerikuni.
6Taritsi xekeneuyekɨni,haramara tetsita kiekatari, xekeneutitsuanani.7¿'Ikɨ xekiekari muyutemawie tihɨkɨ,kiekari meripaitɨ mieme,teɨterimama memeiwitɨ'ateewa paitɨ mekuyaxeke?8¿Kemɨ'ane mɨyaputayɨ Tiru hepaɨtsita,kiekari piinite raye'atɨkaime mɨtitiwewiwakai,tetuayametemama memanuyetei mepɨhɨkɨtɨkai,meta wahamatɨa memɨte'uximaya naitsarie kwiepa mepɨmatiwakai?9Yawé Naimekɨmɨtɨrɨkaɨye hepaɨtsitana mɨpaɨ kaniutayɨkaitɨnikemɨ'ane kwinimieme mɨtiyuta'ɨre mɨka'unakɨmeta yunaime teɨteri memeuka'u kwiepa tixaɨtɨ mɨkatiwarayeitɨanikɨ.
10Taritsi niweya,Niru hepaɨ 'akwie keneuka'etsa,'ari 'akanuwa muwaye'axekaitsie kaniukumaweni.11Yawé haramaratsie yumamá kaneutatsera,meta te'aitamete kaniwarutiyɨyɨakitsitɨani,meta katiniuta'aita Kanani kiekariyari 'aixɨa mɨ'ane mɨka'unarienikɨ.12Mɨkɨ mɨpaɨ kaniutayɨni:«'Ɨimari waɨriyarika 'ahamatɨa mɨtiukahitɨxɨ, Tsiruni niweya:tawarita peyutemawietɨ pepɨkahayani.»Kenanukukeka, Tsipɨre paitɨ 'anutaɨye kenanuye'a,peru yaxeikɨa mana 'aixɨa 'anemekɨ pepɨkatayerɨni».13Karireutsixi wakwie keneuxeiya.Mɨkɨ teɨteriyari mekaniumaweniri.'Atsiriya makumawetsie yeutarimemayu'awieta wakie pɨta kanayeitɨani.Makeme me'utawewieka wakurarutsie mekaneukatsunaxɨani,wakii 'aixɨa mɨ'anenekai mekaniuti'una,naime 'u'unime mekaniuhayewa.
14Kanuwate Taritsi mieme, xekeneutitsuanani,xekiekari 'aixɨa mɨ'ane muka'unariekɨ.15'Iya tukaritsie Tiru kanatɨmaiyariemɨkɨ haika tewiyari heimana tamamata wiyari, ti'aitame kemɨreutetere 'ayenieretɨ. Peru mɨkɨ wiyari tixɨyu, kemanɨyɨne 'uka tuminikɨ muyuwitɨnɨa kwikariyari mɨpaɨ katiniyurimɨkɨ Tiru kiekariyari:16«'Ekɨ, 'uka tuminikɨ pemuyuwitɨnɨa,'aripa keneutikweka kiekari warita kenaye'a,yemekɨ kepemɨtiyɨwe ketineukayuitɨa,meta waɨkawa kwikari keneutikwika,'uxa'atɨniwarie pemuku'eriwanikɨ».17Haika tewiyari heimana tamamata wiyari 'anuyeyayu, Yawé Tiru panukuketɨani, mɨkɨ tawarita puyutuani, tuminikɨ muyumayɨinɨa payuyeitɨani yunaime te'aitamete wahamatɨa.18Peru ketipaɨmeme mɨtiyetua meta kepaɨmeme mana'i'iwani Yawé hetsɨa mieme tipatsietɨ pɨrayeikani, pɨkati'utɨni meta pɨkatixeɨriyaka xeikɨa. Tita mɨrana'iwarieka Yawé hetsiemieme memɨte'uximaya wahetsiemieme pɨrayeikani, memɨteyumikwanikɨ 'anayuhayewamekɨ meta 'ixuriki witsimɨ'anenekɨ memuyukemaritɨakakɨ.
expand_more
Search