Xiroosas Odetida Tinbite
1Xiroosa katamaas odetida Godaa qaalay haysa. Xiroosa kataman keethi woyko shempiya soy bayna gisho hinteno Tarsesa markabiya laaggeysato yeekite! Qophiroosa biittafe ha worey hinteko yis.2Hinteno, abba matan de7iya asaw, hinteno abba bollara hemetiya duretida, Sidoona zal7anchoto, si77i giite!3Hintew yaa kathay, Nayle shaafape caketida Shihoora biitta kathi; hinte kawotethatas zal7e bessi.4Neno Sidoona katamaw, abba matan de7iya miixaw, abbay, “Taani iqetabike; yelabike; addenne macca na7a dichabike” yaagidi odida gisho yeellata.5He worey Gibxe biitta gakiya wode enti Xiroosaba si7idi dagammana.6Hinteno abba matan de7iya asaw, zeleelishe Tarsesa pinnite.7Beni wode keexetida katamay, iya tohoy iya haaho biitta efidaynne hinte iyan ufaytiya Xiroosa katamay haysee?8Kallacha wosisiya katamaa, iya zal7anchoti halaqata gididanne iya giddon bayzeysatinne laammeysati bonchetidaysata gidida Xiroosa katamaa bolla haysa halchiday oonee?9Otoranchota boncho ubbaa guuthanawunne biitta bolla bonchetida ubbaa kawushanaw Ubbaafe Wolqaama Goday haysa halchis.10Hinteno, Tarsesa asaw, hintena teqiyabay bayna gisho, Nayle shaafada biitta bolla kumidi goggite.11Goday abba bolla ba kushiya miccis; iya kawotethaa qaathis. Kanaane miixa laallana mela Goday kiittis.12Gujidika, “Hinteno, un7etida Sidoona asaw, hinte ufaysan yexiya wodey wuris. Dendidi Qophiroosa pinnite; yanka hinte saro demmeketa” yaagis.13Babiloone biitta be7ite; he biittay ha77i pathonnaba gidis. Asoore asay he biittan do7i aqanaada oothis. Enti yan de7iya wogga keethata laallidi bantaw miixa gimbidosona; biitta baysa oothidosona.14Hinteno, Tarsesa markabeto, hinte miixay laaletida gisho, zeleelite.15Xiroosa katamay issi kawos de7o laythi gidiya laapun tammu laythi dogetidi daana wodey yaana. Laapun tammu laythi wuriya wode layma maccasas yexetiya yetha mela Xiroosa katamaas yexetana.16Enti, “Neno dogetida layma katamaw, ne diitha ekada katamaara yuuya. Nena asay hassayana mela mal7o qaalan daro yethi yexa” yaagana.17Laapun tammu laythay poletiya wode, Goday Xiroosa xomoosana. Shin hessafe guye, I beni ba laymatetha oosuwako simmana; sa7an de7iya kawotethata ubbaara laymatana.18Gidoshin, iya zal7iya wodheynne iya damoozey Godaas dummatidaysa gidana; iya zal7iya wodheynne kathinne lo77o ma7o shammanaw, Godaas oothiya asaas imetanaape attishin, miishe keethan woyko minja keethan uttenna.