Kitsariyaxi21hch_wb2

Niuki Wawiruniya hepaɨtsita mieme

1Niuki makumawe haramara 'aurie mukuma hepaɨtsita:Nekexi muyekɨka haikɨri mɨtɨrɨkaɨye hepaɨ,kwie makumawetsie xewitɨ kanayeneximeni mariwetɨ.2Mariweme nepɨtiuxeiyatsitɨarienepɨtiuhekɨatsitɨiyarie:mɨtiyukwamana pɨtiyukananaimaka,tiyu'uname pɨtiyuka'unani.'Erami keneyumieneni. Meriya kiekatari xeiya xekeneyukwitɨweni.Naime hiwerika nepautiparitɨani.
3'Ayumieme newaiyari puyɨyɨaka kukuiniyakɨ,'etsipemekɨ kukuiniyakɨ nepɨtiuka'eniwa,niweyame hepaɨ,ketitanemɨti'eniekɨ, nepɨtiuka'eniwa,ketita nemɨtixeiyakɨ, nemakame pɨnetsi'ayeitɨa.4Nepɨkaheneta'eriwa,nemariutsietɨ xeikɨa nepɨyɨyɨaka,taikai kwinimieme mɨnetinakekaihikɨri nepimakaxe.
5Mɨkɨ mexate mana mepuku'uitɨa,'itari mekanikuwerani,mepɨtekwa'a meta mepɨte'ie.Xemanuyetei, 'axekeneti'uka.Xekenanuku'uti, yuheima nunuwame xekeneutiwiyama.6Yawé mɨpaɨ kanetiniutahɨawe:«Kenemie, xeime tihɨweme keneuketsa,mɨtikuxatanikɨ naime kemɨtiniereni.7Kepauka kaxetate yukukuyamete kawayutsixi mehenawɨtɨakame mɨwaxeiyani,yatɨni teɨteri puxuri wahetsie me'utekame yatɨni kameyutsixi wahetsie,ke'uniere yukɨ'ɨwiyatɨ,waɨkawamekɨ yukɨ'ɨwiyatɨ».8Tihɨweme kaniutahiwa:«Ti'aitame, tukari manukayeika,tuxiyutsie ne'akawetɨ nepɨkatihayewa,tɨkarikɨ mana nepukatariyarɨwakenemɨtihɨritɨarie netita'ɨwiyatɨ.9Mana xewitɨ tewi kanamienikaxetatsie kawayutsixi me'ehanatɨ.'Ikɨ kaniniukieyatɨni:“'Ari Wawiruniya kanatiweni, kanatiweni.Naitɨ kakaɨyariximama wa'ɨkiyakwiepa katinanukuheni”».
10Neteɨterima, tɨriku mu'urie hepaɨ mɨ'ane,ne nekamatinaxaxatɨwani kenemɨtiu'enaxɨYawé Naimekɨmɨtɨrɨkaɨye hetsiemieme,'Ixaheri Kakaɨyarieya.

Niuki 'Erumi hepaɨtsita mieme

11Niuki Rumaha hepaɨtsita mieme:Xewitɨ Tsehixi kwieyaritsie paitɨ pɨnetsihehiwie:«Tihɨweme, ¿'ɨyɨwitɨ 'akuxi kereutere?Ti'ɨwiyame, ¿mɨkahekɨarekɨ kereutere?»12Tihɨweme mɨpaɨ kaniutayɨni:«'Ari kanikahekɨarirɨmeniri, peru yaxeikɨata tɨkari 'ukanamieni.Xɨka xeheu'iwaukuni, xekeneku'iwawani,xɨka tawari xehayenexɨakuni xekenayenexɨa».

Niuki 'Arawiya hepaɨtsita mieme

13Niuki 'Arawiya hepaɨtsita mieme:Kɨkamete Rerani kiekatari,makumawetsie 'akɨ'ɨtsiyakaku xemukutei:14mɨyeharimɨne xekenanunakihaa xekeneuharitɨa.Temaha kwieyaritsie kiekatari,yu'unamete 'ikwai xeketeniwarumikwa,15mɨkɨ 'ixipara memakatɨ mekaniyu'unarɨmeni,'ixipara mɨhekɨa,tupi karima mayuhapatɨkameta mɨrayukwitɨnetsie.16Yawé mɨpaɨ kanetiniutahɨawe: «Xeiwiyari ka'anuyeyeiwekaku, ti'uximayatame mɨtiu'inɨnɨata hepaɨ ti'inɨatsieme, Tseraxi kemɨtimariwekai naitɨ kaneutiparimɨkɨ.17Temɨmɨmete 'etsiyupaɨmetɨ mekaniyuhayewakuni, Tseraxi kiekatari yukukuyamete, mana memutawikwei». Yawé mɨpaɨ kaniutayɨni, 'Ixaheri Kakaɨyarieya.
expand_more
Search